അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ന്യൂയോർക്ക് സിറ്റിയുടെ ആദ്യത്തെ മുസ്‌ലിം മേയറായി സൊഹ്‌റാൻ മംദാനി തെരഞ്ഞെടുക്കപ്പെട്ടതിന് പിന്നാലെ, ന്യൂയോർക്കിലെ ജൂതസമൂഹത്തോട് ഇസ്രായേലിലേക്ക് പലായനം ചെയ്യുന്നത് പരിഗണിക്കണമെന്ന് ഇസ്രായേൽ പ്രവാസികാര്യ മന്ത്രി അമിച്ചായ് ചിക്ലി ആഹ്വാനം ചെയ്തു. ന്യൂയോർക്കിലെ ക്വീൻസിൽ നിന്നുള്ള നിയമസഭാംഗമാണ് മംദാനി. ഈ തെരഞ്ഞെടുപ്പ് ഫലം, “എണ്ണമറ്റ ജൂത അഭയാർത്ഥികൾക്ക് സ്വാതന്ത്ര്യവും അവസരവും വാഗ്ദാനം ചെയ്ത ന്യൂയോർക്ക് നഗരത്തിന്റെ അടിത്തറയെ തന്നെ ഇളക്കുന്ന വഴിത്തിരിവാണിത്” എന്ന് ചിക്ലി അഭിപ്രായപ്പെട്ടു.
മംദാനിക്കെതിരെ രൂക്ഷമായ വിമർശനമാണ് ചിക്ലി ഉന്നയിച്ചത്. മംദാനിയെ ഒരു ‘ഹമാസ് പിന്തുണക്കാരൻ’ എന്ന് വിശേഷിപ്പിച്ച അദ്ദേഹം, തെക്കൻ ലെബനനിലെ വംശീയ ഉന്മൂലനത്തിനും അധിനിവേശത്തിനും ഗസ്സയിലെ കുടിയേറ്റങ്ങൾക്കും പിന്തുണ പ്രഖ്യാപിച്ച വ്യക്തിയാണ് താനെന്ന് കൂട്ടിച്ചേർത്തു. 9/11 ആക്രമണത്തെ പരാമർശിച്ചുകൊണ്ട്, മംദാനിയുടെ വീക്ഷണങ്ങൾ 25 വർഷം മുമ്പ് സ്വന്തം ആളുകളെ കൊലപ്പെടുത്തിയ ജിഹാദി തീവ്രവാദികളുടെ വീക്ഷണങ്ങളിൽ നിന്ന് ഒട്ടും അകലെയല്ലെന്നും ചിക്ലി ആരോപിച്ചു. ഈ സാഹചര്യത്തിൽ, “ന്യൂയോർക്കിലെ ജൂതന്മാർ ഇസ്രായേൽ നാട്ടിൽ തങ്ങളുടെ പുതിയ വീട് പണിയുന്നതിനെക്കുറിച്ച് ഗൗരവമായി പരിഗണിക്കണം” എന്നും അദ്ദേഹം കൂട്ടിച്ചേർത്തു.
മംദാനിയുടെ വിജയത്തിൽ ചിക്ലിയെ കൂടാതെ മറ്റ് നിരവധി ഇസ്രായേലി ഉദ്യോഗസ്ഥരും നിരാശ പ്രകടിപ്പിച്ചു. ഇസ്രായേൽ ദേശീയ സുരക്ഷാ മന്ത്രി ഇറ്റാമർ ബെൻ ഗ്വിർ തെരഞ്ഞെടുപ്പ് ഫലത്തെ ‘സാമാന്യബുദ്ധിക്ക് മേലുള്ള ജൂതവിരുദ്ധതയുടെ വിജയം’ എന്നാണ് വിശേഷിപ്പിച്ചത്. മംദാനിയുടെ വിജയം ന്യൂയോർക്കിലെ ജൂതസമൂഹത്തിന് സുരക്ഷാ ഭീഷണിയുയർത്തുമെന്ന ആശങ്കയും ഇസ്രായേലി മന്ത്രിമാർ പങ്കുവെച്ചു.
