അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.നിശ്ശബ്ദതയുടെയും നിഗൂഢതയുടെയും കുന്നിൻ മുകളിൽ തലയുയർത്തി നിൽക്കുന്ന അൽ ഖാസിമി കൊട്ടാരം. ഓരോ ഇഷ്ടികയിലും ഉറങ്ങിക്കിടക്കുന്നത് കാലം കൈമാറിയ കഥകളാണ്. പ്രാദേശികമായി ‘പ്രേത കൊട്ടാരം’ എന്ന വിളിപ്പേര് നേടിയ ഈ ചരിത്ര സ്മാരകം, നാല് പതിറ്റാണ്ടുകൾക്ക് ശേഷം പുതിയ ഉടമയെ കാത്തിരിക്കുകയാണ്. ഈജിപ്ഷ്യൻ പിരമിഡുകളേക്കാൾ നിഗൂഢത ഒളിപ്പിച്ച ഈ സൗധത്തിൻ്റെ വാതിൽ തുറന്ന് അകത്തേക്ക് കടക്കുന്ന ആ ധീരൻ ആരായിരിക്കും?
റാസൽഖൈമയുടെ നെറുകയിൽ, വർഷങ്ങളായി വിജനമായി കിടന്നിരുന്ന ഈ കൊട്ടാരം ഇപ്പോൾ വീണ്ടും വാർത്തകളിൽ നിറയുകയാണ്. 25 മില്യൺ ദിർഹംസ് (ഏകദേശം $6.8 മില്യൺ) വിലയിട്ട് വിൽപനയ്ക്ക് വെച്ചിരിക്കുന്ന ഈ മനോഹര സൗധം വെറുമൊരു കെട്ടിടമല്ല; ഇസ്ലാമിക്, പേർഷ്യൻ, മൊറോക്കൻ, ഇന്ത്യൻ വാസ്തുവിദ്യയുടെ വിസ്മയിപ്പിക്കുന്ന സമന്വയമാണ്. ഏകദേശം ഇരുപതിനായിരം ചതുരശ്ര മീറ്റർ വിസ്തൃതിയിൽ, 4 നിലകളിലായി 35 മുറികൾ ഈ കൊട്ടാരത്തിലുണ്ട്.
1985-ൽ ഷെയ്ഖ് അബ്ദുൽ അസീസ് ബിൻ ഹുമൈദ് അൽ ഖാസിമി 50 കോടി ദിർഹം ചിലവഴിച്ചാണ് ഈ ആഡംബര കൊട്ടാരം നിർമ്മിച്ചത്. ഫ്രാൻസിൽ നിന്നും ബെൽജിയത്തിൽ നിന്നുമുള്ള അലങ്കാര ലൈറ്റുകൾ, അതിപ്രശസ്തമായ താസോസ് മാർബിളുകൾ, മേൽക്കൂരയിൽ തിളങ്ങുന്ന ഗ്ലാസ് പിരമിഡ് എന്നിവയെല്ലാം ഈ കൊട്ടാരത്തിൻ്റെ എടുത്തുപറയേണ്ട പ്രത്യേകതകളാണ്.
എന്നാൽ, എന്തോ കാരണങ്ങളാൽ ഈ സൗധം പെട്ടെന്ന് ഉപേക്ഷിക്കപ്പെട്ടു. താമസിയാതെ, ഇവിടെ ജിന്നുകളുടെയും പ്രേത രൂപങ്ങളുടെയും സാന്നിധ്യമുണ്ടെന്ന കഥകൾ നാട്ടുകാർക്കിടയിൽ പ്രചരിച്ചു, അങ്ങനെ കൊട്ടാരത്തിന് ‘പ്രേത കൊട്ടാരം’ എന്ന ദുരൂഹ പരിവേഷം ലഭിച്ചു.
വർഷങ്ങൾക്കിപ്പുറം ഷെയ്ഖിൻ്റെ അവകാശികളിൽ നിന്ന് നിലവിലെ ഉടമ കൊട്ടാരം ഏറ്റെടുത്ത് പൊതുജനങ്ങൾക്കായി തുറന്നു നൽകിയത് വലിയ വാർത്തയായിരുന്നു. ദിവസവും രാവിലെ 9 മുതൽ വൈകുന്നേരം 7 വരെയാണ് സന്ദർശക സമയം, ടിക്കറ്റ് നിരക്ക് ഒരാൾക്ക് 75 ദിർഹംസും.
എന്നാൽ, കൊട്ടാരം വാങ്ങാൻ മുൻ പാകിസ്ഥാൻ പ്രധാനമന്ത്രി ബെനസീർ ഭൂട്ടോ ഉൾപ്പെടെയുള്ള ഉന്നത വ്യക്തികൾ താൽപ്പര്യം കാണിച്ചിരുന്നെങ്കിലും അത് നടന്നില്ല. റാസൽഖൈമയിലെ നിയമപ്രകാരം, യുഎഇ പൗരൻ്റെ പേരിൽ മാത്രമേ ഈ കൊട്ടാരം രജിസ്റ്റർ ചെയ്യാൻ കഴിയൂ എന്ന നിബന്ധനയാണ് ഇപ്പോഴത്തെ വിൽപനയിലെ പ്രധാന കടമ്പ.
ചരിത്രപരമായ ഈടുവെയ്പ്പിനെ അതിന്റെ തനിമയോടെ വിലമതിക്കുന്ന, ഒരു രാജ്യത്തിൻ്റെ സംസ്കാരത്തെ നെഞ്ചിലേറ്റുന്ന ഒരു വ്യക്തിയെ കാത്തിരിക്കുകയാണ് ഈ പ്രേത കൊട്ടാരം. 40 വർഷത്തെ ദുരൂഹതയ്ക്ക് വിരാമമിട്ട്, ഈ സ്വപ്നസൗധത്തിന് പുതിയ വെളിച്ചം നൽകുന്ന ആ വ്യക്തി ആരായിരിക്കും എന്ന് ഉറ്റുനോക്കുകയാണ് ലോകം.
കടപ്പാട്: AMRITHA TV MIDDLE EAST
