അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.അഴിയൂർ: സംസ്ഥാനത്തും അഴിയൂർ പഞ്ചായത്തിലും ഇടതുപക്ഷം കുതന്ത്രങ്ങളിലൂടെ രാഷ്ട്രീയ നേട്ടം തേടുന്ന മുന്നണിയായി മാറിയിരിക്കുകയാണെന്ന് കെ.കെ. രമ എം.എൽ.എ ആരോപിച്ചു. സീറ്റ് പിടിച്ചെടുക്കാൻ ലക്ഷ്യമിട്ട് വാർഡുകൾ പുനഃക്രമീകരിക്കുന്നതടക്കം നിരവധി കുതന്ത്രങ്ങളാണ് ഇടതുപക്ഷം നടത്തുന്നതെന്നും, വോട്ടർ പട്ടികയിൽ വ്യാപക ക്രമക്കേടുകൾ വരുത്തിയതും ഇതിന്റെ ഭാഗമാണെന്നും അവർ വിമർശിച്ചു.
“ജനങ്ങൾക്കിടയിൽ സ്വാധീനം നഷ്ടപ്പെട്ടതിനാലാണ് ഇത്തരം ഒളിയുതിർപ്പുകൾ നടത്തുന്നത്. എന്ത് കുതന്ത്രം ചെയ്താലും ഇവർക്ക് ജയിക്കാനാവില്ല,” — കെ.കെ. രമ കൂട്ടിച്ചേർത്തു.
അഴിയൂർ പഞ്ചായത്തിലെ ജനകീയ മുന്നണി സ്ഥാനാർഥി പ്രഖ്യാപനവും തെരഞ്ഞെടുപ്പ് കൺവെൻഷനും ഉദ്ഘാടനം ചെയ്യുകയായിരുന്നു എം.എൽ.എ.
വികസന പ്രവർത്തനങ്ങളെക്കുറിച്ച് ഉയരുന്ന വിമർശനങ്ങൾക്ക് മറുപടിയായി കെ.കെ. രമ പറഞ്ഞു: “എം.എൽ.എയായ നിലയിൽ അഴിയൂരിൽ മാത്രം 13 കോടി രൂപയുടെ വികസനപ്രവർത്തനങ്ങൾ ആണ് നടപ്പിലാക്കിയത്. ജനങ്ങൾക്കു മുമ്പിൽ സമർപ്പിക്കാനുള്ള വ്യക്തമായ പ്രവർത്തനങ്ങളാണ് ഞങ്ങളുടേത്.”
ജനകീയ മുന്നണി ചെയർമാൻ കെ. അൻവർ ഹാജി അധ്യക്ഷനായിരുന്നു. ലീഗ് സംസ്ഥാന സെക്രട്ടറി പാറക്കൽ അബ്ദുള്ള, ജില്ലാ പഞ്ചായത്ത് അഴിയൂർ ഡിവിഷൻ സ്ഥാനാർഥി ടി.കെ. സിബി, ആയിഷ ഉമ്മർ, ടി.സി. രാമചന്ദ്രൻ, പ്രദീപ് ചോമ്പാല, ഇ.ടി. അയ്യുബ്, പി. ബാബുരാജ്, വി.പി. പ്രകാശൻ, പി.പി. ഇസ്മായിൽ എന്നിവർ പ്രസംഗിച്ചു.
ഭാരവാഹികൾ: കെ. അൻവർ ഹാജി (ചെയർമാൻ), ടി.സി. രാമചന്ദ്രൻ (ജനറൽ കൺവീനർ) എൻ.വി. ശ്രീജേഷ് കുമാർ (ട്രഷറർ)
