അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.വീട്ടിൽ വഴുതനങ്ങ ഉണ്ടോ? എങ്കിൽ ഉച്ചയ്ക്ക് ഊണിന് ഒരു കിടിലൻ കറി ഉണ്ടാക്കാം. ഈ കറി മാത്രം മതി വയറുനിറയെ ചോറുണ്ണാം. എങ്ങനെ തയ്യാറാക്കാമെന്ന് നോക്കിയാലോ?
ആവശ്യമായ ചേരുവകൾ
- വഴുതനങ്ങ: 4 എണ്ണം (കഷ്ണങ്ങളാക്കിയത്)
- സവാള: 1 എണ്ണം (നീളത്തിൽ അരിഞ്ഞത്)
- പച്ചമുളക്: 2-3 എണ്ണം
- വെളുത്തുള്ളി: 2 അല്ലി (ചതച്ചത്)
- തക്കാളി: 1 എണ്ണം (അരിഞ്ഞത്)
- മഞ്ഞൾപ്പൊടി: 1 ടീസ്പൂൺ
- മുളകുപൊടി: ½ ടേബിൾസ്പൂൺ
- ജീരകം പൊടിച്ചത്: 1 ടീസ്പൂൺ
- പുളി: ഒരു നാരങ്ങ വലുപ്പത്തിൽ (വെള്ളത്തിൽ കുതിർത്തത്)
- വേപ്പില: 2 തണ്ട്
- കടുക്: ½ ടീസ്പൂൺ
- ചെറിയ ഉള്ളി: 4-5 എണ്ണം (നീളത്തിൽ അരിഞ്ഞത്)
- ഉണക്കമുളക്: 2-3 എണ്ണം
- വെളിച്ചെണ്ണ: 2 ടേബിൾസ്പൂൺ
- ഉപ്പ്: ആവശ്യത്തിന്
- വെള്ളം: ആവശ്യത്തിന്
തയ്യാറാക്കുന്ന വിധം
ഒരു മൺചട്ടിയിൽ 1 ടേബിൾസ്പൂൺ വെളിച്ചെണ്ണ ഒഴിച്ച് സവാള, ചതച്ച വെളുത്തുള്ളി, പച്ചമുളക് എന്നിവ ചേർത്ത് മീഡിയം തീയിൽ വഴറ്റുക. സവാള വഴന്ന ശേഷം മഞ്ഞൾപ്പൊടി, മുളകുപൊടി എന്നിവ ചേർത്ത് 1 മിനിറ്റ് വഴറ്റുക. തക്കാളിയും വേപ്പിലയും ചേർത്ത് നന്നായി വഴറ്റി, ചട്ടി അടച്ച് 2 മിനിറ്റ് വേവിക്കുക. തക്കാളി വെന്ത ശേഷം, പൊടിച്ച ജീരകവും കഷ്ണങ്ങളാക്കിയ വഴുതനങ്ങയും ചേർത്ത് ഉപ്പ് ഇട്ട് ഇളക്കുക. വഴുതനങ്ങ വാടിവരുമ്പോൾ, കുതിർത്ത പുളി പിഴിഞ്ഞ വെള്ളവും ആവശ്യത്തിന് ചൂടുവെള്ളവും ചേർത്ത് അടച്ചുവെച്ച് 5-7 മിനിറ്റ് വേവിക്കുക. ഒരു പാനിൽ 1 ടേബിൾസ്പൂൺ വെളിച്ചെണ്ണ ചൂടാക്കി കടുക്, ചെറിയ ഉള്ളി, ഉണക്കമുളക്, വേപ്പില എന്നിവ താളിച്ച് കറിയിലേക്ക് ഒഴിക്കുക. കറി നന്നായി വെന്ത ശേഷം തീ ഓഫ് ചെയ്ത് ചൂടോടെ സെർവ് ചെയ്യുക.
