അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പ്രതിപക്ഷ നേതാവ് വിഡി സതീശൻ മാധ്യമങ്ങളോട് സംസാരിക്കുന്ന ഒരു വീഡിയോ ഇപ്പോൾ സമൂഹമാധ്യമങ്ങളിൽ വൈറലാണ്. അദ്ദേഹം ബിജെപി സംസ്ഥാന അദ്ധ്യക്ഷൻ രാജീവ് ചന്ദ്രശേഖറിനെ പ്രശംസിച്ച് സംസാരിക്കുന്നു എന്ന രീതിയിലാണ് വീഡിയോ പ്രചരിക്കുന്നത്. രാജീവ് ചന്ദ്രശേഖർ ബിജെപി ഐഡിയോളജി ഉള്ളയാളാണെന്ന് താൻ കരുതുന്നില്ലെന്നും അദ്ദേഹം കഠിനാധ്വാനി ആണെന്നും അദ്ദേഹത്തിന്റെ കൂടെ കോൺഗ്രസ് ഉണ്ടെന്നും വിഡി സതീശൻ പറയുന്നതായി വീഡിയോയിൽ കാണാം.
എന്നാൽ, “മനസ്സിൽ ഉള്ള കാര്യങ്ങൾ ചിലപ്പോൾ ഞാൻ വിളിച്ചുപറയും. BJP അധ്യക്ഷൻ എന്റെ ചങ്കാണ്. ഞങ്ങൾ ഒന്നാണ് “. പ്രതിപക്ഷ നേതാവ് വിഡ്ഢിശൻ🤣🤣🤣🤣.” എന്ന തലകെട്ടോടെ വീഡിയോ എഡിറ്റഡ് ആണെന്ന് അന്വേഷണത്തിൽ കണ്ടെത്തി. 2025 മാർച്ച് 23ന് വിഡി സതീശൻ മാധ്യമങ്ങളോട് സംസാരിക്കുന്നതിനിടെ രണ്ട് വ്യത്യസ്ത ചോദ്യങ്ങൾക്ക് പറഞ്ഞ മറുപടികൾ ചേർത്താണ് ഇത് നിർമ്മിച്ചിരിക്കുന്നത്.
വൈറൽ വീഡിയോ സൂക്ഷ്മമായി പരിശോധിച്ചപ്പോൾ അതിൽ ചില ഭാഗങ്ങൾ കട്ട് ചെയ്ത് ചേർത്തിരിക്കുന്നതായി ശ്രദ്ധയിൽപ്പെട്ടു. ‘എന്തായാലും രാജീവ് ചന്ദ്രശേഖർ ബിജെപി ഐഡിയോളജി ഉള്ളയാളാണെന്ന് ഞാൻ കരുതുന്നില്ല’ എന്ന് പറഞ്ഞതിന് ശേഷമുള്ള ഭാഗമാണ് കട്ട് ചെയ്ത് ചേർത്തിരിക്കുന്നത്. പിന്നീടുള്ള ഭാഗത്താണ് ‘അത്രയും കഠിനാധ്വാനിയായിട്ടുള്ള ആളാണ്, ചിലപ്പോൾ നമുക്ക് അത്ഭുതം തോന്നും അതുപോലെ പ്രവർത്തിക്കുന്ന ആളാണ്…” എന്ന് തുടങ്ങുന്ന പ്രശംസകൾ ആരംഭിക്കുന്നത്. ഇതിൽ നിന്നും രാജീവ് ചന്ദ്രശേഖറിനെ കുറിച്ച് പറഞ്ഞ ഭാഗവും പ്രശംസയുടെ ഭാഗവും തമ്മിൽ ചേർത്താണ് വീഡിയോ നിർമ്മിച്ചിരിക്കുന്നതെന്ന് വ്യക്തമായി.
പിന്നീട് വൈറൽ വീഡിയോയിൽ പറഞ്ഞിരിക്കുന്ന കാര്യങ്ങളിൽ നിന്നുള്ള കീവേഡുകൾ ഉപയോഗിച്ച് തിരഞ്ഞപ്പോൾ 2025 മാർച്ച് 23ന് ന്യൂസ് 18 കേരള യൂട്യൂബിൽ പങ്കുവച്ച വീഡിയോ ലഭ്യമായി. ഈ വീഡിയോയുടെ തുടക്കത്തിൽ ഒരു മാധ്യമപ്രവർത്തക ‘ഈ പ്രസംഗത്തിൽ വളരെ വൈകാരികമായിട്ടാണ് കൊടിക്കുന്നിൽ സുരേഷ് പ്രതികരിച്ചത്, അദ്ദേഹത്തിന് ഇത്രയും സങ്കടമുണ്ടെന്ന് നിങ്ങൾക്ക് അറിയാമായിരുന്നോ’ എന്ന് ചോദിക്കുന്നുണ്ട്. ഇതിന് മറുപടി പറയുന്ന അവസരത്തിലാണ് വൈറൽ വീഡിയോയിലെ പ്രശംസിക്കുന്ന വാക്കുകൾ വിഡി സതീശൻ പറയുന്നത്.
കൊടിക്കുന്നിൽ സുരേഷിനെ കുറിച്ച് വിഡി സതീശൻ സംസാരിക്കുന്ന ദൃശ്യം ഉൾപ്പെടുന്ന റിപ്പോർട്ട് മീഡിയ വൺ മാർച്ച് 23ന് പങ്കുവച്ചിട്ടുണ്ട്. മാവേലിക്കരയിൽ കൂടുതൽ മത്സരിച്ചതിന് താൻ മാത്രം വേട്ടയാടപ്പെടുകയാണെന്ന് കൊടിക്കുന്നിൽ സുരേഷ് പറഞ്ഞുവെന്നും ഇതിന് മറുപടിയായിട്ടാണ് വിഡി സതീശൻ അദ്ദേഹത്തെ ചേർത്ത് നിർത്തിയിട്ടുണ്ടെന്ന് വ്യക്തമാക്കിയതെന്നും റിപ്പോർട്ടിൽ പറയുന്നു. റിപ്പോർട്ടിലുള്ള വിഡി സതീശന്റെ പ്രതികരണം തന്നെയാണ് വൈറൽ വീഡിയോയിലും ഉൾപ്പെടുത്തിയിരിക്കുന്നത്.
റിപ്പോർട്ടർ ടിവി മാർച്ച് 23ന് പങ്കുവച്ച വീഡിയോയിൽ വിഡി സതീശൻ കൊടിക്കുന്നിൽ സുരേഷിനെ കുറിച്ച് സംസാരിക്കുന്നതും പിന്നീട് രാജീവ് ചന്ദ്രശേഖർ ബിജെപി സംസ്ഥാന അദ്ധ്യക്ഷനായതിനെ കുറിച്ചുള്ള ചോദ്യത്തോട് പ്രതികരിക്കുന്നതും കാണാം. 2.33 മിനിറ്റ് ദൈർഘ്യമുള്ള വീഡിയോയുടെ 1.33 മിനിറ്റ് മുതലുള്ള ഭാഗത്താണ് ഈ പ്രതികരണം. ഈ ഭാഗത്താണ് രാജീവ് ചന്ദ്രശേഖർ അങ്ങനെ ബിജെപി ഐഡിയോളജിയുള്ളയാളാണെന്ന് താൻ കരുതുന്നില്ലെന്നും ലേറ്റ് എൻട്രിയാണല്ലോ എന്നുമാണ് അദ്ദേഹം പ്രതികരിച്ചത്.
ലഭ്യമായ വിവരങ്ങളിൽ നിന്നും വിഡി സതീശൻ രാജീവ് ചന്ദ്രശേഖറിനെ പ്രശംസിച്ച് സംസാരിച്ചു എന്ന രീതിയിൽ പ്രചരിക്കുന്ന വീഡിയോ എഡിറ്റഡാണെന്ന് വ്യക്തമായി.
