അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.പത്തൊൻപത് വയസ്സുള്ള ശ്രീക്കുട്ടിയുടെ പ്രാരാബ്ധം നിറഞ്ഞ ജീവിതത്തിലേക്കാണ് വർക്കലയിൽ വെച്ചുണ്ടായ ട്രെയിൻ ആക്രമണം എന്ന ദുരന്തം ഇടിത്തീയായി പതിച്ചത്. ഒരു വർഷം മുൻപ് വിവാഹിതയായ ശ്രീക്കുട്ടി, എറണാകുളത്തുള്ള ഭർത്താവിനെ കണ്ടശേഷം പുലിയൂരിലെ വീട്ടിലേക്ക് മടങ്ങുന്ന വഴിയാണ് മദ്യലഹരിയിലായിരുന്ന സഹയാത്രികന്റെ ക്രൂരതയ്ക്ക് ഇരയായത്. സാമ്പത്തികമായി പിന്നാക്കം നിൽക്കുന്ന ഈ കുടുംബം ലൈഫ് ഭവനപദ്ധതിയിൽ ലഭിച്ച വീട് പണി പൂർത്തിയാക്കാനാവാതെ പ്രയാസപ്പെടുന്നതിനിടെയാണ് അപ്രതീക്ഷിതമായി ഈ ദുരന്തം സംഭവിച്ചത്.
തലയ്ക്കും നട്ടെല്ലിനും ഗുരുതരമായി പരിക്കേറ്റ ശ്രീക്കുട്ടി തിരുവനന്തപുരം മെഡിക്കൽ കോളേജ് ആശുപത്രിയിലെ തീവ്രപരിചരണ വിഭാഗത്തിൽ മരണത്തോട് മല്ലിടുകയാണ്. നിലവിൽ പെൺകുട്ടിക്ക് അപകടനില തരണം ചെയ്യാനായിട്ടില്ലെന്ന് മെഡിക്കൽ കോളേജ് സൂപ്രണ്ട് ഡോ. ജയചന്ദ്രൻ അറിയിച്ചു. തലച്ചോറിൽ ചതവ് ഉൾപ്പെടെയുള്ള ഗുരുതര പരിക്കുകളുണ്ട്. ന്യൂറോ വിഭാഗം ഉൾപ്പെടെയുള്ള വിദഗ്ദ്ധ ഡോക്ടർമാരുടെ കൂട്ടായ ചികിത്സയാണ് ശ്രീക്കുട്ടിക്ക് നൽകുന്നത്. സർജിക്കൽ ഐസിയുവിൽ കഴിയുന്ന പെൺകുട്ടിക്ക് ഇപ്പോഴും വെന്റിലേറ്ററിന്റെ സഹായം ആവശ്യമാണ്.
ചികിത്സയിൽ തൃപ്തരല്ലെന്നും മെച്ചപ്പെട്ട സൗകര്യങ്ങൾ ലഭ്യമാക്കണമെന്നും യുവതിയുടെ മുത്തശ്ശി പ്രകടിപ്പിച്ച ആശങ്കയോട് ആശുപത്രി അധികൃതർ പ്രതികരിച്ചു. പ്രഗത്ഭരായ ഡോക്ടർമാരാണ് ചികിത്സിക്കുന്നതെന്നും നിലവിൽ നൽകുന്നത് ഏറ്റവും മികച്ച പരിചരണമാണെന്നും ഡോ. ജയചന്ദ്രൻ വ്യക്തമാക്കി. തലയിലെ പരുക്കുകൾ ഭേദപ്പെട്ടു തുടങ്ങിയാൽ മാത്രമേ പുരോഗതിയെക്കുറിച്ച് വ്യക്തമാക്കാനാകൂ എന്നും അധികൃതർ സൂചിപ്പിച്ചു. അതേസമയം, വാർത്തകളിലൂടെയാണ് അമ്മ പ്രിയദർശിനി മകൾക്ക് അപകടം പറ്റിയ വിവരം അറിഞ്ഞ് ബെംഗളൂരുവിലെ ജോലിസ്ഥലത്തുനിന്ന് ആശുപത്രിയിലെത്തിയത്.
മനുഷ്യ മനസ്സാക്ഷിയെ ഞെട്ടിച്ച ഈ സംഭവത്തിൽ, പ്രതിയായ പനച്ചിമൂട് സ്വദേശി സുരേഷ് കുമാർ റെയിൽവേ പോലീസിന്റെ കസ്റ്റഡിയിലാണ്. എന്നാൽ, പിടിയിലായ ഉടൻ പ്രതി കുറ്റം നിഷേധിക്കുകയും പോലീസിനെ തെറ്റിദ്ധരിപ്പിക്കാൻ ശ്രമിക്കുകയും ചെയ്തു. തള്ളിയിട്ടത് ഒരു ബംഗാളിയാണെന്നും, താൻ മദ്യപിച്ചിട്ടില്ലെന്നും ഉൾപ്പെടെയുള്ള നുണകളാണ് സുരേഷ് പറഞ്ഞത്. പരിശോധനയിൽ മദ്യപിച്ചെന്ന് തെളിഞ്ഞിട്ടും പ്രതി നിഷേധിച്ചിരുന്നു.
എന്നാൽ, ശ്രീക്കുട്ടിയെ ചവിട്ടി പുറത്തിടുന്നത് സഹയാത്രികൻ മൊബൈലിൽ പകർത്തിയ ദൃശ്യങ്ങൾ പോലീസിന്റെ പക്കലുണ്ടെന്ന് പറഞ്ഞതോടെ സുരേഷ് കുമാർ അങ്കലാപ്പിലായി. ട്രെയിനിൽ ശ്രീക്കുട്ടിയോടൊപ്പമുണ്ടായിരുന്ന അർച്ചന, പ്രതിയുടെ ചിത്രം കണ്ട് തിരിച്ചറിഞ്ഞതോടെയാണ് സുരേഷ് കുറ്റം സമ്മതിച്ചത്. കോച്ചിനുള്ളിൽ വഴി തടസ്സപ്പെടുത്തിയതിനെ തുടർന്നുണ്ടായ വാക്കുതർക്കമാണ് ചവിട്ടാൻ കാരണമെന്നും പെൺകുട്ടിയാണ് പ്രകോപനം ഉണ്ടാക്കിയതെന്നും പറഞ്ഞ് ഇയാൾ ന്യായീകരിക്കാൻ ശ്രമിച്ചു.
കഴിഞ്ഞ രാത്രി കേരള എക്സ്പ്രസിൽ ആലുവയിൽ നിന്ന് തിരുവനന്തപുരത്തേക്കുള്ള യാത്രക്കിടെയാണ് ക്രൂരമായ അതിക്രമം നടന്നത്. ശുചിമുറി ഉപയോഗിക്കാൻ എത്തിയപ്പോൾ വാതിൽക്കൽ നിന്ന് മാറാത്തതിനെ ചൊല്ലിയുള്ള വാക്കുതർക്കമാണ് ആക്രമണത്തിൽ കലാശിച്ചത്. ശ്രീക്കുട്ടിയെ ചവിട്ടി പുറത്തിട്ടതിന് പിന്നാലെ യാത്രക്കാർ തന്നെയാണ് സുരേഷിനെ തടഞ്ഞു വെച്ച് പോലീസിന് കൈമാറിയത്. ശ്രീക്കുട്ടിക്കൊപ്പമുണ്ടായിരുന്ന അർച്ചനയെയും ഇയാൾ തള്ളിയിടാൻ ശ്രമിച്ചിരുന്നു.
പ്രതിയെ മജിസ്ട്രേറ്റിന് മുന്നിൽ ഹാജരാക്കി റിമാൻഡ് ചെയ്തു. വധശ്രമത്തിനാണ് സുരേഷ് കുമാറിനെതിരെ കേസെടുത്തിട്ടുള്ളത്. നിർധന കുടുംബത്തിലെ ഈ പെൺകുട്ടിക്ക് നീതിയും മികച്ച ചികിത്സയും ലഭിക്കാൻ നാടൊന്നാകെ പ്രാർത്ഥിക്കുകയാണ്.
