അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ആലപ്പുഴ: അരൂർ മണ്ഡലത്തിൽ പത്തുവർഷംകൊണ്ട് പത്ത് പാലങ്ങൾ നിർമ്മിക്കാൻ സാധിച്ചു. അതിൽ 100 കോടി മുടക്കി നിർമ്മിക്കുന്ന സംസ്ഥാനത്തെ ഏറ്റവും വലിയ പാലമായ പെരുമ്പളവും ഉൾപ്പെടുന്നുവെന്നത് അഭിമാനകരമായ കാര്യമാണെന്ന് ദലീമ ജോജോ എംഎൽഎ പറഞ്ഞു. അരൂക്കുറ്റി ഗ്രാമപഞ്ചായത്തിൽ സംഘടിപ്പിച്ച വികസന സദസ്സ് വടുതല അബ്റാര്‍ ഓഡിറ്റോറിയത്തിൽ ഉദ്ഘാടനം ചെയ്തു സംസാരിക്കുകയായിരുന്നു എംഎൽഎ.
ഹൈടെക് ക്ലാസ് മുറികളോട് കൂടി നിരവധി സ്കൂൾ കെട്ടിടങ്ങളാണ് മണ്ഡലത്തിൽ യാഥാർത്ഥ്യമായത്. സ്മാർട്ട് അങ്കണവാടികൾ, മികച്ച നിലവാരത്തിലുള്ള റോഡുകൾ, മണ്ഡലത്തിലെ വിവിധ ഭാഗങ്ങളിൽ സ്ഥാപിച്ച വഴിവിളക്കുകൾ തുടങ്ങി കോടികളുടെ വികസന പ്രവർത്തനങ്ങളാണ് ചുരുങ്ങിയ കാലയളവിൽ അരൂർ മണ്ഡലത്തിന് ലഭിച്ചതെന്നും എംഎൽഎ പറഞ്ഞു.
പഞ്ചായത്തിലെ എല്ലാ വീടുകളിലും സ്ഥാപനങ്ങളിലും കുടിവെള്ളമെത്തിച്ചുകൊണ്ട് കുടിവെള്ള വിതരണത്തിൽ പൂർണ്ണത കൈവരിക്കാൻ കഴിഞ്ഞുവെന്നത് അഭിമാനകരമായ നേട്ടമാണെന്ന് പഞ്ചായത്തിന്റെ വികസന നേട്ടങ്ങളുടെ റിപ്പോർട്ട് അവതരിപ്പിച്ച് സെക്രട്ടറി പ്രീത വി പ്രഭു പറഞ്ഞു. ജലസമൃദ്ധ ഗ്രാമം എന്ന ലക്ഷ്യത്തിന്റെ ഭാഗമായി ജല ബജറ്റ് തയ്യാറാക്കി പ്രസിദ്ധീകരിച്ചതായും കാലാവസ്ഥ വ്യതിയാനവുമായി ബന്ധപ്പെട്ട പ്രശ്നങ്ങൾ പരിഹരിക്കുന്നതിനുള്ള വിഭവസ്രോതസ്സ് രൂപപ്പെടുത്തുന്നതിനായി സംസ്ഥാന സർക്കാർ ആവിഷ്കരിച്ച ഡി. കാറ്റ് പദ്ധതിക്ക് തുടക്കമിട്ടത് അരൂക്കുറ്റി ഗ്രാമപഞ്ചായത്തിലാണെന്നും പ്രോഗ്രാസ് റിപ്പോർട്ടിൽ പറയുന്നു. കഴിഞ്ഞ അഞ്ചുവർഷ കാലയളവിൽ 200 പേർക്ക് ലൈഫ് പദ്ധതിയിലുൾപ്പെടുത്തി വീടുകൾ നിർമ്മിച്ചു നൽകി. സ്വകാര്യ സ്‌കൂളുകളടക്കം പഞ്ചായത്തിലെ എല്ലാ സ്‌കൂളുകളിലും സാനിറ്ററി സമുച്ചയങ്ങൾ സ്ഥാപിച്ചതായും റിപ്പോർട്ടിൽ ചൂണ്ടിക്കാട്ടി.
സദസ്സില്‍ പഞ്ചായത്ത് പ്രസിഡന്റ് അഷറഫ് വെള്ളേഴത്ത് അധ്യക്ഷനായി. തൈക്കാട്ടുശ്ശേരി ബ്ലോക്ക് പഞ്ചായത്ത് പ്രസിഡന്റ് വി ആർ രജിത മുഖ്യപ്രഭാഷണം നടത്തി. റിസോഴ്സ് പെഴ്സണ്‍ സന്തോഷ് കുമാർ സംസ്ഥാന സർക്കാരിന്റെ വികസന നേട്ടങ്ങൾ അവതരിപ്പിച്ചു.
പഞ്ചായത്തിന്റെ വികസനനേട്ടങ്ങൾ ചിത്രീകരിച്ച വിഡീയേ സദസ്സിൽ പ്രദർശിപ്പിച്ചു മാധ്യമപ്രവർത്തകൻ പി.ആർ. സുമേരൻ പഞ്ചായത്തിന്റെ നിർമ്മാണത്തിലാണ് വിഡീയോ തയ്യാറാക്കിയത്.
ജില്ലാ പഞ്ചായത്തംഗം ബിനിത പ്രമോദ്, ബ്ലോക്ക് പഞ്ചായത്തംഗങ്ങളായ അനിമോൾ അശോകൻ, അനീസ്, പഞ്ചായത്ത് വൈസ് പ്രസിഡന്റ് സറീന ഹസൻ, സ്ഥിരംസമിതി അധ്യക്ഷരായ ഷൈജു രാജ്, അൻസില നിഷാദ്, പി എം ഷാനവാസ്, സിഡിഎസ് ചെയർപേഴ്സൺ ഷമീല ഹാഷിം, ആസൂത്രണ സമിതി ഉപാധ്യക്ഷൻ പി ശശിധരൻ നായർ, ജനപ്രതിനിധികളായ ടി. കെ മജീദ്, കെ. എ മാത്യു, പ്രകാശൻ വെള്ളപ്പനാട്ട്, മുംതാസ് സുബൈർ, ആഗി ജോസ്, വിദ്യാരാജ്, റാഹില ശാരി മനോജ്, മറ്റ് ഉദ്യോഗസ്ഥർ തുടങ്ങിയവർ പങ്കെടുത്തു. സദസ്സിന്റെ ഭാഗമായി വിവിധ മേഖലയിലെ വ്യക്തികളെ ആദരിച്ചു.
