അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മുതിർന്ന കോൺഗ്രസ് നേതാവും യൂത്ത് കോൺഗ്രസ് സംസ്ഥാന ഭാരവാഹിയുമായ രാഹുൽ മാങ്കൂട്ടത്തിലിനെതിരായ ബലാത്സംഗക്കേസിൽ നിർണ്ണായക നീക്കങ്ങൾ. കേസിൽ തിരുവനന്തപുരം ജില്ലാ കോടതിയിൽ മുൻകൂർ ജാമ്യാപേക്ഷ നൽകിയിരിക്കുകയാണ് രാഹുൽ. എന്നാൽ ഒളിവിൽ പോയ രാഹുലിനെ എത്രയും പെട്ടെന്ന് അറസ്റ്റ് ചെയ്യാനുള്ള ശ്രമങ്ങളുമായി പോലീസ് മുന്നോട്ട് പോകുകയാണ്.
തനിക്കെതിരെയുള്ള ആരോപണങ്ങൾ പൂർണ്ണമായും നിഷേധിച്ചുകൊണ്ടാണ് രാഹുൽ മാങ്കൂട്ടത്തിൽ ജില്ലാ കോടതിയിൽ മുൻകൂർ ജാമ്യാപേക്ഷ സമർപ്പിച്ചത്. പരാതിക്കാരിയുമായി തനിക്ക് ദീർഘകാലത്തെ സൗഹൃദമുണ്ടായിരുന്നു എന്നും, യുവതി ആരോപിക്കുന്നതുപോലെ ബലാത്സംഗം ചെയ്തിട്ടില്ലെന്നുമാണ് ഹർജിയിൽ പ്രധാനമായും പറയുന്നത്. ഗർഭഛിദ്രം ഉൾപ്പെടെയുള്ള ആരോപണങ്ങൾ കെട്ടിച്ചമച്ചതാണെന്നും, നിലവിലെ അറസ്റ്റ് നടപടികൾക്കു പിന്നിൽ രാഷ്ട്രീയ നീക്കങ്ങൾ ഉണ്ടെന്നും ഹർജിയിൽ അദ്ദേഹം ആരോപിക്കുന്നു. അന്വേഷണവുമായി പൂർണ്ണമായും സഹകരിക്കാൻ തയ്യാറാണെന്നും, അതിനാൽ ജാമ്യം അനുവദിക്കണമെന്നുമാണ് രാഹുലിന്റെ ആവശ്യം. ഈ ഹർജി നാളെ കോടതി പരിഗണിക്കാൻ സാധ്യതയുണ്ട്.
അതേസമയം, രാഹുലിനെതിരായ പരാതിയിൽ പരാതിക്കാരിയായ യുവതിയുടെ രഹസ്യമൊഴി രേഖപ്പെടുത്തിയിട്ടുണ്ട്. നെയ്യാറ്റിൻകര കോടതിയിലെ വനിതാ മജിസ്ട്രേറ്റിന് മുൻപാകെയാണ് യുവതി മൊഴി നൽകിയത്. പൊലീസിനൊപ്പമാണ് യുവതി കോടതിയിലെത്തിയത്. തിരുവനന്തപുരത്തെ ഒരു ഫ്ലാറ്റിൽ വെച്ച് രണ്ടു തവണയും പാലക്കാട് വെച്ചും രാഹുൽ തന്നെ ബലാത്സംഗം ചെയ്തു എന്നാണ് രഹസ്യമൊഴിയിൽ യുവതി വ്യക്തമാക്കിയിട്ടുള്ളത്. ഈ മൊഴിയുടെ അടിസ്ഥാനത്തിൽ വലിയമല പൊലീസ് ആദ്യം കേസെടുക്കുകയും പിന്നീട് കേസ് നേമം പൊലീസിന് കൈമാറുകയും ചെയ്തിരുന്നു.
രാഹുൽ മാങ്കൂട്ടത്തിലിന്റെ അറസ്റ്റ് എത്രയും പെട്ടെന്ന് രേഖപ്പെടുത്താനുള്ള നീക്കങ്ങളാണ് പൊലീസ് ഊർജ്ജിതമാക്കിയിരിക്കുന്നത്. തിരുവനന്തപുരം സിറ്റി പൊലീസ് കമ്മിഷണറുടെ നേതൃത്വത്തിലുള്ള പ്രത്യേക അന്വേഷണസംഘമാണ് കേസ് അന്വേഷിക്കുന്നത്. ഡിസിപിയും അസിസ്റ്റന്റ് കമ്മിഷണറും ഈ സംഘത്തിലുണ്ട്. ഒളിവിൽ കഴിയുന്ന രാഹുൽ രാജ്യം വിട്ടുപോകാതിരിക്കാൻ പൊലീസ് ലുക്കൗട്ട് നോട്ടീസ് പുറത്തിറക്കിയിട്ടുണ്ട്.
