അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.എരുമപ്പെട്ടി: ബൈക്കിൽ യാത്ര ചെയ്യുകയായിരുന്ന ദമ്പതികളെ ഇടിച്ചു വീഴ്ത്തി നിർത്താതെ രക്ഷപ്പെടാൻ ശ്രമിച്ച കാർ ഡ്രൈവറെ പൊലീസ് പിടികൂടി. പാലക്കാട് മേലെപട്ടാമ്പി വയസത്തൊടി വീട്ടിൽ സുബൈർ (54) ആണ് എരുമപ്പെട്ടി പൊലീസ് ഇൻസ്പെക്ടർ അനീഷ്കുമാറിൻ്റെ നേതൃത്വത്തിലുള്ള സംഘത്തിന്റെ പിടിയിലായത്.
സംഭവം ഈ മാസം 23-ാം തീയതി വൈകുന്നേരം, കേച്ചേരി–അക്കിക്കാവ് ബൈപാസ് റോഡിലാണ് നടന്നത്. ചൊവ്വന്നൂർ വെള്ളിത്തിരുത്തി ചിറളയത്ത് മുകുന്ദനും ഭാര്യ സുജാതയും ബൈക്കിൽ യാത്ര ചെയ്യുന്നതിനിടെ സുബൈർ ഓടിച്ചിരുന്ന കാർ അവർ സഞ്ചരിച്ചിരുന്ന ബൈക്കിനെ ഇടിച്ചു. അപകടം ഉണ്ടാക്കിയിട്ടും, വാഹനം നിർത്താതെ സുബൈർ സ്ഥലത്ത് നിന്ന് കടന്നുകളയുകയായിരുന്നു.
അതിനുശേഷം, എരുമപ്പെട്ടി പൊലീസ് നടത്തിയ അന്വേഷണത്തിലാണ് പ്രതിയെ പട്ടാമ്പിയിൽ നിന്ന് കണ്ടെത്തി അറസ്റ്റ് ചെയ്തത്. അപകടത്തിൽ പെട്ട കാറും കസ്റ്റഡിയിൽ എടുത്തിട്ടുണ്ട്.
അന്വേഷണ സംഘത്തിൽ എസ്.ഐ ആസിഫ്, സി.പി.ഒമാരായ പ്രവീൺ, നിബിൻ, അലക്സ് എന്നിവർ ഉൾപ്പെട്ടു. പ്രതിക്കെതിരെ കൂടുതൽ നിയമനടപടികൾ പുരോഗമിക്കുന്നതായി പൊലീസ് അറിയിച്ചു.
