അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഒരു ചൂട് ചായ കുടിച്ചാൽ കിട്ടുന്ന ഉണർവ് ഒന്ന് വേറെ തന്നെയാണ്. നമ്മളുടെ പണ്ടുമുതലുള്ള ശീലം അങ്ങനെയാണ്. മിക്കവരുടെയും ദിവസം ഒരു ചൂട് ചായയിലാണ് ആരംഭിക്കുന്നത്. തണുത്ത ചായ കുടിക്കാൻ ഒട്ടുമിക്കപേർക്കും മടിയാണ്. ചായ തണുത്തുപോയാൽ പലരും വീണ്ടും ചൂടാക്കി കുടിക്കാറുണ്ട്. എന്നാൽ സ്ഥിരമായി ഇങ്ങനെ ചെയ്യുന്നത് ആരോഗ്യത്തിന് ഏതെങ്കിലും രീതിയിൽ ഹാനികരമാണോ എന്ന സംശയം പലർക്കും ഉണ്ട്. ശാസ്ത്രീയ പഠനങ്ങൾ അനുസരിച്ച് ചായ വീണ്ടും ചൂടാക്കുന്നത് അപകടകരമല്ല, പക്ഷേ ഗുണനിലവാരം കുറഞ്ഞേക്കാം.
വീണ്ടും ചൂടാക്കുമ്പോൾ ചായ്ക്കുണ്ടാകുന്ന മാറ്റങ്ങൾ:-
ചായയിലെ പ്രധാന ആൻ്റീഓക്സിഡൻ്റ് സംയുക്തങ്ങളായ കാറ്റെച്ചിനുകൾ (catechins), പോളിഫിനോളുകൾ (polyphenols) എന്നിവ ചൂടിനോട് റിയാക്ട് ചെയ്യുന്നവയാണ്. 85°C-120°C വരെ ചൂടാക്കുന്നത് അപകടകരമല്ലെങ്കിലും ഈ ആന്റി-ഓക്സിഡന്റുകളുടെ അളവ് കുറയാനിടയുണ്ട്.
ചായ വീണ്ടും ചൂടാക്കുമ്പോൾ അതിന്റെ രുചി, നിറം, മണം എന്നിവയും മാറും. പഠനങ്ങൾ പ്രകാരം തണുത്ത ചായ 85°C-യ്ക്ക് മുകളിലായി ചൂടാക്കിയാൽ മണവും നിറവും കുറയുകയും കയ്പ്പും ആസിഡിറ്റിയും വർധിക്കുകയും ചെയ്യുന്നു.
ചായ വീണ്ടും ചൂടാക്കുന്നത് നിർജലീകരണത്തിന് കാരണമാകും. കാരണം, ചായയിൽ കഫീൻ അടങ്ങിയിട്ടുണ്ട്, അമിതമായി വേവിക്കുമ്പോൾ കഫീന്റെ സാന്ദ്രത വർധിക്കുന്നു.
ചായ വീണ്ടും ചൂടാക്കുന്നത് അസിഡിറ്റിക്കും വയറുമായി ബന്ധപ്പെട്ട പ്രശ്നങ്ങൾക്കും കാരണമാകും. തേയില ഇലകൾ അമിതമായി വേവിക്കുമ്പോൾ, അവ അസിഡിറ്റി സ്വഭാവമുള്ളതായി മാറുന്നു. ഈ അസിഡിക് സംയുക്തം നെഞ്ചെരിച്ചിൽ, ആസിഡ് റിഫ്ലക്സ് എന്നിവയ്ക്ക് കാരണമാകും.
തണുത്ത ചായ വീണ്ടും തിളക്കുന്ന തരത്തിൽ ചൂടാക്കുന്നില്ലെങ്കിൽ അപകട സാധ്യത കുറവാണ്. എന്നാൽ ചായ മണിക്കൂറുകളോളം സാധാരണ താപനിലയിൽ വെച്ചാൽ ബാക്ടീരിയ വളരാൻ സാധ്യതയുണ്ട്. അതിനാൽ തയ്യാറാക്കിയ ഉടനെ ചായ കുടിക്കുന്നതാണ് ഉചിതം
