അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.മുസ്ലിം ലീഗ് ഭരണത്തിലുള്ള കാസർകോട് നഗരസഭാ ഓഫീസ് കെട്ടിടത്തിന്റെ ചുറ്റുമതിലിന് പച്ച പെയിന്റ് അടിച്ചതിനെച്ചൊല്ലി രൂക്ഷമായ രാഷ്ട്രീയ വിവാദം. സിപിഎം ജില്ലാ കമ്മിറ്റി അംഗം കെ.എ. മുഹമ്മദ് ഹനീഫ നടത്തിയ വിവാദപരമായ പ്രതികരണമാണ് തർക്കത്തിന് തീ കൊളുത്തിയത്. “പച്ച പെയിന്റടിക്കാൻ ഇതെന്താ പാക്കിസ്താൻ ആണോ?” എന്നായിരുന്നു അദ്ദേഹത്തിന്റെ ചോദ്യം. ലീഗിന്റെ അപ്രമാദിത്വം സ്ഥാപിക്കാനും നാട്ടിൽ വർഗീയ ചേരിതിരിവ് സൃഷ്ടിക്കാനുമുള്ള ശ്രമമാണ് ഈ നടപടിക്ക് പിന്നിലെന്നും അദ്ദേഹം ആരോപിച്ചു.
മുഹമ്മദ് ഹനീഫ തന്റെ വിമർശനം കൂടുതൽ ശക്തമാക്കിക്കൊണ്ട്, രാജ്യത്തെ പ്രാദേശിക സ്ഥാപനങ്ങളിൽ എഴുപത് ശതമാനവും ഭരിക്കുന്നത് സിപിഎം ആണെങ്കിലും ഒരു മതിലിനും ചുവപ്പ് പെയിന്റ് അടിച്ചിട്ടില്ലെന്ന് ചൂണ്ടിക്കാട്ടി. ‘പൈസ തരണമെങ്കിൽ കാവി പെയിന്റ് അടിക്കണം’ എന്ന് പറയുന്ന പ്രധാനമന്ത്രി നരേന്ദ്രമോദിയുടെ അതേ നിലവാരത്തിലേക്ക് കാസർകോട്ടെ മുസ്ലിം ലീഗ് ഭരണകൂടം മാറിയെന്നും അദ്ദേഹം വിമർശിച്ചു.
നഗരസഭയിലെ വോട്ടർപട്ടികയിൽ ക്രമക്കേട് നടന്നതായി ആരോപിച്ച് സിപിഎം നടത്തിയ പ്രതിഷേധ പരിപാടിക്കിടെയാണ് മുഹമ്മദ് ഹനീഫ ഈ പരാമർശങ്ങൾ നടത്തിയത്. തദ്ദേശ തിരഞ്ഞെടുപ്പിന് മുന്നോടിയായുള്ള വോട്ടുചേർക്കൽ അവസരം മുതലെടുത്ത് മുസ്ലിം ലീഗ് വ്യാജ വോട്ടർമാരെ തിരുകിക്കയറ്റാൻ ശ്രമിക്കുന്നുവെന്ന് ആരോപിച്ചായിരുന്നു പ്രതിഷേധ മാർച്ച് സംഘടിപ്പിച്ചത്. തിരഞ്ഞെടുപ്പ് അട്ടിമറിക്കുകയെന്ന ലക്ഷ്യത്തോടെ നടത്തിയ നീക്കമാണിതെന്നും, ഇതേക്കുറിച്ച് വിശദമായ അന്വേഷണം വേണമെന്നും ആവശ്യപ്പെട്ട് കെ.എ. മുഹമ്മദ് ഹനീഫ കളക്ടർക്ക് പരാതി നൽകിയിട്ടുണ്ട്.
കാസർകോട് നഗരസഭയിലെ 22, 24 വാർഡുകളിലാണ് ഏറ്റവും കൂടുതൽ ക്രമക്കേട് നടന്നതായി സിപിഎം ആരോപിക്കുന്നത്. ഈ വാർഡുകളിൽ രണ്ട് ദിവസത്തിനുള്ളിൽ നൂറിലധികം അപേക്ഷകളാണ് ലഭിച്ചത്. ഹിയറിങ്ങിന് ശേഷം ഉദ്യോഗസ്ഥർ നേരിട്ട് പ്രദേശം സന്ദർശിച്ച് സ്ഥിരതാമസം ഇല്ലെന്ന് ഉറപ്പാക്കി മുൻപ് തള്ളിയ അപേക്ഷകളാണ് ഇപ്പോൾ വീണ്ടും എത്തിയിരിക്കുന്നത്. ഉദ്യോഗസ്ഥരെ സമ്മർദത്തിലാക്കി സ്വാധീനിക്കാനാണ് മുസ്ലിം ലീഗ് ശ്രമിക്കുന്നതെന്നും, ഈ നീക്കം തടയണമെന്നും സിപിഎം ആവശ്യപ്പെടുന്നു.
