അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ബോളിവുഡിലെ കിങ് ഖാൻ ഷാരൂഖ് ഖാൻ നായകനായ ‘ജവാൻ’ എന്ന ബ്രഹ്മാണ്ഡ ചിത്രത്തിലേക്ക് തനിക്ക് ക്ഷണം ലഭിച്ചിരുന്നുവെന്ന് വെളിപ്പെടുത്തി നടൻ നീരജ് മാധവ്. എന്നാൽ, ചിത്രത്തിൽ തനിക്കായി മാറ്റിവെച്ച കഥാപാത്രത്തോട് താൽപര്യമില്ലാത്തതിനാലും, അഭിനയ സാധ്യതകൾ കുറവായതിനാലും ആ അവസരം വേണ്ടെന്ന് വെക്കുകയായിരുന്നുവെന്നും അദ്ദേഹം തുറന്നു പറഞ്ഞു.
‘ഫാമിലി മാൻ’ എന്ന വെബ് സീരീസിലൂടെ രാജ്യമെമ്പാടും ശ്രദ്ധ നേടിയ ശേഷം നിരവധി അന്യഭാഷാ പ്രൊജക്റ്റുകൾ നീരജിനെ തേടിയെത്തിയിരുന്നു. അക്കൂട്ടത്തിലാണ് അറ്റ്‌ലി സംവിധാനം ചെയ്ത ‘ജവാനി’ലെ വേഷവും വന്നത്. അഭിമുഖത്തിലാണ് ഈ കാര്യം നീരജ് വെളിപ്പെടുത്തിയത്.
“ഷാരൂഖ് ഖാൻ ചിത്രത്തിലേക്ക് വിളിച്ചു, പക്ഷേ ആ കഥാപാത്രം എനിക്ക് വലുതായിട്ട് ഒന്നും ചെയ്യാനില്ലാത്തതുകൊണ്ട് ഞാൻ വേണ്ടെന്ന് വെച്ചതാണ്. അതൊരു ചെറിയ കഥാപാത്രമായിരുന്നു,” നീരജ് വ്യക്തമാക്കി. ഷാരൂഖ് ഖാൻ്റെ സിനിമയിൽ വെറുതെ നിന്നാൽ പോലും അത് വലിയ കാര്യമാണെന്ന് പലരും പറഞ്ഞിരുന്നു. എന്നാൽ താൻ കേവലം ഒരു ‘സൗത്ത് ഇന്ത്യൻ’ നടൻ എന്ന ലേബലിൽ, ചെറിയ വേഷങ്ങളിൽ മാത്രം ഒതുങ്ങിപ്പോകാൻ ആഗ്രഹിക്കുന്നില്ലെന്നും അദ്ദേഹം സൂചിപ്പിച്ചു.
താരമൂല്യമുള്ള വലിയ സിനിമകളിൽ ചെറിയ വേഷങ്ങൾ ചെയ്യുന്നതിനേക്കാൾ, അഭിനയ പ്രാധാന്യമുള്ള കഥാപാത്രങ്ങൾ ചെയ്യാനാണ് തനിക്ക് താൽപര്യമെന്ന വ്യക്തമായ നിലപാടാണ് നീരജ് മാധവ് സ്വീകരിച്ചത്. ‘ജവാൻ’ വേണ്ടെന്ന് വെച്ചതിനെ ആരെങ്കിലും അഹങ്കാരമായി കണ്ടേക്കാം. എങ്കിലും ഒരു നടനെന്ന നിലയിൽ തൻ്റെ കരിയറിന് ഗുണകരമാകുന്ന റോളുകൾ മാത്രമേ തിരഞ്ഞെടുക്കൂ എന്ന ഉറച്ച തീരുമാനത്തിലാണ് നീരജ്.
