അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ആയഞ്ചേരി: ഒൻപത് വയസ്സുകാരിയെ ലൈംഗികമായി പീഡിപ്പിച്ച കേസിൽ പ്രതിക്ക് 74 വർഷം കഠിനതടവും 85,000 രൂപ പിഴയും വിധിച്ചു. നാദാപുരം ഫാസ്റ്റ് ട്രാക്ക് സ്‌പെഷ്യൽ പോക്സോ കോടതി ജഡ്ജി കെ. നൗഷാദലി ആണ് ശിക്ഷ പ്രഖ്യാപിച്ചത്.
ശിക്ഷിക്കപ്പെട്ടത് ആയഞ്ചേരി തറോപ്പൊയിൽ കുനിയിൽ ബാലൻ (61) ആണ്. 2024 ജനുവരിയിൽ കുട്ടിയുടെ അമ്മ മരിച്ച സമയത്ത് രക്ഷകർത്താവിന്റെ സ്ഥാനത്ത് വീട്ടിലെത്തിയ പ്രതി, തുടർ ദിവസങ്ങളിൽ പെൺകുട്ടിയെ പലതവണ ലൈംഗികാതിക്രമത്തിന് ഇരയാക്കിയെന്നാണ് കേസ്.
സംഭവം കുട്ടി സ്കൂൾ ടീച്ചറോട് വെളിപ്പെടുത്തിയതോടെയാണ് കാര്യം പുറത്തറിയുന്നത്. വിവരം അറിഞ്ഞ സ്കൂൾ അധികൃതർ തൊട്ടിൽപ്പാലം പോലീസിൽ പരാതി നൽകി. തുടർന്ന് പ്രതിക്കെതിരെ ബലാത്സംഗത്തിന്റെയും പോക്സോ നിയമലംഘനത്തിന്റെയും വകുപ്പുകൾ ചുമത്തി കേസ് രജിസ്റ്റർ ചെയ്തു.
പ്രതിയെ 2024 ഫെബ്രുവരി ഒന്നിന് അറസ്റ്റ് ചെയ്ത് അതേ ദിവസം മുതൽ ജയിലിലടക്കുകയായിരുന്നു. കേസ് 2024 ജനുവരി 31-ന് രജിസ്റ്റർ ചെയ്തതായിരുന്നു.
തൊട്ടിൽപ്പാലം പോലീസ് ഇൻസ്‌പെക്ടർ ടി. എസ്. ബിനു അന്വേഷണം ആരംഭിച്ചു. തുടർന്ന് സബ് ഇൻസ്‌പെക്ടർ വിഷ്ണു എം. പി.യും ഗ്രേഡ് എ.എസ്.ഐ. സുശീല കെ. പി.*യും ചേർന്ന് അന്വേഷണം പൂർത്തിയാക്കി കോടതിയിൽ കുറ്റപത്രം സമർപ്പിച്ചു.
കേസിൽ പ്രോസിക്യൂഷൻ ഭാഗത്ത് നിന്ന് 19 സാക്ഷികളെയും 20 രേഖകളെയും ഹാജരാക്കി. പ്രോസിക്യൂഷനുവേണ്ടി സ്‌പെഷ്യൽ പബ്ലിക് പ്രോസിക്യൂട്ടർ മനോജ് അരൂർ ഹാജരായിരുന്നു.
