അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.മലയാള സിനിമയ്ക്ക് പുത്തൻ മാനം നൽകിയ സിനിമയാണ് ലോക ചാപ്റ്റർ 1 ചന്ദ്ര. റെക്കോർഡുകൾ സൃഷ്ടിക്കുകയും അത് സ്വയം തകർക്കുന്ന ഒരു പ്രവണതയാണ് ലോക എന്ന സിനിമയിലൂടെ മലയാളി പ്രേക്ഷകർ കാണുന്നത്. ബോക്സ് ഓഫീസില്‍ വണ്ടര്‍ വുമണായി മാറുകയാണ് ചന്ദ്ര. ആഗോള കളക്ഷനില്‍ നേരത്തെ തന്നെ ലോക മുന്നിലെത്തിയിരുന്നു. 300 കോടിയാണ് ചിത്രം ആഗോള തലത്തില്‍ നേടിയത്. കേരളത്തില്‍ നിന്ന് മാത്രം 119 കോടിയാണ് ലോക കളക്ട് ചെയ്തത്.
മലയാളം ഇൻഡസ്ട്രി ഹിറ്റ്, ഏറ്റവും കൂടുതൽ കളക്ഷൻ നേടിയ ഡബ്ബ് ചിത്രം, തെലുങ്കിൽ ഏറ്റവും ഉയർന്ന കളക്ഷൻ, ആഗോളതലത്തിൽ ഏറ്റവും കൂടുതൽ മാർക്കറ്റ് ഷെയർ, ബുക്ക് മൈ ഷോയിൽ ഏറ്റവും കൂടുതൽ ടിക്കറ്റുകൾ വിറ്റ റെക്കോർഡ്, ഏറ്റവും കൂടുതൽ ആളുകൾ തിയേറ്ററിൽ എത്തിയ റെക്കോർഡ്, ആദ്യ 300 കോടി നേടിയ മലയാള ചിത്രം. എന്നിങ്ങനെ നിരവധി റെക്കോർഡുകളാണ് ലോക ഈ 38 ദിവസങ്ങൾക്ക് ഉള്ളിൽ നേടിയിരിക്കുന്നത്.
കല്യാണി പ്രിയദര്‍ശന്‍ നായികയായ ചിത്രം ഡൊമിനിക് അരുണാണ് സംവിധാനം ചെയ്തത്. ദുല്‍ഖര്‍ സല്‍മാന്‍റെ ഉടമസ്ഥതയിലുള്ള വേഫെറര്‍ ഫിലിംസാണ് ലോക നിര്‍മിച്ചത്. ചിത്രം മലയാളത്തിലെ പുതിയ സൂപ്പര്‍ഹീറോ ഫ്രാഞ്ചൈസിയിലെ ആദ്യ ഭാഗമായിരുന്നു. ഓണം റിലീസ് ആയി ഓഗസ്റ്റ് 28 നാണ് ചിത്രം എത്തിയത്. വന്‍ മൗത്ത് പബ്ലിസിറ്റിയിലൂടെ കേരളത്തിന് പുറത്തുള്ള ഇന്‍ഡസ്ട്രികളിലും ലോക ചര്‍ച്ചയായിരുന്നു.
അതിനിടെ, റിലീസ് ചെയ്ത് ഏതാനും ആഴ്ച പിന്നിട്ടപ്പോൾ ലോക ഒടിടിയിൽ വരുന്നെന്ന അഭ്യൂഹങ്ങൾ വന്നു. എന്നാൽ ഈ വാർത്തകളെല്ലാം തള്ളിയ ദുൽഖർ, ലോകയെ തിയറ്റർ റണ്ണിന് തന്നെ വിട്ടു. ആ തീരുമാനം പാഴായില്ലെന്ന് മാത്രമല്ല, പുത്തൻ നാഴികകല്ലിലേക്ക് ആണ് ചിത്രത്തിന്റെ പോക്കും.
അഞ്ച് ഭാഗങ്ങൾ ഉള്ള ഒരു വമ്പൻ ഫാന്റസി സിനിമാറ്റിക് യൂണിവേഴ്‌സിലെ ആദ്യ ഭാഗമായി എത്തിയ ഈ ബിഗ് ബഡ്ജറ്റ് ചിത്രത്തിൽ ചന്തു സലിംകുമാർ, അരുൺ കുര്യൻ, ശരത് സഭ, നിഷാന്ത് സാഗർ, വിജയരാഘവൻ എന്നിവരും തിളങ്ങിയിട്ടുണ്ട്. ഇവർക്കൊപ്പം ദുൽഖർ സൽമാൻ, ടോവിനോ തോമസ്, സണ്ണി വെയ്ൻ എന്നിവരുടെ ത്രസിപ്പിക്കുന്ന അതിഥി വേഷവും ശ്രദ്ധ നേടി. ചിത്രത്തിന്റെ രണ്ടാം ഭാഗം പ്രഖ്യാപിച്ചുകൊണ്ടുള്ള ടീസർ കഴിഞ്ഞ ദിവസം അണിയറപ്രവർത്തകർ പുറത്തുവിട്ടിരുന്നു.
അതേസമയം കേരളത്തില്‍ ഏറ്റവുമധികം കളക്ഷന്‍ സ്വന്തമാക്കിയ ചിത്രം എന്ന മോഹന്‍ലാല്‍ ചിത്രം തുടരുമിന്‍റെ റെക്കോര്‍ഡ് ലോക ചാപ്റ്റര്‍ വണ്‍; ചന്ദ്ര തകര്‍ത്തു.
