അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ദക്ഷിണ കൊറിയൻ ടെക് ഭീമനാണ് സാംസങ്. ഇപ്പോഴിതാ ആദ്യത്തെ ട്രൈ-ഫോൾഡ് സ്‍മാർട്ട്‌ഫോണുമായി ഒരു പുതു ചരിത്രം കുറിക്കാൻ ഒരുങ്ങുകയാണ് സാംസങ്. ഈ വർഷം അവസാനത്തോടെ സാംസങിന്‍റെ ട്രൈ-ഫോൾഡിംഗ് സ്മാർട്ട്ഫോൺ അവതരിപ്പിക്കപ്പെടും എന്നാണ് പുറത്ത് വരുന്ന റിപ്പോർട്ടുകൾ സൂചിപ്പിക്കുന്നത്.
2025 ഒക്‌ടോബര്‍ 31 മുതൽ നവംബർ 1ന് വരെ ദക്ഷിണ കൊറിയയിലെ ജിയോങ്‌ജുവിൽ നടക്കാനിരിക്കുന്ന ഏഷ്യ-പസഫിക് സാമ്പത്തിക സഹകരണ (APEC) ഉച്ചകോടിയിൽ സാംസങ് ഗാലക്‌സി സ്സെഡ് ട്രൈ-ഫോൾഡ് സ്മാർട്ട്ഫോൺ പ്രദർശിപ്പിച്ചേക്കാമെന്നാണ് ദക്ഷിണ കൊറിയയിലെ യോൻഹാപ്പ് ന്യൂസ് ഏജൻസി റിപ്പോർട്ട് ചെയ്യുന്നത്.
അതേസമയം സാംസങിന്‍റെ ട്രൈ-ഫോൾഡ് സ്മാർട്ട്ഫോൺ കമ്പനിയുടെ നിലവിലുള്ള ബുക്ക്-സ്റ്റൈൽ ഫോൾഡബിൾ ഗാലക്‌സി സ്സെഡ് സീരീസ് സ്‌മാർട്ട്‌ഫോണുകളിൽ നിന്നുള്ള ഒരു പരിണാമം ആയിരിക്കുമെന്ന് പ്രതീക്ഷിക്കുന്നു.
കൂടാതെ ഈ സ്‍മാർട്ട്ഫോണിന് ഗാലക്‌സി സ്സെഡ് ട്രൈഫോൾഡ് എന്ന് പേരിടാണ് സാധ്യത. ഏറെ പ്രതീക്ഷയോടെ കാത്തിരിക്കുന്ന ഈ ഹാൻഡ്‌സെറ്റ് പൂർണ്ണമായും തുറക്കുമ്പോൾ ജി-സ്റ്റൈൽ ഇൻവേർഡ് ഫോൾഡിംഗ് ഡിസൈനും 9.96 ഇഞ്ച് ഡിസ്‌പ്ലേയും ഉണ്ടായിരിക്കുമെന്ന് പ്രതീക്ഷിക്കുന്നു.
വരാനിരിക്കുന്ന ഉപകരണത്തിന് മൂന്ന് ഭാഗങ്ങളായി മടക്കാവുന്ന ഒരു ജി-സ്റ്റൈൽ ഡിസൈൻ ഭാഷ ഉണ്ടായിരിക്കാൻ സാധ്യതയുണ്ട്. പൂർണ്ണമായും നിവർത്തിയ രൂപത്തിൽ 9.96 ഇഞ്ച് സ്‌ക്രീനും മടക്കിയ രൂപത്തിൽ 6.54 ഇഞ്ച് ഡിസ്‌പ്ലേയും ഉണ്ടായിരിക്കുമെന്നും അഭ്യൂഹമുണ്ട്.
കൂടാതെ ഇതിൻ്റെ സവിശേഷത സിലിക്കൺ-കാർബൺ ബാറ്ററിയാണ്. സ്‌നാപ്ഡ്രാഗൺ 8 എലൈറ്റ് ചിപ്പും 200 മെഗാപിക്‌സൽ പ്രൈമറി സെൻസർ അടങ്ങുന്ന ട്രിപ്പിൾ ക്യാമറ യൂണിറ്റും ഈ ഫോണിൽ ഉണ്ടാകും.
