അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.മലയാളത്തിന്റെ മെഗാസ്റ്റാർ മമ്മൂട്ടി കൊച്ചിയിലേക്ക് തിരിച്ചെത്തി. ആരോഗ്യ പ്രശ്നങ്ങളെ തുടര്‍ന്ന് സിനിമയില്‍ നിന്ന് ഇടവേളയെടുത്ത അദ്ദേഹം നീണ്ട എട്ട് മാസങ്ങൾക്ക് ശേഷമാണ് കേരളത്തിലേക്ക് തിരിച്ചെത്തിയത്. നെടുമ്പാശ്ശേരി വിമാനത്താവളത്തിൽ വൻ സ്വീകരണമാണ് അദ്ദേഹത്തിന് ഒരുക്കിയത്.
മന്ത്രി പി രാജീവ് അടക്കമുള്ളവർ മമ്മൂട്ടിയെ സ്വീകരിക്കാൻ നെടുമ്പാശേരിയിൽ എത്തിയിരുന്നു. കഴിഞ്ഞ കുറച്ച് മാസങ്ങളായി ആരോഗ്യ സംബന്ധമായ അസുഖങ്ങളെ തുടർന്ന് നടൻ ചെന്നൈയിലെ അപ്പോളോ ആശുപത്രിയില്‍ ചികിത്സയിലായിരുന്നു. ആരോഗ്യം വീണ്ടെടുത്ത മമ്മൂട്ടി മഹേഷ് നാരായൺ സിനിമയുടെ സെറ്റിലേക്കാണ് ആദ്യം എത്തിയത്. സിനിമയുടെ ഹൈദരാബാദ് ഷൂട്ടിംഗ് പൂർത്തിയതിന് ശേഷം സംഘം യുകെയിലേക്ക് തിരിച്ചിരുന്നു. ഇപ്പോൾ യുകെയിൽ നിന്ന് കേരത്തിലെത്തിയിരിക്കുകയാണ് നടൻ.
നവാഗതനായ ജിതിന്‍ കെ ജോസ് സംവിധാനം ചെയ്യുന്ന ‘കളങ്കാവല്‍’ ആണ് മമ്മൂട്ടിയുടേതായി തിയറ്ററുകളിലെത്താനുള്ള ചിത്രം. കൊച്ചിയിൽ എത്തിയാൽ ഉടനെ മമ്മൂട്ടി ‘കളങ്കാവല്‍’ സിനിമ കാണുമെന്നും റിലീസ് പ്രഖ്യാപനം ഉണ്ടാകുമെന്നും റിപ്പോർട്ടുകൾ ഉണ്ടായിരുന്നു. ഓഗസ്റ്റ് അവസാനത്തോടെയോ സെപ്റ്റംബര്‍ ആദ്യമോ ആയിരിക്കും കളങ്കാവല്‍ റിലീസ് എന്നാണ് വിവരം. മമ്മൂട്ടി കമ്പനിയാണ് ഈ ചിത്രം നിര്‍മിക്കുന്നത്.
