അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.റഷ്യയിൽനിന്ന് എണ്ണ വാങ്ങുന്നത് ഇന്ത്യ നിർത്തുമെന്ന് പ്രധാനമന്ത്രി നരേന്ദ്ര മോദി തനിക്ക് ഉറപ്പുനൽകിയിട്ടുണ്ടെന്ന യു.എസ്. മുൻ പ്രസിഡന്റ് ഡോണൾഡ് ട്രംപിൻ്റെ വെളിപ്പെടുത്തലിന് പിന്നാലെ മോദിക്കെതിരെ രൂക്ഷവിമർശനവുമായി കോൺഗ്രസ് നേതാവ് രാഹുൽ ഗാന്ധി രംഗത്തു വന്നത്. പ്രധാനമന്ത്രി മോദിക്ക് ട്രംപിനെ ഭയമാണെന്നും, അതുകൊണ്ടാണ് റഷ്യൻ എണ്ണയുമായി ബന്ധപ്പെട്ട പ്രധാന തീരുമാനങ്ങൾ ട്രംപിനെക്കൊണ്ട് പ്രഖ്യാപിക്കാൻ അനുവദിക്കുന്നതെന്നും രാഹുൽ ആരോപിച്ചു.
മോദിയുടെ വിദേശനയത്തെയും ട്രംപുമായുള്ള ബന്ധത്തെയും ചോദ്യം ചെയ്താണ് രാഹുൽ ഗാന്ധി ‘എക്സി’ൽ കുറിച്ചത്. “പ്രധാനമന്ത്രി മോദിക്ക് ട്രംപിനെ ഭയമാണ്. ഇന്ത്യ റഷ്യൻ എണ്ണ വാങ്ങേണ്ടെന്നു തീരുമാനിക്കാനും അത് പരസ്യമായി പ്രഖ്യാപിക്കാനും അദ്ദേഹം ട്രംപിനെ അനുവദിക്കുന്നു. ആവർത്തിച്ചുള്ള അവഗണനകൾക്കിടയിലും അഭിനന്ദന സന്ദേശങ്ങൾ അയച്ചുകൊണ്ടിരിക്കുന്നു,” രാഹുൽ പറഞ്ഞു. റഷ്യൻ എണ്ണയുമായി ബന്ധപ്പെട്ട ട്രംപിൻ്റെ പ്രഖ്യാപനം, യുക്രെയ്‌നിലെ അധിനിവേശത്തെത്തുടർന്ന് റഷ്യയ്ക്കുമേലുള്ള സമ്മർദ്ദം വർധിപ്പിക്കാനുള്ള ‘വലിയ ചുവടുവയ്പ്പ്’ ആണെന്ന് ട്രംപ് വിശേഷിപ്പിച്ചതിന് തൊട്ടുപിന്നാലെയാണ് രാഹുലിൻ്റെ ഈ പ്രതികരണം.
ധനമന്ത്രിയുടെ യു.എസ്. സന്ദർശനം റദ്ദാക്കിയത്, ഷറം എൽ-ഷെയ്ഖ് (ഗാസ സമാധാനക്കരാർ ഒപ്പിട്ട സ്ഥലം) ഒഴിവാക്കിയത്, ‘ഓപ്പറേഷൻ സിന്ദൂറി’ൽ ട്രംപിനെ എതിർക്കാതിരുന്നത് എന്നിവയും രാഹുൽ ഗാന്ധി തൻ്റെ കുറിപ്പിൽ മോദിക്കെതിരെയുള്ള ആരോപണങ്ങളായി എടുത്തുപറഞ്ഞു.
കോൺഗ്രസ് ജനറൽ സെക്രട്ടറി ജയറാം രമേശും സമാനമായ ആരോപണങ്ങളുമായി സർക്കാരിനെതിരെ ആഞ്ഞടിച്ചു. ഇന്ത്യയുടെ സുപ്രധാന തീരുമാനങ്ങൾ പ്രധാനമന്ത്രി യു.എസിന് കൈമാറുന്നു എന്നാണ് അദ്ദേഹം വിമർശിച്ചത്. “ഇന്ത്യ ഓപ്പറേഷൻ സിന്ദൂർ നിർത്തിവച്ചതായി ആദ്യം പ്രഖ്യാപിച്ചത് യു.എസ്. സ്റ്റേറ്റ് സെക്രട്ടറി മാർക്കോ റൂബിയോ ആയിരുന്നു. പിന്നീട്, താരിഫുകളും വ്യാപാരവും സമ്മർദ്ദത്തിന്റെ ആയുധങ്ങളാക്കി ഓപ്പറേഷൻ സിന്ദൂർ തടയാൻ താൻ ഇടപെട്ടുവെന്ന് പ്രസിഡന്റ് ട്രംപ് 51 തവണ അവകാശപ്പെട്ടു. എന്നിട്ടും നമ്മുടെ പ്രധാനമന്ത്രി നിശബ്ദനായിരുന്നു,” ജയറാം രമേശ് ചൂണ്ടിക്കാട്ടി.
ഇപ്പോൾ, റഷ്യയിൽനിന്ന് എണ്ണ ഇറക്കുമതി ചെയ്യില്ലെന്ന് മോദി ഉറപ്പ് നൽകിയിട്ടുണ്ടെന്ന ട്രംപിൻ്റെ പ്രഖ്യാപനത്തെ രമേശ് പരിഹസിച്ചു: “പ്രധാനപ്പെട്ട തീരുമാനങ്ങൾ എടുക്കുന്നത് മോദി യു.എസിന് കൈമാറിയതായി തോന്നുന്നു. 56 ഇഞ്ച് നെഞ്ച് ചുരുങ്ങിപ്പോയി” – അദ്ദേഹം കൂട്ടിച്ചേർത്തു.
