അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സ്വന്തം നിലപാട് വ്യക്തമാക്കുന്ന കാര്യത്തിൽ മിടുക്കിയാണ് നടിയും അവതാരികയുമായ മീനാക്ഷി അനൂപ്. ഇപ്പോഴിതാ പൊതുവിദ്യാഭ്യാസ മേഖലയിൽ ഉണ്ടാകേണ്ട മാറ്റങ്ങളെക്കുറിച്ച് മീനാക്ഷി നടത്തിയ പരാമർശങ്ങൾക്ക് മറുപടിയുമായി രംഗത്ത് വന്നിരിക്കുകയാണ് വിദ്യാഭ്യാസമന്ത്രി വി.ശിവൻകുട്ടി. മീനാക്ഷി പങ്കുവച്ച അഭിപ്രായങ്ങൾക്ക് നന്ദി അറിയിച്ച മന്ത്രി കുട്ടികൾ അറിഞ്ഞിരിക്കേണ്ട അടിസ്ഥാന വിവരങ്ങളെല്ലാം പരിഷ്കരിച്ച പാഠപുസ്തകങ്ങളിൽ ചേർത്തിട്ടുണ്ടെന്നും അദ്ദേഹം ഫേസ്ബുക്ക് കുറിപ്പിലൂടെ അറിയിച്ചു.
മീനാക്ഷിയുടെ വാക്കുകൾ
‘സിപിആർ പോലെ വളരെ അടിസ്ഥാനപരമായ അത്യാവശ്യ കാര്യങ്ങൾ കുട്ടികളെ പഠിപ്പിച്ചിരുന്നെങ്കിൽ നന്നായിരുന്നു എന്ന് ആവശ്യപ്പെട്ട് മുമ്പ് സാമൂഹിക മാധ്യമത്തിൽ പോസ്റ്റ് പങ്കുവച്ചിരുന്നു. പാഠഭാഗങ്ങളിൽ പരാമർശിച്ച് പോകുന്നുണ്ടെങ്കിലും അത്തരം ഭാഗങ്ങളുടെ വിശദമായ പഠനം കുട്ടികൾക്ക് ലഭിച്ചിരുന്നില്ല. അത് ഞാൻ സ്കൂളിൽ പഠിച്ചിരുന്ന സമയത്താണ്. പക്ഷെ ഇപ്പോൾ അങ്ങനെ അല്ല. ഫയർ ഫോഴ്സ് പൊലെയുള്ള സേന വിഭാഗങ്ങളും ആരോഗ്യ വകുപ്പും പല സ്കൂളുകളിലും പ്രത്യേക ക്ലാസുകൾ സംഘടിപ്പിക്കുന്നുണ്ട്. ഒരു വിദ്യാർഥി എന്ന നിലയ്ക്ക് ഇത്തരം ചോദ്യങ്ങൾ ചോദിക്കാൻ കഴിയുന്നതും വളരെ ജനാധിപത്യപരമായി ഉത്തരങ്ങൾ കിട്ടുന്നതും ഇപ്പോഴത്തെ വിദ്യാഭ്യാസ മന്ത്രിയുടെ നല്ല പെരുമാറ്റംകൊണ്ടാണ്. കുട്ടികളോട് വളരെ നന്നായി സംസാരിക്കുന്ന മന്ത്രിയുണ്ടാകുക എന്നത് നമ്മുക്ക് വളരെ സന്തോഷമുള്ള കാര്യമാണ്’. നമ്മുക്ക് ചോദ്യം ചോദിക്കാൻ അവകാശമുണ്ടെന്നും എന്ത് ചോദ്യം ചോദിച്ചാലും ഉത്തരം കിട്ടാവുന്ന ഒരു സ്ഥലമാണെന്ന് തോന്നിപ്പിക്കുന്ന ഒരു വിദ്യാഭ്യാസ സമ്പ്രദായം നമുക്ക് ഉള്ളതുകൊണ്ടാണ് ചോദ്യങ്ങൾ ചോദിക്കുന്നതും ഉത്തരങ്ങൾ കിട്ടുന്നതെന്നും മീനാക്ഷി അനൂപ് പറയുന്നു.
മന്ത്രി വി.ശിവൻകുട്ടി പങ്കുവച്ച കുറിപ്പിന്റെ പൂർണരൂപം:
പ്രിയപ്പെട്ട മീനാക്ഷിയ്ക്ക്,
പൊതുവിദ്യാഭ്യാസ മേഖലയിൽ ഉണ്ടാകേണ്ട മാറ്റങ്ങളെക്കുറിച്ചുള്ള മീനാക്ഷിയുടെ അഭിപ്രായങ്ങൾ കണ്ടു. അഭിപ്രായങ്ങൾക്ക് നന്ദി. കുട്ടികൾ അറിഞ്ഞിരിക്കേണ്ട അടിസ്ഥാന വിവരങ്ങൾ എല്ലാം പരിഷ്കരിച്ച പാഠപുസ്തകങ്ങളിൽ ചേർത്തിട്ടുണ്ട്. കുട്ടികളുടെയും മുതിർന്നവരുടെയും ഇത്തരം അഭിപ്രായങ്ങൾ കേട്ടാണ് നാം പുതിയ പാഠ്യപദ്ധതി തയ്യാറാക്കിയത്. ഓരോ വർഷവും ഉണ്ടാകുന്ന മാറ്റങ്ങൾക്ക് അനുസൃതമായി പാഠപുസ്തകങ്ങൾ പുതുക്കുമെന്ന് ഇതിനകം തന്നെ പ്രഖ്യാപിച്ചു കഴിഞ്ഞതാണ്. ഫസ്റ്റ് എയ്ഡ് സംബന്ധിച്ച കാര്യങ്ങളും, ട്രാഫിക് ബോധവൽക്കരണവും, സാമ്പത്തിക സാക്ഷരതയും, വേസ്റ്റ് മാനേജ്മെന്റും, നിയമ സാക്ഷരതയുമെല്ലാം വിവിധ ക്ളാസുകളിലെ പുസ്തകങ്ങളിൽ ചേർത്തിട്ടുണ്ട്. പുതിയ അഭിപ്രായങ്ങളും ആശയങ്ങളും ഉണ്ടാവട്ടെ, നല്ലതിനെ പൊതുവിദ്യാഭ്യാസ വകുപ്പ് സ്വാഗതം ചെയ്യുന്നു.
സ്നേഹത്തോടെ, വി. ശിവൻകുട്ടി
മന്ത്രിയുടെ പരാമർശത്തിനു മറുപടിയുമായി മീനാക്ഷി എത്തി.–‘‘പോസ്റ്റ് ശ്രദ്ധിച്ചതിലും കാര്യമുണ്ടെന്ന് കണ്ട് കൂടെ ചേർന്നതിനും അങ്ങേയ്ക്ക് ഹൃദയപൂർവം നന്ദി. മുൻപും വിദ്യാർഥി എന്ന നിലയിൽ സാറിനോട് എനിക്ക് ചോദ്യങ്ങൾ ചോദിക്കാൻ പറ്റിയിരുന്നു. വളരെ സ്നേഹപൂർവ്വം എനിക്ക് ഉത്തരങ്ങൾ തന്നതും ഓർമയിലുണ്ട്. ഇപ്പോൾ പാഠപുസ്തകവുമായി ബന്ധപ്പെട്ട് ഞാനാവശ്യപ്പെട്ട കാര്യങ്ങൾ പരിഗണിക്കാം എന്നറിയിച്ചതിലും ഹൃദയപൂർവം നന്ദി.’’
‘‘ചോദ്യങ്ങൾ ചോദിച്ചു തന്നെ മുന്നേറുക’’– എന്നായിരുന്നു മീനാക്ഷിയുടെ കമന്റിനു മന്ത്രിയുടെ മറുപടി.
