അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.യുഎസ് പ്രസിഡന്റ് ഡൊണള്‍ഡ് ട്രംപ് അടുത്തഘട്ട നികുതി പരിഷ്‌കാരത്തിന് കച്ചകെട്ടുന്നതായി റിപ്പോർട്ട്. ലോകത്തെ തന്റെ സമ്മർദ്ദ വരുതിയിലാക്കാനുളള ആയുദമായാണ് ട്രംപ് നികുതിയെ കാണുന്നത്. ട്രംപിന്റെ പുതിയ താരിഫ് ലോക വിപണികളെ ഒന്നാകെ ബാധിച്ചേക്കാമെന്നു വിദഗ്ധരും ചൂണ്ടികാട്ടുന്നുണ്ട്. ഒരുപക്ഷെ പണപ്പെരുപ്പത്തിന് വരെ കാരണമായേക്കാം. കാരണം ഇലക്ട്രിക്കല്‍ ഉല്‍പ്പന്നങ്ങളില്‍ ഉള്‍പ്പെടുത്തിയിരിക്കുന്ന ചിപ്പുകളുടെ എണ്ണത്തെ അടിസ്ഥാനമാക്കി പുതിയൊരു നികുതി ട്രംപ് പരിഗണിക്കുന്നതായാണ് ആഗോള റേറ്റിംഗ് ഏജന്‍സിയായ റോയിട്ടേഴ്‌സ് റിപ്പോര്‍ട്ട് ചെയ്യുന്നത്.
എന്നാൽ ഈ നികുതി നീക്കത്തിന് ഔദ്യോഗിക സ്ഥിരീകരണം ഇതുവരെ ഉണ്ടായിട്ടില്ല . ഇക്കഴിഞ്ഞ ദിവസമാണ് ഫാര്‍മ, ഫര്‍ണിച്ചറുകള്‍, വലിയ എന്‍ജിനുകള്‍ എന്നിവയ്ക്ക് ട്രംപ് പുതിയ നികുതി പ്രഖ്യാപിച്ചത്. അതേസമയം ഇലക്ട്രിക്കല്‍ ഉല്‍പ്പന്നങ്ങള്‍ക്ക് നികുതി ചുമത്താനുള്ള നീക്കം ഉയര്‍ന്ന ആഗോള പണപ്പെരുപ്പത്തിന് കാരണമായേക്കാമെന്ന് വിദഗ്ധര്‍ ചൂണ്ടിക്കാട്ടുന്നു. കാരണം ലാപ്ടോപ്പുകള്‍ മുതല്‍ ടൂത്ത് ബ്രഷുകള്‍ വരെയുള്ള ഇലക്ട്രിക്കല്‍ ഉല്‍പ്പന്നങ്ങളെ ഇതു ബാധിക്കും. കൂടാതെ സെമികണ്ടക്ടര്‍ കമ്പനികളുടെ വരുമാനത്തെയും ബാധിക്കും.
ഇങ്ങനൊരു നികുതി പ്രാബല്യത്തില്‍ ആയാല്‍ ചരക്ക് വില വര്‍ധിക്കും. ഇത് യുഎസിനെ കൂടുതല്‍ തളര്‍ത്തുമെന്നും വാദങ്ങളുണ്ട്. കാരണം യുഎസ് ഇപ്പോഴും പണപ്പെരുപ്പത്തിന്റെ പിടിയില്‍ നിന്നു മുക്തമായിട്ടില്ല. പണപ്പെരുപ്പം ഇപ്പോഴും ഫെഡ് ലക്ഷ്യങ്ങള്‍ക്കു മുകളില്‍ തുടരുന്നു. ഇത്തരമൊരു താരിഫ് വര്‍ധന ആഭ്യന്തരമായി ഉല്‍പ്പാദിപ്പിക്കുന്ന ഉല്‍പ്പന്നങ്ങളെ കൂടുതല്‍ ചെലവേറിയതാക്കും. കാരണം ഇന്‍പുട്ട് ചെലവ് വര്‍ധിക്കും. അങ്ങനെ വന്നാല്‍ പണപ്പെരുപ്പം ഫലം.
യുഎസിന് ദേശീയ, സാമ്പത്തിക സുരക്ഷയ്ക്ക് ആവശ്യമായ സെമികണ്ടക്ടര്‍ ഉല്‍പ്പന്നങ്ങളെ എന്നും ഇറക്കുമതിയിലൂടെ ആശ്രയിക്കാന്‍ കഴിയില്ലെന്ന് വൈറ്റ് ഹൗസ് വക്താവ് കുഷ് ദേശായി വ്യക്തമാക്കിയതായി റോയിട്ടേഴ്‌സ് പറയുന്നു. ഉല്‍പ്പാദന കമ്പനികളെ യുഎസിലേക്ക് തിരികെ ആകര്‍ഷിക്കാന്‍ ട്രംപ് സര്‍ക്കാര്‍ താരിഫ്, നികുതി ഇളവ്, നിയന്ത്രണങ്ങള്‍ നീക്കല്‍, ഊര്‍ജ്ജ ആനുകൂല്യങ്ങള്‍ ഉള്‍പ്പെടെ നിരവധി ആനുകൂല്യങ്ങള്‍ പദ്ധതിയിടുന്നുവെന്നും അദ്ദേഹം പറഞ്ഞു. അമേരിക്ക ഫസ്റ്റ് സമീപനമാണ് ട്രംപിനുള്ളത്.
അതേസമയം ചിപ്പ് അധിഷ്ഠിത ഉല്‍പ്പന്നങ്ങള്‍ക്കുള്ള കൃത്യമായ നിരക്കുകളും, സാധ്യമായ ഇളവുകളും ഇതുവരെ തീരുമാനമായിട്ടില്ല. സെമികണ്ടക്ടര്‍ ഇറക്കുമതിക്ക് 100% താരിഫ് ചുമത്തുമെന്ന് ട്രംപ് ഇതോടകം വ്യക്തമാക്കിയിട്ടുണ്ട്. ഇക്കഴിഞ്ഞ ദിവസമാണ് ട്രംപ് ഫാര്‍മയ്ക്ക് 100% നികുതി ചുമത്തിയത്. യുഎസില്‍ നിര്‍മ്മാണം നടത്തുന്ന കമ്പനികളെ ഈ ഭീമമായ നികുതിയില്‍ നിന്ന് ഒഴിവാക്കിയിട്ടുണ്ട്. യുഎസ് നീക്കം യുഎസിലേയ്ക്ക് ഏറ്റവും കൂടുതല്‍ ഇലക്ട്രോണിക്സ് ഇറക്കുമതി നടത്തുന്ന തായ്വാന്‍ സെമികണ്ടക്ടര്‍ മാനുഫാക്ചറിംഗ് കമ്പനി, സാംസങ് ഇലക്ട്രോണിക്സ് എന്നിവരെയാകും ബാധിക്കുക.
ഇറക്കുമതി ചെയ്യുന്ന ഉപകരണങ്ങളിലെ ചിപ്പുമായി ബന്ധപ്പെട്ട വസ്തുക്കള്‍ക്ക് 25% നികുതിയും, ജപ്പാനില്‍ നിന്നും യൂറോപ്യന്‍ യൂണിയനില്‍ നിന്നും ഇറക്കുമതി ചെയ്യുന്ന ഇലക്ട്രോണിക്‌സിന് 15% നികുതിയും ചുമത്താന്‍ യുഎസ് പദ്ധതിയിടുന്നുവെന്നും റിപ്പോര്‍ട്ടുകളുണ്ട്. അതേസമയം ഒരു കമ്പനി അതിന്റെ അടിസ്ഥാന ഉല്‍പ്പാദനം യുഎസിലേക്ക് മാറ്റുന്ന പക്ഷം ഇളവുകളും ലഭിക്കുമെന്നു റിപ്പോര്‍ട്ടുകള്‍ കൂട്ടിച്ചേര്‍ക്കുന്നു.
