അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഇൻസ്റ്റാഗ്രാം ഉപയോക്താക്കൾക്കായി പുതിയൊരു ഫീച്ചർ കൂടി. ഇൻസ്റ്റാഗ്രാം ഉപയോക്താക്കൾക്ക് തങ്ങളുടെ അവസാന ലൊക്കേഷൻ സുഹൃത്തുക്കളുമായി പങ്കുവെക്കാനും ആ പരിസരത്തുള്ള സുഹൃത്തുക്കളെ കണ്ടെത്താനും സഹായിക്കുന്ന ഇൻസ്റ്റഗ്രാം മാപ്പ് ഫീച്ചർ ഇന്ത്യയിൽ അവതരിപ്പിച്ചു.
നേരത്തെ അമേരിക്കയിലും കാനഡയിലും അവതരിപ്പിച്ച ഈ ഫീച്ചർ ചില പരിഷ്കരണങ്ങളോടെയാണ് ഇപ്പോൾ ഇന്ത്യൻ ഉപയോക്താക്കൾക്ക് ലഭ്യമാക്കിയിരിക്കുന്നത്. ഉപയോക്താക്കളുടെ സ്വകാര്യത ഉറപ്പാക്കിക്കൊണ്ടുള്ള മാറ്റങ്ങൾ വരുത്തിയാണ് ഇന്ത്യയിൽ ഇത് അവതരിപ്പിച്ചിരിക്കുന്നത്.
ലൊക്കേഷൻ ടാഗ് ചെയ്യുന്നതും ലൈവ് ലൊക്കേഷൻ പങ്കിടുന്നതും തമ്മിലുള്ള ആശയക്കുഴപ്പം ഇൻസ്റ്റാഗ്രാം പരിഹരിക്കുന്നുണ്ട്. ഒരു പോസ്റ്റിലോ സ്റ്റോറിയിലോ റീലിലോ ലൊക്കേഷൻ ടാഗ് ചെയ്യുന്നത് വഴി മറ്റൊരാൾക്ക് ലൈവ് ലൊക്കേഷൻ ലഭ്യമാകില്ല എന്ന് അധികൃതർ വ്യക്തമാക്കി.
ഉപയോക്താവ് ലൊക്കേഷൻ ടാഗ് ചെയ്യുമ്പോൾ അത് മാപ്പിൽ എങ്ങനെയാണ് കാണുകയെന്നതിന്റെ പ്രിവ്യൂ ഇൻസ്റ്റാഗ്രാം ഇപ്പോൾ കാണിക്കും. ഇത് ലൊക്കേഷൻ ടാഗുകൾ കാണിക്കുന്നതിലുള്ള നിയന്ത്രണം വർദ്ധിപ്പിക്കുമെന്നാണ് പ്രതീക്ഷ.
സവിശേഷതകൾ എന്തൊക്കെ ?
സുഹൃത്തുക്കളെ കണ്ടെത്താം: ലൊക്കേഷൻ പങ്കുവെക്കുന്നതിലൂടെ സമീപത്തുള്ള സുഹൃത്തുക്കളെ മാപ്പിൽ കണ്ടെത്താൻ സാധിക്കും.
പോസ്റ്റുകളും റീലുകളും: ഒരു പ്രത്യേക സ്ഥലം/ലൊക്കേഷൻ ടാഗ് ചെയ്‌തിട്ടുള്ള പോസ്റ്റുകൾ, റീലുകൾ, സ്റ്റോറികൾ എന്നിവ എളുപ്പത്തിൽ കാണാൻ കഴിയും.
സ്വകാര്യത: ലൊക്കേഷൻ ഷെയറിങ് ഓപ്ഷൻ എപ്പോൾ വേണമെങ്കിലും ഓഫ് ചെയ്യാനുള്ള സൗകര്യം ലഭ്യമാണ്. ലൊക്കേഷൻ പങ്കുവെക്കുമ്പോഴും സ്വകാര്യത ഉറപ്പാക്കുന്നുണ്ടെന്ന് ഇൻസ്റ്റാഗ്രാം അധികൃതർ അറിയിച്ചു.
ഈ ഫീച്ചർ, സുഹൃത്തുക്കളുമായി കണക്റ്റ് ചെയ്യാനുള്ള പുതിയ മാർഗ്ഗമാണ് എന്നാണ് ഇൻസ്റ്റാഗ്രാം അധികൃതർ വിശേഷിപ്പിക്കുന്നത്. ഉപഭോക്താവിന്റെ ലൊക്കേഷൻ ആക്റ്റീവാണോ അല്ലയോ എന്നറിയാൻ കഴിയുന്ന ഒരു സൂചന മാപ്പിന്റെ മുകൾഭാഗത്ത് ദൃശ്യമാകും. ഷെയറിങ് ഡിസേബിൾ ചെയ്‌തിട്ടുണ്ടെങ്കിൽ, അത് നോട്‌സ് ട്രേയിൽ പ്രൊഫൈൽ ഫോട്ടോയുടെ താഴെയായി കാണാം.
