അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.അറബിക്കടലിൽ ഒരു തുറമുഖം നിർമിക്കാൻ കൂടെ നിൽക്കണമെന്ന് യു.എസിനോട് പാകിസ്ഥാന്റെ ആവശ്യം. ബലൂചിസ്ഥാനിലെ ഗ്വാദർ ജില്ലയിലെ പാസ്നി എന്ന നഗരത്തിലാണ് തുറമുഖം നിർമിക്കാനുള്ള നീക്കം. ഇന്ത്യയും, ഇറാനും ചേർന്ന് നിർമിക്കുന്ന ഇറാനിലെ ചബഹാർ തുറമുക്കത്തിന് സമീപമുള്ള തന്ത്രപ്രധാനമായ സ്ഥലമാണിത്.
വലിയ ആരോഗ്യ ആനുകൂല്യങ്ങൾ, ചെറിയ വില- ടൈംസ് ഹെൽത്ത് ഉപയോഗിച്ച് നിങ്ങളുടെ യോഗ യാത്ര പ്രതിമാസം ₹250 എന്ന നിരക്കിൽ ആരംഭിക്കൂ
പാകിസ്ഥാൻ സൈനിക മേധാവി അസിം മുനീർ, ഉന്നത യു.എസ് ഉദ്യോഗസ്ഥരെ ഇക്കാര്യം ആവശ്യപ്പെട്ട് സമീപിച്ചതായിട്ടാണ് റിപ്പോർട്ടുകൾ. 1.2 ബില്യൺ ഡോളറിന്റെ ഓഫറാണ് മുന്നോട്ട് വെച്ചിരിക്കുന്നത്. നിർദ്ദിഷ്ട തുറമുഖത്തിൽ യു.എസ് ഒരു ടെർമിനൽ നിർമിക്കുകയും, ഓപ്പറേറ്റ് ചെയ്യുകയും വേണമെന്ന് ബ്ലൂ പ്രിന്റിൽപറയുന്നു. പാസ്നിയിലെ പാകിസ്ഥാന്റെ മിനറൽസ് കൊണ്ടു വരാനാണിത്. അഫ്ഗാനിസ്ഥാന്റെയും, ഇറാന്റെയും അതിർത്തിക്ക് സമീപമാണ് ഈ നഗരം സ്ഥിതി ചെയ്യുന്നത്
സെപ്റ്റംബറിൽ പാകിസ്ഥാൻ പ്രധാനമന്ത്രി ഷെഹബാസ് ഷെരീഫ്, സൈനിക മേധാവി അസിം മുനീർ എന്നിവർ യു.എസ് പ്രസിഡന്റ് ഡൊണാൾഡ് ട്രംപുമായി അടച്ചിട്ട മുറിയിൽ ചർച്ചകൾ നടത്തിയിരുന്നു. ഇതിന് പിന്നാലെയാണ് പാകിസ്ഥാന്റെ നീക്കം.
അടുത്തിടെയാണ് ചബഹാർ തുറമുഖത്തിനുള്ള ഉപരോധ ഇളവുകൾ യു.എസ് പിൻവലിച്ചത്. ഇത് ഇറാനെ ലക്ഷ്യം വെച്ചുള്ളതാണെങ്കിലും ഫലത്തിൽ തുറമുഖം വികസിപ്പിക്കുന്ന ഇന്ത്യയ്ക്ക് തിരിച്ചടിയാണ്. റഷ്യൻ ഇന്ധനത്തിന്റെ കാര്യത്തിൽ ഇന്ത്യയുമായി യു.എസ് ഇടഞ്ഞു നിൽക്കുകയുമാണ്. ഈ ‘കലക്ക വെള്ളത്തിൽ മീൻ പിടിക്കാനാണ്’ പാകിസ്ഥാൻ ശ്രമിക്കുന്നതെന്ന് നയതന്ത്ര രംഗത്തെ വിദഗ്ധർ കരുതുന്നു.
ട്രംപുമായുള്ള യോഗത്തിൽ യു.എസിലെ മൈനിങ് & എനർജി സെക്ടർ കമ്പനികളിൽ നിന്ന് പാകിസ്ഥാൻ നിക്ഷേപത്തിനുള്ള ക്ഷണം മുന്നോട്ടു വെച്ചിരുന്നു. ഇതേത്തുടർന്ന് ഒരു യു.എസ് മെറ്റൽ കമ്പനി പാകിസ്ഥാനുമായി 500 മില്യൺ ഡോളറിന്റെ ഇൻവെസ്റ്റ്മെന്റ് കരാറിൽ ഏർപ്പെട്ടിരുന്നു. നിർണായകമായ ധാതു ഖനനം സംയുക്തമായി നടത്തുകയും, ഇത് പാകിസ്ഥാന്റെ ഡിഫൻസ്, ടെക്നോളജി മേഖലകളിൽ ഉപയോഗപ്പെടുത്തുകയാണ് ലക്ഷ്യം.
പാകിസ്ഥാനിലെ ധാതു നിക്ഷേപത്തിൽ ട്രംപിന് കണ്ണുണ്ടെന്നും റിപ്പോർട്ടുകളുണ്ട്. നേരത്തെ, ജോ ബൈഡൻ യു.എസ് പ്രസിഡന്റായിരുന്ന സമയത്ത് യു.എസ് പാകിസ്ഥാനോട് അകലം പാലിച്ചിരുന്നു. എന്നാൽ ട്രംപ് പ്രസിഡന്റായതോടെ ആ സ്ഥിതി മാറിയിരിക്കുന്നു.
നിലവിൽ പാകിസ്ഥാൻ നിർദ്ദേശിച്ച തുറമുഖം യു.എസിന് സൈനിക ആവശ്യങ്ങൾക്കായും ഉപയോഗിക്കാൻ സാധിക്കും. കൂടാതെ ഈ തുറമുഖവും പാകിസ്ഥാന്റെ ധാതു സമ്പന്നമായ പടിഞ്ഞാറൻ പ്രദേശങ്ങളും തമ്മിൽ ഒരു റെയിൽവെ ശൃംഘല നിർമിക്കാനും പാകിസ്ഥാൻ യു.എസിന്റെ സഹായം തേടും
ഇത്തരമൊരു തുറമുഖം വരുന്നതോടെ ഇറാൻ, മധ്യേഷ്യ എന്നിവിടങ്ങളിലേക്ക് യു.എസ് വ്യാപാരം എളുപ്പമാകും. അറബിക്കടലിലും, മധ്യേഷ്യയിലും യു.എസിന്റെ സ്വാധീനം വർധിക്കാനും ഇത് കാരണമാകും. ഫലത്തിൽ ഇത് ഇന്ത്യയ്ക്ക് തിരിച്ചടിയാകും.
