അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.വടകര: 41-ാമത് സ്റ്റേറ്റ് യൂത്ത് വോളിബോൾ പുരുഷ-വനിത നോർത്ത് സോൺ ചാമ്പ്യൻഷിപ്പ് ഡിസംബർ 13, 14 തിയതികളിൽ വടകരയിൽ നടക്കും. വടകര വോളി ലവേഴ്സ് എന്ന സംഘടനയുടെ ആഭിമുഖ്യത്തിൽ നടക്കുന്ന മത്സരങ്ങൾ ശ്രീനാരായണ എൽ.പി. സ്കൂൾ ഗ്രൗണ്ടിലാണ് അരങ്ങേറുന്നത്.
കാസർകോട് മുതൽ തൃശൂർ വരെയുള്ള ഏഴ് ജില്ലകളിൽ നിന്നുള്ള പതിനാലു പുരുഷ-വനിത ടീമുകൾ പരസ്പരം ഏറ്റുമുട്ടി കിരീടത്തിനായി പോരാടും.
ചാമ്പ്യൻഷിപ്പിന്റെ സംഘാടകസമിതി രൂപീകരണ യോഗം ശ്രീനാരായണ സ്കൂളിൽ നടന്നു. യോഗം വോളിബോൾ അസോസിയേഷൻ സീനിയർ വൈസ് പ്രസിഡന്റ് എ. സി. മജിദ് ഉദ്ഘാടനം ചെയ്തു. ജില്ലാ വോളിബോൾ അസോസിയേഷൻ വൈസ് പ്രസിഡന്റ് ടി. പി. മുസ്തഫ അധ്യക്ഷനായിരുന്നു.
സംഘാടകസമിതിയിലെ ഭാരവാഹികളായി പി. എം. മണി ബാബു (ചെയർമാൻ), ഹരീഷ്, അനീഷ് (വൈസ് ചെയർമാൻമാർ), കെ. പി. രാജീവൻ (ജനറൽ കൺവീനർ), ഫിറോസ് (ട്രഷറർ) എന്നിവരെ തെരഞ്ഞെടുത്തു.
ജില്ലാ വോളിബോൾ അസോസിയേഷൻ എക്സിക്യൂട്ടീവ് വൈസ് പ്രസിഡന്റ് രാഘവൻ മാണിക്കോത്ത്, സി. വി. വിജയൻ, പി. എം. അശോകൻ, ഏജിസ് മുരളി, ഹമീദ് എന്നിവർ യോഗത്തിൽ പ്രസംഗിച്ചു.
യുവ കായികതാരങ്ങൾക്ക് വടകരയിൽ മികച്ച വേദി ഒരുക്കാനാണ് സംഘാടകസമിതിയുടെ ലക്ഷ്യം.
