അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.തൈക്കാട് ഗവൺമെന്റ് മോഡൽ ബോയ്സ് ഹയർ സെക്കൻഡറി സ്കൂളിലെ പൂർവ്വ വിദ്യാർത്ഥി സംഗമം ‘തലമുറകളുടെ സംഗമവേദി’യായി മാറി. സ്കൂൾ ഓഡിറ്റോറിയത്തിൽ നടന്ന പരിപാടിയിൽ, മുതിർന്ന പൂർവ്വ വിദ്യാർത്ഥികളും, ഏറ്റവും പ്രായം കൂടിയ പൂർവ്വ അദ്ധ്യാപകരും ഒന്നിച്ച് ചേർന്ന് നിലവിളക്ക് കൊളുത്തിയതോടെ ചടങ്ങുകൾക്ക് ഔപചാരിക തുടക്കമായി. ചടങ്ങിന് മുന്നോടിയായി നടന്ന സ്കൂൾ അസംബ്ലി, വിയോഗാനന്തരം വന്ന പുതുതലമുറയ്ക്ക് പോലും ഗൃഹാതുരത്വമുണർത്തുന്ന ഓർമ്മയായി. സകുടുംബം സംഗമത്തിനെത്തിയ പൂർവ്വ വിദ്യാർത്ഥികൾ, തങ്ങൾ പഠിച്ചിറങ്ങിയ ക്ലാസ് മുറികളും, സ്കൂൾ മുറ്റത്തെ തലയുയർത്തി നിൽക്കുന്ന മഹാഗണി മരവും അടക്കമുള്ള പ്രിയപ്പെട്ട ഇടങ്ങൾ തങ്ങളുടെ കുടുംബാംഗങ്ങൾക്ക് ഏറെ സന്തോഷത്തോടെ പരിചയപ്പെടുത്തി. പലരും തങ്ങളുടെ ക്ലാസ് മുറികളിൽ സന്തോഷത്താൽ വിങ്ങി കരഞ്ഞത് സംഗമത്തിന് വികാരനിർഭരമായ അവസരങ്ങൾ സമ്മാനിച്ചു.
ഈ വർഷത്തെ സംഗമത്തിൽ ആർക്കിടെക്ട് എൻ. മഹേഷിനെ ആദരിച്ചത് ശ്രദ്ധേയമായി. മോഡൽ സ്കൂളിലെ പൂർവ്വ വിദ്യാർത്ഥിയായ അദ്ദേഹം, എഞ്ചിനീയറിംഗ് മേഖലയിൽ (ആർക്കിടെക്ചർ) 50 വർഷം തികച്ചാണ് സുത്യർഹമായ സേവനം പൂർത്തിയാക്കിയത്. കൂടാതെ, പൂർവ്വ അധ്യാപകരെയും 80 വയസ്സ് കഴിഞ്ഞ പൂർവ്വ വിദ്യാർത്ഥികളെയും ആദരിച്ചു. 1954-ൽ എസ്.എസ്.എൽ.സി. പാസായ ഗുരുനാഥ്, ശിവ സ്വാമി, മനോഹരൻ നായർ എന്നിവർക്ക് പ്രത്യേക ആദരവ് നൽകി.സംഗമത്തിന്റെ ഭാഗമായി നടന്ന പുസ്തക ശേഖരണ യജ്ഞം വലിയ വിജയമായി. പൂർവ്വ വിദ്യാർത്ഥികളും അഭ്യുദയകാംക്ഷികളും നൽകിയ ഏതാണ്ട് ആയിരത്തോളം പുസ്തകങ്ങൾ നിറച്ച ‘പുസ്തക വണ്ടി’, താളങ്ങളുടെ അകമ്പടിയോടുകൂടി സ്കൂൾ ലൈബ്രറിയിലേക്ക് എത്തിച്ചേർന്നു. പുസ്തക ശേഖരണ കമ്മറ്റി ഈ ശേഖരം സ്കൂൾ പ്രിൻസിപ്പൽ പ്രമോദ് കെ.യെ ഏൽപ്പിച്ചു.
പ്രശസ്ത സിനിമാതാരം നന്ദു, സൂര്യ കൃഷ്ണമൂർത്തി, കിരീടം ഉണ്ണി, പൂർവ്വ അധ്യാപകരെ പ്രതിനിധീകരിച്ച് സി. ബാലചന്ദ്രൻ എന്നിവർ യോഗത്തിൽ സംസാരിച്ചു. തുടർന്ന് മോഡൽ സ്കൂളിന് മുന്നിൽ പൂർവ്വ വിദ്യാർത്ഥികളും പൂർവ്വ അധ്യാപകരും പുതിയ തലമുറയിൽ പെട്ട കുട്ടികളും ഒത്തുചേർന്ന് എടുത്ത ഗ്രൂപ്പ് ഫോട്ടോ എല്ലാവർക്കും അവിസ്മരണീയമായ അനുഭവമായി മാറി. യോഗത്തിൽ ഡോ. എ സമ്പത്ത് അധ്യക്ഷത വഹിച്ചു. ഡോ. പ്രകാശ് പ്രഭാകർ സ്വാഗതവും ബിന്ദു ഐ. നന്ദിയും പറഞ്ഞു. മോഡൽ സ്കൂൾ വിദ്യാർത്ഥി നിരീഷിന്റെയും സംഘത്തിന്റെയും നാടൻ പാട്ട് അവതരണം ഈ വർഷത്തെ സംഗമത്തിന്റെ പ്രധാന പ്രത്യേകതയായി. തുടർന്ന് മോഡൽ സ്കൂൾ വിദ്യാർത്ഥികൾ അവതരിപ്പിച്ച കലാപരിപാടികൾ ഏറെ ആസ്വാദ്യകരമായിരുന്നു.
STORY HIGHLIGHT: thycaud-model-boys-hss-alumni-meet-articleshow
