ഇത്രയും പഞ്ഞിപോലെ ഗോതമ്പ് കൊണ്ട് പുട്ട് ഉണ്ടാക്കാമോ?

രാവിലെ ബ്രേക്ക്ഫാസ്റ്റിനായി പെട്ടെന്നുണ്ടാക്കാൻ പറ്റുന്ന പലഹാരമാണ് പുട്ട്. ചിലർക്ക് പുട്ട് കഴിക്കാൻ തീരെ ഇഷ്ടമില്ല, എന്നാൽ കോമ്പിനേഷനായി കടലയും ചിക്കനും ബീഫുമൊക്കെയുണ്ടെ സംഗതി ഉഷാറായി. പുട്ട് പല വെറൈറ്റിയിലും തയാറാക്കാം. കറിപോലും വേണ്ടാതെ ചൂടോടെ കഴിക്കാൻ ബെസ്റ്റ് ഗോതമ്പ് പുട്ടാണ്. മയത്തോടെ ഗോതമ്പ് പുട്ട് ഉണ്ടാക്കാൻ പറ്റില്ലെന്നാണ് മിക്കവരുടെയും പരാതി. എന്നാൽ ഇനി ഗോതമ്പ് പുട്ട് ഇങ്ങനെ ഉണ്ടാക്കിനോക്കൂ. പഞ്ഞിപോലെ മയമുള്ളതായി തയാറാക്കാം.

ചേരുവകൾ

ഗോതമ്പ് – 1 കപ്പ്

തേങ്ങ ചിരകിയത് – 1 കപ്പ്

വെള്ളം – ആവശ്യത്തിന്

ഉപ്പ്–ആവശ്യത്തിന്

തയാറാക്കുന്ന വിധം

ഗോതമ്പ് നന്നായി കഴുകി വെള്ളം ഊറ്റി കളഞ്ഞ് എടുക്കുക. ശേഷം പുട്ട് കുറ്റിയിൽ ഗോതമ്പു നിറച്ചു 2 മിനിറ്റ് ആവി കയറ്റി എടുക്കാം.(പുട്ട് ഉണ്ടാക്കുന്ന രീതിയിൽ തന്നെ )ശേഷം ആവി കേറ്റിയ ഗോതമ്പു കുറ്റിയിൽ നിന്നും കുത്തി എടുത്തു ഒന്ന് നിരത്തി വയ്ക്കുക. പെട്ടെന്ന് ചൂടാറാൻ വേണ്ടിയാണ് ഇങ്ങനെ ചെയ്യുന്നത്.ശേഷം ചൂടാറിയ ഗോതമ്പ്, മിക്സിയുടെ പൊടിക്കുന്ന ജാറിൽ ഇട്ടു തരുതരുപ്പായി പൊടിച്ചെടുക്കുക. പൊടിച്ച ഗോതമ്പ് ഒരു ബൗളിൽ ഇടുക. ഇനി ഗോതമ്പിലേക്കു കുറച്ചു തേങ്ങാ ചിരകിയതും ഉപ്പും ചേർത്തു യോജിപ്പിക്കുക. കുറച്ചു വെള്ളവും തളിച്ചു കുഴച്ചു പുട്ടുപൊടിയുടെ പരുവത്തിലാക്കാം. പുട്ടുകുറ്റിയിൽ ചില്ലിട്ട ശേഷം പൊടിയും നാളികേരം ചിരകിയതും മാറി മാറി ഇടുക, ആവിയിൽ വേവിച്ചെടുക്കാം. നല്ല സോഫ്റ്റ് ഗോതമ്പു പുട്ട് തയാർ.