അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.എക്‌സൈസ് മന്ത്രിയായിരിക്കെ ഖദർ മാറ്റി കാക്കി ധരിച്ച് കള്ളവാറ്റ് വിരുദ്ധ ഓപ്പറേഷനുകളിൽ പങ്കെടുത്ത ധീരനായകൻ. ഒരിക്കൽ രാഷ്ട്രീയ വേദികളിൽ വളരെ പെട്ടെന്ന് വളർന്നു വലുതായ ഒരു നേതാവ് പക്ഷേ അതേ വേഗത്തിൽ തന്നെ മറവിയിലേക്കും പോയി. അതായിരുന്നു എം.ആർ. രഘുചന്ദ്രബാൽ എന്ന കോൺഗ്രസുകാരന്റെ രാഷ്ട്രീയ ജാതകം. ആരെയും അമ്പരപ്പിക്കുംവിധം വളരുകയും അതേ വേഗതയിൽ തന്നെ വിസ്മൃതിയാലുകയും ചെയ്ത എം.ആർ. രഘുചന്ദ്രബാലിന്റെ ജീവിതം കേരള രാഷ്ട്രീയത്തിൽ സമാനതകളില്ലാത്തതാണ്.
പാറശ്ശാലയിൽ നിന്ന് 1991-ൽ കരുണാകരൻ മന്ത്രിസഭയിൽ എക്‌സൈസ് വകുപ്പിന്റെ ചുമതല ഏറ്റെടുത്തപ്പോൾ, കേരളത്തിലെ പലരും ഇതാരപ്പാ എന്ന് പരസ്പരം ചോദിച്ചു. എന്നാൽ, പിന്നീട് കേരളം കണ്ടത് വ്യാജച്ചാരായത്തിനെതിരെ പോരാടുന്ന ഒരു മന്ത്രിയെയാണ്. കള്ളവാറ്റ് വിരുദ്ധ യുദ്ധത്തിൽ രഘുചന്ദ്രബാൽ മുന്നണി യോദ്ധാവായി. കാടുകൾ കയറി, ചാരായച്ചാലുകൾ നീന്തി കള്ളവാറ്റുകാരെ പിടികൂടിയ കഥകൾ കേരള രാഷ്ട്രീയത്തിൽ പാണന്മാർ അന്ന് പാടിനടന്നു.
എന്നാൽ, അതേ വേഗത്തിൽ തന്നെ അദ്ദേഹത്തിന്റെ രാഷ്ട്രീയ ജീവിതവും മങ്ങുകയായിരുന്നു. 1996-ൽ പാറശ്ശാലയിൽ നിന്നു മത്സരിച്ചപ്പോൾ മുൻ മന്ത്രിയായിരുന്ന രഘുചന്ദ്രബാൽ മൂന്നാം സ്ഥാനത്തേക്ക് പതിച്ചു. സ്വതന്ത്ര സ്ഥാനാർത്ഥിയായ സുന്ദരൻ നാടാർ ആ വർഷം നേടിയ വിജയം കേരള രാഷ്ട്രീയത്തിലെ അത്ഭുതങ്ങളിലൊന്നായി രേഖപ്പെട്ടു. അതോടെ രഘുചന്ദ്രബാലിന്റെ രാഷ്ട്രീയജീവിതം അവസാനിച്ചു.
കുടുംബത്തിലെ ദാരുണ സംഭവവും പുതിയ വിവാദങ്ങളും
2022-ൽ രഘുചന്ദ്രബാലിന്റെ സഹോദരനും കാഞ്ഞിരംകുളം പഞ്ചായത്തിന്റെ മുൻ പ്രസിഡന്റുമായ രാജഗുരുബാൽ ആത്മഹത്യ ചെയ്ത സംഭവം വീണ്ടും അദ്ദേഹത്തെ വിവാദത്തിലാക്കി. ലൈബ്രറിയിലായിരുന്നു രാജഗുരുവിന്റെ ആത്മഹത്യ. മരണത്തിന് മുമ്പ് എഴുതിയ കുറിപ്പിൽ സഹോദരൻ രഘുചന്ദ്രബാൽ തന്നെ തന്റെയൊരുങ്ങിയ ആസ്തി പിടിച്ചുവാങ്ങിയെന്നും, കടംവാങ്ങി ജീവിക്കേണ്ട അവസ്ഥയിലെത്തിയെന്നും അദ്ദേഹം ആരോപിച്ചു.
“മരുന്നിനോ ഭക്ഷണത്തിനോ പണം ഇല്ല. ഇനി കഴിയില്ല. എന്റെ മൃതദേഹം തെരുവ് നായ്ക്കൾക്ക് എറിഞ്ഞുകൊടുക്കണം,” – ആത്മഹത്യാ കുറിപ്പിലെ ഈ വരികൾ സമൂഹമനസ്സിനെ നടുക്കി. കുടുംബത്തോടും സഹോദരനോടും ഉള്ള വിഷമവും അതിലൂടെ വെളിഞ്ഞു. പ്രശ്നം കെപിസിസിയുടെ ശ്രദ്ധയിൽ എത്തിയെങ്കിലും പരിഹാരമൊന്നും ഉണ്ടായില്ല. സ്വാതന്ത്ര്യസമര സേനാനിയായ പി. ഗോപിനാഥൻ നായരും ഇടപെടൽ ആവശ്യപ്പെട്ടിരുന്നു. എങ്കിലും വിഷാദം തീർന്നില്ല.
നാടകനടനും ഗാനരചയിതാവും ആയിരുന്ന രാഷ്ട്രീയക്കാരൻ
1950 മാർച്ച് 12ന് എം. രാഘവൻ നാടാറിന്റെയും കമല ഭായിയുടെയും മകനായി ജനിച്ച രഘുചന്ദ്രബാൽ രാഷ്ട്രീയത്തിലേയ്ക്ക് കടക്കുന്നതിനു മുൻപ് കലാരംഗത്തും സജീവനായിരുന്നു. ഗാനങ്ങൾ കമ്പോസ് ചെയ്യുകയും നാടകങ്ങൾ എഴുതുകയും അഭിനയിക്കുകയും ചെയ്തിരുന്നു. 1980-ൽ കോവളത്തു നിന്നും ആദ്യമായി എംഎൽഎയായി തിരഞ്ഞെടുക്കപ്പെട്ടു. 1982-ൽ തോൽവി നേരിട്ടെങ്കിലും 1991-ൽ പാറശ്ശാലയിൽനിന്ന് വിജയിച്ചു മന്ത്രിയായി.
എന്നാൽ, കരുണാകരൻ കാലത്തിനു ശേഷമുള്ള രാഷ്ട്രീയ പരിണാമങ്ങൾ അദ്ദേഹത്തെ പുറംതള്ളിയതോടെയാണ് രഘുചന്ദ്രബാലിന്റെ രാഷ്ട്രീയ യാത്ര അവസാനിച്ചത്. ഒരു കാലത്ത് “വീര്യമുള്ള മന്ത്രി” എന്നു വിശേഷിപ്പിക്കപ്പെട്ട രഘുചന്ദ്രബാൽ, ഇന്ന് ഓർമ്മകളിൽ മാത്രം നിലനിൽക്കുന്ന ഒരു രാഷ്ട്രീയ നിഴൽ — വേഗത്തിൽ ഉയർന്ന് അതേ വേഗത്തിൽ അപ്രത്യക്ഷമായ ഒരു കഥ.
