അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഇന്നൊരു സ്പെഷ്യൽ മുട്ടക്കറി ഉണ്ടാക്കിയാലോ? രുചികരമായ അഫ്ഗാനി മുട്ടക്കറി റെസിപ്പി നോക്കാം. ചപ്പാത്തിക്കും ചോറിനുമെല്ലാം കൂടെ കിടിലൻ കോമ്പിനേഷൻ ആണ്.
ആവശ്യമായ ചേരുവകൾ
- സവാള (ഇടത്തരം വലുപ്പം) – 1
- വെളുത്തുള്ളി (ഇടത്തരം അല്ലികൾ) – 6-7
- ഇഞ്ചി – 1 ഇഞ്ച് കഷ്ണം
- പച്ചമുളക് (ചെറിയത്) – 3 (എരിവിനനുസരിച്ച്)
- കശുവണ്ടി – 10-12
- മല്ലിയില – ഒരു പിടി
- മുട്ട (പുഴുങ്ങിയത്) – 3
- മുളകുപൊടി – അല്പം
- മഞ്ഞൾപ്പൊടി – അല്പം
- ബട്ടർ – ആവശ്യത്തിന്
- കറുവപ്പട്ട – ഒരു ചെറിയ കഷ്ണം
- ഏലക്ക – 2
- ഗ്രാമ്പൂ – 3
- പുളിയില്ലാത്ത തൈര് – 1/4 കപ്പ്
- ജീരകപ്പൊടി (വറുത്ത് പൊടിച്ചത്) – 1/2 ടീസ്പൂൺ
- ഗരം മസാല – 1/2 ടീസ്പൂൺ
- കുരുമുളകുപൊടി – 1/4 – 1/2 ടീസ്പൂൺ (എരിവിനനുസരിച്ച്)
- ഉപ്പ് – ആവശ്യത്തിന്
- വെള്ളം – ആവശ്യത്തിന്
- ഫ്രഷ് ക്രീം – 2-3 ടേബിൾസ്പൂൺ
തയ്യാറാക്കുന്ന വിധം
അരപ്പ് തയ്യാറാക്കുന്ന വിധം
ഒരു കടായിൽ അല്പം വെജിറ്റബിൾ ഓയിൽ ഒഴിച്ച് ചൂടാക്കുക. അരിഞ്ഞ സവാള, വെളുത്തുള്ളി, ഇഞ്ചി, പച്ചമുളക്, കശുവണ്ടി എന്നിവ ചേർത്ത് സവാള വാടുന്നതുവരെ വഴറ്റുക. തീ ഓഫ് ചെയ്ത് മിശ്രിതം തണുക്കാൻ വെക്കുക. തണുത്ത ശേഷം മിക്സിയുടെ ജാറിലേക്ക് മാറ്റി നന്നായി ചതച്ചെടുക്കുക. ഇതിലേക്ക് കഴുകി വൃത്തിയാക്കിയ മല്ലിയിലയും 1/4 കപ്പ് വെള്ളവും ചേർത്ത് നല്ല പേസ്റ്റ് രൂപത്തിൽ അരച്ചെടുക്കുക.
അതേ പാനിൽ കുറച്ചുകൂടി എണ്ണ ഒഴിച്ച് ചൂടാക്കുക. അല്പം മുളകുപൊടിയും മഞ്ഞൾപ്പൊടിയും ചേർക്കുക. പുഴുങ്ങി വരഞ്ഞുവെച്ച മുട്ടകൾ ഇതിലേക്ക് ഇട്ട് മസാല പിടിക്കുന്നതുവരെ ഇളക്കി വറുത്തെടുക്കുക. മസാല പിടിച്ച ശേഷം മുട്ടകൾ എണ്ണയിൽ നിന്ന് കോരി മാറ്റുക.
അതേ പാത്രത്തിലേക്ക് അല്പം ബട്ടർ ചേർക്കുക. കറുവപ്പട്ട, ഏലക്ക, ഗ്രാമ്പൂ എന്നിവ ചേർത്ത് ലോ ഫ്ലേമിൽ വഴറ്റുക. നേരത്തെ അരച്ചുവെച്ച പേസ്റ്റ് ചേർത്ത് പച്ചമണം മാറുന്നതുവരെ വഴറ്റുക. 1/4 കപ്പ് പുളിയില്ലാത്ത തൈര് ചേർത്ത് നന്നായി ഇളക്കുക. 1/2 ടീസ്പൂൺ ജീരകപ്പൊടി, 1/2 ടീസ്പൂൺ ഗരം മസാല, അല്പം മഞ്ഞൾപ്പൊടി, 1/4-1/2 ടീസ്പൂൺ കുരുമുളകുപൊടി, ആവശ്യത്തിന് ഉപ്പ് എന്നിവ ചേർക്കുക.
1/2 കപ്പ് വെള്ളം ഒഴിച്ച് നന്നായി തിളപ്പിക്കുക. അടച്ചുവെച്ച് 5 മിനിറ്റ് തിളപ്പിക്കുക. കറി തിളച്ച് എണ്ണ തെളിഞ്ഞുവരുമ്പോൾ 1 ടീസ്പൂൺ കസൂരി മേത്തി (ചൂടാക്കി പൊടിച്ചത്) ചേർക്കുക. 2-3 ടേബിൾസ്പൂൺ ഫ്രഷ് ക്രീം, കുറച്ച് തിളപ്പിച്ച വെള്ളം എന്നിവ ചേർത്ത് ഇളക്കുക. നേരത്തെ വറുത്തുവെച്ച മുട്ടകൾ ചേർക്കുക. അടച്ചുവെച്ച് 2-3 മിനിറ്റ് കൂടി തിളപ്പിക്കുക. തീ ഓഫ് ചെയ്ത് മുകളിൽ കുറച്ച് മല്ലിയില വിതറി അടച്ചുവെക്കുക.
