അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ചെങ്കോട്ടയ്ക്ക് സമീപമുണ്ടായ സ്ഫോടനത്തിന്റെ അന്വേഷണത്തിൽ ഇന്ത്യയുടെ സമീപനത്തെയും വൈദഗ്ധ്യത്തെയും പ്രശംസിച്ച് യുഎസ് വിദേശകാര്യ സെക്രട്ടറി മാർക്കോ റൂബിയോ. അന്വേഷണ ചുമതലകൾ ഇന്ത്യ കൈകാര്യം ചെയ്ത രീതി അസാധാരണമാംവിധം മികച്ചതാണെന്ന് അദ്ദേഹം അഭിപ്രായപ്പെട്ടു. അന്വേഷണ ഉദ്യോഗസ്ഥരെ അഭിനന്ദിച്ച റൂബിയോ, സ്ഥിതിഗതികൾ വളരെ ഫലപ്രദമായാണ് ഇന്ത്യ കൈകാര്യം ചെയ്യുന്നതെന്നും കൂട്ടിച്ചേർത്തു.
കാനഡയിൽ നടന്ന ജി7 വിദേശകാര്യ മന്ത്രിമാരുടെ യോഗത്തിനുശേഷം മാധ്യമപ്രവർത്തകരോട് സംസാരിക്കുകയായിരുന്നു മാർക്കോ റൂബിയോ. “ഞങ്ങൾ സഹായം വാഗ്ദാനം ചെയ്തിട്ടുണ്ട്, പക്ഷേ ഇത്തരം അന്വേഷണങ്ങളിൽ ഇന്ത്യയ്ക്ക് ഏറെ മികവുണ്ടെന്ന് ഞാൻ കരുതുന്നു. അവർക്ക് ഞങ്ങളുടെ സഹായം ആവശ്യമില്ല, അവർ നല്ല രീതിയിൽ പ്രവർത്തിക്കുന്നുണ്ട്,” റൂബിയോ പറഞ്ഞു. ഇന്ത്യയ്ക്ക് അന്വേഷണത്തിൽ മികച്ച ശേഷിയുണ്ടെന്ന ശക്തമായ സൂചനയാണ് ഈ വാക്കുകൾ നൽകുന്നത്.
ജി7 വിദേശകാര്യ മന്ത്രിമാരുടെ യോഗത്തിനിടെ കേന്ദ്ര വിദേശകാര്യ മന്ത്രി എസ്. ജയശങ്കറും മാർക്കോ റൂബിയോയും തമ്മിൽ ചെങ്കോട്ടയിലെ ഭീകരാക്രമണത്തെക്കുറിച്ച് ചർച്ച നടത്തിയിരുന്നു. സംഭവത്തെ അതീവ ഗൗരവത്തോടെയാണ് ഇരുരാജ്യങ്ങളും കാണുന്നത്.
കഴിഞ്ഞ തിങ്കളാഴ്ച വൈകിട്ട് 6.52-നാണ് രാജ്യതലസ്ഥാനമായ ഡൽഹിയിൽ ചെങ്കോട്ടയ്ക്ക് സമീപം സ്ഫോടനമുണ്ടായത്. കാർ പൊട്ടിത്തെറിച്ചുണ്ടായ ഈ ദാരുണമായ അപകടത്തിൽ 13 പേർക്ക് ജീവൻ നഷ്ടപ്പെട്ടിരുന്നു. സംഭവത്തെ ഭീകരാക്രമണമായി കേന്ദ്രസർക്കാർ സ്ഥിരീകരിച്ചിട്ടുണ്ട്. ഈ ദുരന്തത്തിൽ ലോകരാജ്യങ്ങൾ ഞെട്ടലും ദുഃഖവും രേഖപ്പെടുത്തുകയും, ഇന്ത്യയ്ക്ക് പിന്തുണ അറിയിക്കുകയും ചെയ്തിരുന്നു.
