അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.എന്നും രാവിലെ എഴുന്നേൽക്കുമ്പോൾ മടിയോ, ഊർജക്കുറവോ, ചെറിയ ഒരു ക്ഷീണമോ ഒക്കെ അനുഭവപ്പെടുന്നവരാണോ നിങ്ങൾ? ഇത് വലിയ അസുഖമാണെന്നോർത്ത് പേടിക്കേണ്ട പരിഹാരമുണ്ട്. ഇനിമുതൽ കുതിര്‍ത്ത വാൽനട്ടും ഉണക്കമുന്തിരിയും കഴിക്കുന്നത് നിങ്ങൾ പതിവാക്കിക്കോളൂ നിങ്ങൾക്ക് ഉന്മേഷവും ഉണർവും ബുദ്ധിയുമെല്ലാം ഉണ്ടാകും. വാൽനട്ടും ഉണക്കമുന്തിരിയും നേരിട്ട് കഴിക്കാതെ, കുതിർത്ത ശേഷം കഴിക്കുന്നത് ദഹനവും പോഷകങ്ങളുടെ ആഗിരണവും മെച്ചപ്പെടുത്താൻ സഹായിക്കും.
വാൽനട്ടും ഉണക്കമുന്തിരിയും കുതിർത്ത് കഴിച്ചാലുള്ള ഗുണങ്ങൾ ഇതാണ്
വാൽനട്ടിൽ ഒമേഗ 3 ഫാറ്റി ആസിഡുകളും ആൻ്റിഓക്‌സിഡൻ്റുകളും ധാരാളമായി അടങ്ങിയിട്ടുണ്ട്, ഇത് തലച്ചോറിന്റെ ആരോഗ്യത്തിനും ഓർമശക്തിക്കും നല്ലതാണ്. ഉണക്കമുന്തിരിയിലുള്ള ബോറോൺ ശ്രദ്ധയും ഏകാഗ്രതയും വർദ്ധിപ്പിക്കാൻ സഹായിക്കുന്നു. അതേപോലെ, എല്ലുകളുടെ സാന്ദ്രത നിലനിർത്തുന്നതിന് ആവശ്യമായ കാൽസ്യം, മഗ്നീഷ്യം, ഫോസ്ഫറസ് എന്നിവയും ഉണക്കമുന്തിരിയിൽ അടങ്ങിയിട്ടുണ്ട്.
വാൽനട്ട് കുതിർക്കുന്നത്, അതിലെ ടാനിനുകൾ കുറയ്ക്കുകയും ദഹനം എളുപ്പമാക്കുകയും ചെയ്യുന്നു. ഇത് കുടലിലെ നല്ല ബാക്ടീരിയകളുടെ എണ്ണം വർദ്ധിപ്പിക്കുന്നു. ഉണക്കമുന്തിരി ഒരു പ്രീബയോട്ടിക് ആയി പ്രവർത്തിക്കുകയും കുടലിൻ്റെ പ്രവർത്തനങ്ങള്‍ മെച്ചപ്പെടുത്തുകയും ചെയ്യുന്നു.
എന്തെങ്കിലും ദോഷമുണ്ടോ?
വാൽനട്ടും ഉണക്കമുന്തിരിയും ദിവസവും കഴിക്കുന്നത് ആരോഗ്യത്തിന് നല്ലതാണെങ്കിലും, അമിതമായി കഴിക്കുമ്പോൾ ചില പാർശ്വഫലങ്ങൾ ഉണ്ടാകാൻ സാധ്യതയുണ്ട്.
ഉണക്കമുന്തിരിയിൽ കാലറിയും പ്രകൃതിദത്തമായ മധുരവും കൂടുതലായതുകൊണ്ട് അമിതമായി കഴിക്കുന്നത് ശരീരഭാരം വർദ്ധിപ്പിക്കാൻ ഇടയാക്കും. അതേപോലെ ണക്കമുന്തിരിയിൽ കീടനാശിനിയുടെ അംശങ്ങൾ ഉണ്ടാവാം. ഇത് ഒഴിവാക്കാൻ ഓർഗാനിക് ഉത്പന്നങ്ങൾ തിരഞ്ഞെടുക്കുന്നതാണ് ഉചിതം.
വാൽനട്ടില്‍ ആരോഗ്യകരമായ കൊഴുപ്പുകൾ ധാരാളമുണ്ടെങ്കിലും, ഇവയിൽ കലോറിയും കൂടുതലാണ്. അതുകൊണ്ട് ഇത് അമിതമായി കഴിക്കുന്നതും ശരീരഭാരം കൂടാൻ ഇടയാക്കും.
എങ്ങനെ തയാറാക്കാം?
ഒരു ദിവസത്തേക്ക് ഏകദേശം 4-5 വാൽനട്ടുകളും 10-15 ഉണക്കമുന്തിരിയും രാത്രി മുഴുവൻ വെള്ളത്തിൽ വെവ്വേറെ കുതിർക്കുക. പരമാവധി ഗുണം കിട്ടാന്‍ രാവിലെ വെറും വയറ്റിൽ ഇത് കഴിക്കുക. നേരിട്ട് കഴിക്കാതെ സാലഡ്, സ്മൂത്തി എന്നിവയില്‍ ചേര്‍ത്തും കഴിക്കാവുന്നതാണ്.
