അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.കോടികളുടെ ആസ്തിയുള്ള ഓട്ടോ ഡ്രൈവറാണ് ഇപ്പോൾ സമൂഹ മാധ്യമങ്ങളിൽ ചർച്ചയാകുന്നത്. നാലഞ്ച് കോടി രൂപ വിലമതിക്കുന്ന രണ്ടു വീടുകളും ആപ്പിൾ വാച്ചും എയർ പോഡുമുള്ള ഇയാളുടെ മാസവരുമാനം മൂന്നു ലക്ഷം രൂപവരെയാണത്രെ. ബെംഗളുരുവിലാണ് ഈ കോടീശ്വരനായ ഓട്ടോഡ്രൈവറുള്ളത്. എഞ്ചിനീയർ ആകാശ് ആനന്ദാനിയാണ് ഈ ഓട്ടോ ഡ്രൈവറെ കുറിച്ച് സമൂഹ മാധ്യമത്തിലൂടെ വെളിപ്പെടുത്തിയിരിക്കുന്നത്. താൻ യാത്ര ചെയ്ത ഓട്ടോയിലെ ഡ്രൈവർ പങ്കുവച്ച ഞെട്ടിക്കുന്ന കാര്യങ്ങൾ ആകാശ് ആനന്ദാനി സോഷ്യൽമീഡിയയിൽ കുറിക്കുകയായിരുന്നു.
ഓട്ടോ ഓടിക്കുന്ന ഡ്രൈവറുടെ കൈയ്യിലെ ആപ്പിൾ വാച്ചും എയർ പോഡും ശ്രദ്ധിച്ചതിന് പിന്നാലെയാണ് അദ്ദേഹത്തെ കുറിച്ചുള്ള കൂടുതൽ വിവരങ്ങൾ ആകാശ് ചോദിച്ചു മനസിലാക്കിയത്. ഓട്ടോറിക്ഷ ഡ്രൈവർക്ക് 4-5 കോടി വിലമതിക്കുന്ന രണ്ട് വീടുകൾ സ്വന്തമായുണ്ടെന്നും പ്രതിമാസം രണ്ട് മുതൽ മൂന്ന് ലക്ഷം രൂപ വരെ സമ്പാദിക്കുന്നുണ്ടെന്നും ആകാശ് എക്സിൽ പങ്കുവെച്ച പോസ്റ്റിൽ പറയുന്നു. വീടുകൾ വാടകയ്ക്ക് നൽകിയിരിക്കുകയാണെന്നും ഇതൊന്നും കൂടാതെ, ഒരു എഐ സ്റ്റാർട്ടപ്പിൽ അദ്ദേഹം നിക്ഷേപം നടത്തിയിട്ടുണ്ടെന്നും ആകാശ് കുറിപ്പിൽ കൂട്ടിച്ചേർത്തു. അദ്ദേഹത്തിൻറെ ആദ്യ ജോലി ഓട്ടോ ഓടിക്കുകയായിരുന്നു. അത് അദ്ദേഹം നിർത്താൻ തയാറല്ലെന്നും ആകാശ് പറയുന്നുണ്ട്.
ആനന്ദിൻറെ കുറിപ്പിങ്ങനെ:
‘ബെംഗളൂരു വളരെ വിചിത്രമായ നഗരമാണ്. ഓട്ടോക്കാരനായ ഭയ്യക്ക് രണ്ട് വീടുകളുണ്ട്. 4 -5 കോടി വിലമതിക്കുന്നതാണ്. രണ്ട് വീടുകളും വാടകയ്ക്ക് കൊടുത്തിരിക്കുന്നതിനാൽ മാസം രണ്ട്- മൂന്ന് ലക്ഷം രൂപ വരെ ലഭിക്കുന്നുണ്ട്. കൂടാതെ, ഒരു എഐ സ്റ്റാർട്ടപ്പിൻറെ സ്ഥാപകനും ഇൻവെസ്റ്ററുമാണ്’.
ആനന്ദിന്റെ പോസ്റ്റ് വന്നതിനു പിന്നാലെ നിരവധിയാളുകളാണ് കമൻറുമായി രംഗത്തെത്തിയത്. നിരവധിയാളുകൾ അദ്ദേഹത്തിൻറെ അധ്വാനത്തെ പ്രശംസിക്കുന്നുണ്ട്. എന്നാൽ, ഇതെല്ലാം കെട്ടിച്ചമച്ച കഥയാണെന്ന് മറ്റ് ചിലരുടെ അഭിപ്രായം. ഏതായാലും ആനന്ദിന്റെ പോസ്റ്റ് നിമിഷങ്ങൾക്കകം വൈറലായി.
