അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.വീട്ടിലെ അംഗങ്ങൾ എല്ലാം ഉപയോഗിക്കുന്നതിനാൽ പലപ്പോഴും ടോയ്‌ലറ്റുകൾ വൃത്തികേടാകാനും അണുക്കൾ ഉണ്ടാകാനും സാധ്യതയുണ്ടെന്ന് നമുക്ക് അറിയാം. ഇതിന് വേണ്ട പ്രതിവിധികളും നാം തേടാറുണ്ട്. എന്നാൽ ടോയ്‌ലറ്റിൽ മാത്രമല്ല നമ്മുടെ വീട്ടിൽ നാം നിരന്തരം പ്രയോഗിക്കുന്ന പല വസ്തുക്കളിലും ഒരു പക്ഷെ ടോയ്‌ലറ്റിൽ ഉള്ളതിലും അധികം അണുക്കൾ ഉണ്ടാകാൻ ഇടയുണ്ട്. അവ ഏതൊക്കെയാണെന്ന് നോക്കിയാലോ?
തലയിണയുടെ കവർ മാറ്റാറില്ലേ? എന്നാൽ ഇക്കാര്യങ്ങൾ പ്രത്യേകം ശ്രദ്ധിച്ചോളൂ:
തലയിണയിൽ വിയർപ്പും എണ്ണമയവും അണുക്കളും ധാരാളം ഉണ്ടാകുന്നു. ദിവസവും ഇത് അടിഞ്ഞുകൂടുകയും ദുർഗന്ധം ഉണ്ടാവാനും അണുക്കൾ പടരാനും കാരണമാകുന്നു. അതിനാൽ തന്നെ ആഴ്ച്ചയിൽ ഒരിക്കലെങ്കിലും തലയിണ കവർ കഴുകി വൃത്തിയാക്കാൻ മറക്കരുത്.
മൊബൈൽ ഫോൺ
പോകുന്ന സ്ഥലങ്ങളിലൊക്കെ മൊബൈൽ ഫോണും കൊണ്ട് നടക്കുന്നവരാണ് നമ്മൾ. അതിനാൽ തന്നെ ഇതിൽ ധാരാളം അണുക്കളും ഉണ്ടാകുന്നു. വ്യക്തി ശുചിത്വത്തിൽ ഉൾപ്പെടുത്തേണ്ട ഒന്നാണ് മൊബൈൽ ഫോൺ. സ്വയം വൃത്തിയാകുന്നതുപോലെ തന്നെ മൊബൈൽ ഫോണും ഇടയ്ക്കിടെ വൃത്തിയാക്കി അണുവിമുക്തമാക്കാൻ ശ്രദ്ധിക്കണം.
ടി.വി റിമോട്ട്
ദിവസവും പലതവണകളിലായി മാറിമാറി ഉപയോഗിക്കുന്ന ഒന്നാണ് ടിവിയുടെ റിമോട്ട്. അതിനാൽ തന്നെ ഇതിൽ ധാരാളം അണുക്കളും ഉണ്ടാവുന്നു. ഇടയ്ക്കിടെ ഇത് വൃത്തിയാക്കി അണുവിമുക്തമാക്കുന്നത് നല്ലതായിരിക്കും. ഇല്ലെങ്കിൽ ഇതിലെ അണുക്കൾ മറ്റു വസ്തുക്കളിലും എളുപ്പം പടരും. അതേസമയം കഴുകി ഉപയോഗിക്കാൻ സാധിക്കുന്ന റിമോട്ട് കവർ ഉപയോഗിക്കുന്നതാണ് നല്ലത്.
അടുക്കള സ്പോഞ്ച്
പാത്രങ്ങൾ എളുപ്പത്തിൽ കഴുകി വൃത്തിയാക്കാൻ സഹായിക്കുന്ന ഒന്നാണ് സ്പോഞ്ച്. എന്നാൽ ഭക്ഷണാവശിഷ്ടങ്ങൾ പറ്റിയിരിക്കുമ്പോൾ അണുക്കൾ ഉണ്ടാവുകയും ഇത് പാത്രങ്ങളിൽ പടരുകയും ചെയ്യുന്നു. ഒരു സ്പോഞ്ച് തന്നെ ദീർഘകാലം ഉപയോഗിക്കുന്ന ശീലം ഒഴിവാക്കണം. മൂന്ന് ആഴ്ച്ച കൂടുമ്പോൾ പഴയത് മാറ്റി പുതിയത് വാങ്ങണം.
കട്ടിങ് ബോർഡ്
പച്ചക്കറിയും മത്സ്യവും മാംസവുമൊക്കെ മുറിക്കാൻ ഉപയോഗിക്കുന്ന ഒന്നാണ് കട്ടിങ് ബോർഡ്. ഭക്ഷണാവശിഷ്ടങ്ങൾ തങ്ങി നിൽക്കുമ്പോൾ കട്ടിങ് ബോർഡിൽ അണുക്കൾ ഉണ്ടാവുന്നു. അതിനാൽ തന്നെ ഉപയോഗം കഴിയുന്നതിന് അനുസരിച്ച് കട്ടിങ് ബോർഡ് കഴുകി അണുവിമുക്തമാക്കാൻ ശ്രദ്ധിക്കേണ്ടതുണ്ട്.
