അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.അന്തരിച്ച സിപിഎം നേതാവ് കോടിയേരി ബാലകൃഷ്ണന്റെ മകൻ ബിനീഷ് കോടിയേരി ബിജെപിയിൽ ചേരാൻ പോകുന്നു എന്ന രീതിയിൽ ചില വാർത്താ സ്ക്രീൻഷോട്ടുകൾ സമൂഹമാധ്യമങ്ങളിൽ പ്രചരിക്കുന്നുണ്ട്. 24 ന്യൂസിൻറെയും റിപ്പോർട്ടർ ടിവിയുടെയും ലോഗോ സഹിതമുള്ള വാർത്താ സ്ക്രീൻഷോട്ടുകളാണ് പ്രചരിക്കുന്നത്. ഇവയിൽ ബിനീഷ് കോടിയേരിയുടെ ചിത്രവും കാണാം.
“ബിനീഷ് കോടിയേരി സി.പി.എം വിടുന്നു
മുതിർന്ന ബി.ജെ.പി നേതാക്കളുമായി ചർച്ച നടത്തിയതായി സൂചന” എന്നെഴുതിയ 24 ന്യൂസിന്റെ ലോഗോയുള്ള സ്ക്രീൻഷോട്ട് ഉൾപ്പെടുന്ന ഫേസ്ബുക്ക് പോസ്റ്റാണ് സമൂഹ മാധ്യമങ്ങളിൽ നിറയുന്നത്.
എന്നാൽ, പ്രചരിക്കുന്ന വാർത്താ സ്ക്രീൻഷോട്ടുകൾ വ്യാജമാണെന്ന് അന്വേഷണത്തിൽ കണ്ടെത്തി. ഇവ വ്യാജമാണെന്ന് റിപ്പോർട്ടർ ടിവിയും 24 ന്യൂസും സ്ഥിരീകരിച്ചിട്ടുണ്ട്.
വൈറൽ സ്ക്രീൻഷോട്ടുകളിൽ അവകാശപ്പെടുന്നത് പോലെ ബിനീഷ് കോടിയേരി ബിജെപിയിലേക്ക് പോകുന്നത് സംബന്ധിച്ച വാർത്തകൾ ഉണ്ടോ എന്ന കാര്യമാണ് ഞങ്ങൾ ആദ്യം പരിശോധിച്ചത്. എന്നാൽ, ഇത്തരം റിപ്പോർട്ടുകളൊന്നും ലഭ്യമായില്ല. പിന്നീട് സ്ക്രീൻഷോട്ടുകൾ വിശദമായി പരിശോധിച്ചപ്പോൾ ഇവയിൽ ഉപയോഗിച്ചിരിക്കുന്ന ഫോണ്ടുകൾ സാധാരണ റിപ്പോർട്ടർ ടിവിയോ 24 ന്യൂസോ ഉപയോഗിക്കുന്ന രീതിയിലുള്ളവയല്ലെന്ന് വ്യക്തമായി.
റിപ്പോർട്ടർ ടിവിയുടെ സോഷ്യൽ മീഡിയ പേജുകൾ പരിശോധിച്ചപ്പോൾ പ്രചരിക്കുന്ന സ്ക്രീൻഷോട്ട് വ്യാജമാണെന്ന് വ്യക്തമാക്കി ഒക്ടോബർ 20ന് ഫേസ്ബുക്കിൽ പങ്കുവച്ച കാർഡ് ലഭ്യമായി. ബിനീഷ് കോടിയേരിയുമായി ബന്ധപ്പെട്ട് റിപ്പോർട്ടറിന്റെ പേരിൽ പ്രചരിക്കുന്ന സ്ക്രീൻഷോട്ട് വ്യാജം, നിയമനടപടി സ്വീകരിക്കും എന്നാണ് ഈ കാർഡിൽ എഴുതിയിരിക്കുന്നത്.
ലഭ്യമായ വിവരങ്ങളിൽ നിന്നും ബിനീഷ് കോടിയേരി ബിജെപിയിൽ ചേരുന്നുവെന്ന രീതിയിൽ പ്രചരിക്കുന്ന വാർത്താ സ്ക്രീൻഷോട്ടുകൾ വ്യാജമാണെന്ന് വ്യക്തമായി.
