അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കോഴിക്കോട്: കുറ്റിക്കാട്ടൂർ മയിലാംപറമ്പ് സ്വദേശി നൗഷാദ് (27) പി.ജി. ഡോക്ടറെന്ന വ്യാജേന യുവതിയെ വഞ്ചിച്ച് പീഡിപ്പിച്ച കേസിൽ പൊലീസ് പിടിയിലായി. കോഴിക്കോട് മെഡിക്കൽ കോളേജിൽ പി.ജി. വിദ്യാർത്ഥിയാണെന്ന് പരിചയപ്പെട്ട ഇയാൾ വിവാഹവാഗ്ദാനം നൽകി യുവതിയെ ലൈംഗികമായി പീഡിപ്പിച്ചതോടൊപ്പം പണം തട്ടിയെടുത്തു എന്നും ആണ് അന്വേഷണം വ്യക്തമാക്കുന്നത്. കഴിഞ്ഞ ഏപ്രിലിലാണ് സംഭവം നടക്കുന്നത്.
പോലീസ് പറയുന്നതനുസരിച്ച്, നൗഷാദിന്റെ ഭാര്യയും യുവതിയുടെ പിതാവും ഒരേ സമയത്ത് മെഡിക്കൽ കോളേജ് ആശുപത്രിയിൽ ചികിത്സയിലായിരുന്നു. വാർഡിൽ എത്തുന്ന യഥാർത്ഥ പി.ജി. ഡോക്ടറുടെ പേര് ഉൾപ്പെടെയുള്ള വിവരങ്ങൾ നിരീക്ഷിച്ച് ശേഖരിച്ച ശേഷം, ആ ഡോക്ടറുടെ പേരിൽ തന്നെയാണ് നൗഷാദ് യുവതിയുമായി സന്ദേശമയച്ച് ബന്ധം തുടങ്ങിയത്. ‘ഡോ. വിജയ്’ എന്നാണ് ഇയാൾ പരിചയപ്പെടുത്തിയത്. ആശുപത്രിയിൽ അച്ഛനൊപ്പം കൂടെയിരുന്നിരിക്കെ ആ പേരിൽ ഒരു ഡോക്ടറെ കണ്ടിട്ടുണ്ടെന്നതിനാൽ യുവതിക്ക് ആദ്യം സംശയം തോന്നിയില്ല.
തുടർന്നുള്ള ആശയവിനിമയത്തിൽ സൗഹൃദം വളർന്നു, പിന്നീട് നൗഷാദ് വിവാഹവാഗ്ദാനവും നൽകി. ഇതിനെ തുടർന്ന്, ഇയാൾ നാല് തവണ യുവതിയുടെ വീട്ടിലെത്തിയതായും പരാതി പറയുന്നു. ആരെങ്കിലും കാണാതിരിക്കാനെന്ന പേരിൽ ലൈറ്റ് ഓഫ് ചെയ്യാൻ ആവശ്യപ്പെട്ടതിനാൽ, പ്രതിയുടെ മുഖം വ്യക്തമായി തിരിച്ചറിയാൻ യുവതിക്ക് കഴിഞ്ഞിരുന്നില്ല.
വിവാഹവാഗ്ദാനം പാലിക്കാതെ നൗഷാദ് മാറി നിൽക്കാൻ തുടങ്ങിയപ്പോൾ സംശയം വളർന്ന യുവതി ‘ഡോ. വിജയി’യെ നേരിൽ കാണാൻ മെഡിക്കൽ കോളേജിലെത്തി. എന്നാൽ അവിടെ യഥാർത്ഥ പി.ജി. ഡോക്ടറെ കണ്ടപ്പോൾ യുവതിയും ബന്ധുവും ചേർന്ന് അദ്ദേഹത്തെ ആക്രമിച്ചു. അന്യായമായി ആക്രമിക്കപ്പെട്ട ഡോക്ടറുടെ പരാതിയെത്തുടർന്ന് മെഡിക്കൽ കോളേജ് അധികൃതർ പൊലീസ് വിവരം അറിയിച്ചു.
തുടർന്ന് നടത്തിയ അന്വേഷണത്തിലാണ് നൗഷാദ് പോലീസിന്റെ വലയിലായത്.
