അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.വിവാദങ്ങളും, ബാങ്ക് ഫ്രോഡ് ആരോപണങ്ങളും വിടാതെ പിന്തുടരുന്ന അനില്‍ അംബാനി തന്റെ ബിസിനസ് പോര്‍ട്ട്‌ഫോളിയോയില്‍ നിന്ന് ഒരു രാജ്യത്തെ പൂര്‍ണമായും നീക്കം ചെയ്തു. അനില്‍ അംബാനി കമ്പനിയായ റിലയന്‍സ് പവര്‍ നടത്തിയ ഒരു പ്രധാന നീക്കമാണ് നിക്ഷേപകരെയും, വിപണികളെയും ഒരുപോലെ അമ്പരപ്പിച്ചിരിക്കുന്നത്. അഞ്ച് ഇന്തോനേഷ്യന്‍ കല്‍ക്കരി കമ്പനികളിലെ 100% ഓഹരികളാണ് കമ്പനി കൈയ്യൊഴിഞ്ഞത്. ഇതുവഴി 12 മില്യണ്‍ ഡോളര്‍, ഏകദേശം 100 കോടി രൂപ അംബാനിയ്ക്ക് ലഭിച്ചതായാണ് വിവരം.
പ്രസ്തുത വമ്പന്‍ ഡീലിനെ പറ്റി കമ്പനി തന്നെയാണ് റെഗുലേറ്ററി ഫയലിംഗില്‍ വ്യക്തമാക്കിയത്. റിലയന്‍സ് പവറിന്റെ അനുബന്ധ സ്ഥാപനങ്ങളായ റിലയന്‍സ് പവര്‍ നെതര്‍ലാന്‍ഡ്സ് ബിവിയും, റിലയന്‍സ് നാച്ചുറല്‍ റിസോഴ്സസ് (സിംഗപ്പൂര്‍) പ്രൈവറ്റ് ലിമിറ്റഡും ചേര്‍ന്ന് ബയോട്രസ്റ്റര്‍ (സിംഗപ്പൂര്‍) പ്രൈവറ്റ് ലിമിറ്റഡുമായാണ് ധാരണയുണ്ടാക്കിയിരിക്കുന്നത്. ഈ കരാറോടെ റിലയന്‍സ് പവര്‍ ഇന്തോനേഷ്യന്‍ വിപണി കൂടിയാണ് ഒഴിവാക്കുന്നത്.
അഞ്ച് ഇന്തോനേഷ്യല്‍ കല്‍ക്കരി കമ്പനികളിലെ ഓഹരികളാണ് റിലയന്‍സ് പവര്‍ വില്‍ക്കുന്നത്. പി ടി അവ്നിഷ് കോള്‍ റിസോഴ്സസ്, പി ടി ഹെരംബ കോള്‍ റിസോഴ്സസ്, പി ടി സുമുഖ കോള്‍ സര്‍വീസസ്, പി ടി ബ്രയാന്‍ ബിന്റാങ് ടിഗ എനര്‍ജി, പി ടി ശ്രീവിജയ ബിന്റാങ് ടിഗ എനര്‍ജി എന്നിവയാണ് ഈ കമ്പനികള്‍. കമ്പനികളിലെ മുഴുവന്‍ ഓഹരികളും വില്‍ക്കാന്‍ തീരുമാനിച്ചതായി റിപ്പോര്‍ട്ടുകള്‍ വ്യക്തമാക്കുന്നു. ഇന്നലെ (2025 സെപ്റ്റംബര്‍ 29) പ്രസ്തുത കരാര്‍ ഒപ്പുവച്ചെന്നാണ് വിവരം. നിബന്ധനകള്‍ക്കു വിധേയമായി 2025 ഡിസംബര്‍ 30 ഡീല്‍ പൂര്‍ത്തിയാക്കുമെന്നാണ് വിവരം.
റിപ്പോര്‍ട്ടുകള്‍ പ്രകാരം ഈ പിന്‍മാറ്റം റിലയന്‍സ് പവറിനെ യാതൊരു തരത്തിലും ബാധിക്കാന്‍ സാധ്യതയില്ല. കാരണം കഴിഞ്ഞ സാമ്പത്തിക വര്‍ഷത്തില്‍ (2024- 25) ഈ ഇന്തോനേഷ്യന്‍ അനുബന്ധ സ്ഥാപനങ്ങള്‍ ഒരു വരുമാനവും ഉണ്ടാക്കിയിട്ടില്ല. ഈ ആസ്തികള്‍ റിലയന്‍സ് പവറിന്റെ ഏകീകൃത അറ്റാദായമായ 16,909 ലക്ഷം രൂപയുടെ 0.53% മാത്രമേ സൂചിപ്പിക്കുന്നുള്ളൂ. അതിനാ്യ തന്നെ ഈ ആസ്തികള്‍ റിലയന്‍സ് പവറിന് പ്രാധാന്യമുള്ളതല്ല. എന്നാല്‍ നിലവില്‍ ഡീല്‍ വഴി കൈവരുന്ന 100 കോടി രൂപ കമ്പനിക്ക് നേട്ടമാണ്.
ഇടപാടില്‍ വാങ്ങലുകാരായ ബയോട്രസ്റ്റര്‍ (സിംഗപ്പൂര്‍) പ്രൈവറ്റ് ലിമിറ്റഡിന് റിലയന്‍സ് പവറിന്റെ പ്രൊമോട്ടര്‍ ഗ്രൂപ്പുമായി യാതൊരു ബന്ധവുമില്ലെന്ന് അധികൃതര്‍ ഇതോടകം വ്യക്തമാക്കിയിട്ടുണ്ട്. അതിനാല്‍ തന്നെ ഈ ഇടപാട് ഒരു ബന്ധപ്പെട്ട കക്ഷി ഇടപാടുമല്ല. ഇടപാട് സെബിയുടെ ലിസ്റ്റിംഗ് ഒബ്ലിഗേഷന്‍സ് ആന്‍ഡ് ഡിസ്‌ക്ലോഷര്‍ റിക്വയര്‍മെന്റുകളുടെ (LODR) റെഗുലേഷന്‍ 37A പ്രകാരമുള്ള ഡൗണ്‍ പേയ്മെന്റിനോ, ക്രമീകരണത്തിനോ ബാധകമല്ലെന്നതും നിക്ഷേപകര്‍ അറിയേണ്ടതുണ്ട്.
