അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഐസ്‌ക്രീം ഇഷ്ടമില്ലാത്തവർ ആരുണ്ട്? എന്നാൽ കടയിൽ നിന്ന് വാങ്ങുന്ന ഐസ്‌ക്രീമിലെ കൊഴുപ്പും, അമിതമായ പഞ്ചസാരയുമൊക്കെ ഓര്‍ത്ത് വേണ്ടെന്നു വച്ചിട്ടുണ്ടോ? എങ്കില്‍, ക്രീമോ പഞ്ചസാരയോ ചേർക്കാതെ, പച്ചത്തേങ്ങയുടെ തനത് രുചിയിൽ, ആരോഗ്യകരമായ ഒരു ഐസ്‌ക്രീം വീട്ടിൽത്തന്നെ ഉണ്ടാക്കിയാലോ, അതും ചിരട്ടയില്‍! ഈസിയായി തയ്യാറാക്കാവുന്ന ഒരു വെറൈറ്റി റെസിപ്പി ഇതാ.
ചേരുവകൾ:
നല്ല ഫ്രഷ് തേങ്ങ – 1
നേന്ത്രപ്പഴം നന്നായി പഴുത്തത് – 1 എണ്ണം
കശുവണ്ടിപ്പരിപ്പ് – ഒരു പിടി
ഈന്തപ്പഴ സിറപ്പ് – 2 ടേബിൾസ്പൂൺ (പഞ്ചസാരയ്ക്ക് പകരം മധുരത്തിനായി)
വാനില എസ്സെൻസ് – അര ടീസ്പൂൺ
തയാറാക്കുന്ന വിധം:
തേങ്ങ ഉടച്ച് ചിരകിയെടുക്കുക. ഈ തേങ്ങ ചെറിയ കഷണങ്ങളാക്കി കുറഞ്ഞ വെള്ളം ചേർത്ത് മിക്സിയിൽ നന്നായി അരച്ചെടുക്കണം. ശേഷം ഇത് അരിച്ചെടുത്ത്, കട്ടിയുള്ള തേങ്ങാപ്പാൽ മാറ്റിവെക്കുക. ഐസ്‌ക്രീമിന് കട്ടിയുള്ള പാൽ തന്നെ വേണം. മിക്സിയുടെ ജാറിലേക്ക് മാറ്റിവെച്ച തേങ്ങാപ്പാൽ, നന്നായി പഴുത്ത പഴം, കശുവണ്ടിപ്പരിപ്പ്, മധുരത്തിനായി എടുത്ത ഈന്തപ്പഴ സിറപ്പ്, ഒരൽപം വാനില എസ്സെൻസ് എന്നിവയെല്ലാം ഒരുമിച്ച് ചേർക്കുക. ഈ ചേരുവകൾ എല്ലാംകൂടി നല്ലതുപോലെ അടിച്ചെടുക്കണം. ഒരു തരിപോലും ഇല്ലാതെ, നല്ല സ്മൂത്തും ക്രീമിയുമായ ഒരു മിശ്രിതമായി ഇത് മാറും. അടിച്ച ശേഷം അപ്പോൾ തന്നെ ടേസ്റ്റ് ചെയ്ത് മധുരം പാകമാണോ എന്ന് ഉറപ്പാക്കാം. ഈ തയ്യാറാക്കിയ ഐസ്‌ക്രീം മിശ്രിതം, നന്നായി കഴുകി വൃത്തിയാക്കിയ ചിരട്ടയിലേക്ക് ശ്രദ്ധയോടെ ഒഴിക്കുക. ഐസ്‌ക്രീം നിറച്ച ചിരട്ട ഫ്രീസറിൽ വെച്ച് ഒരു രാത്രി മുഴുവൻ തണുപ്പിക്കുക. കുറഞ്ഞത് 8 മണിക്കൂറെങ്കിലും ഫ്രീസറിൽ വെച്ചാലേ നല്ല കട്ടിയുള്ള ഐസ്‌ക്രീം കിട്ടുകയുള്ളൂ. പിറ്റേന്ന് രാവിലെ ആരോഗ്യകരമായ ക്രീമി ഐസ്‌ക്രീം റെഡി!
