‘പടിയടച്ചു പിണ്ഡം വക്കലും തേച്ചോട്ടിക്കലും കഴിഞ്ഞു റെസ്റ്റില്‍ ആണോ’: നിയമം പഠിപ്പിച്ച് ജെ.ജെ ആക്ടില്‍ അകത്തായ ലോകത്തിലെ ക്രൂരയായ അമ്മയുടെ ‘റീ എന്‍ട്രി’

കാമുകനൊപ്പം ചേർന്ന് മകനെ ഉപദ്രവിച്ചു കേസിൽ പ്രതിയായ അനുപമ ആചാര്യ ജയിലിൽ നിന്ന് പുറത്തിറങ്ങിയ ശേഷം എഴുതിയ ഒരു ഫേസ്ബുക്ക് പോസ്റ്റ് ഇപ്പോൾ വലിയ ചർച്ചകൾക്ക് വഴി തുറന്നിരിക്കുകയാണ്. നിയമ വ്യവസ്ഥയെയും ചൈൽഡ് വെൽഫെയർ കമ്മിറ്റിയുടെ (CWC) പ്രവർത്തനങ്ങളെയും പരിഹസിച്ചുകൊണ്ടുള്ള ഈ പോസ്റ്റ്, താൻ അനുഭവിച്ച ദുരിതങ്ങളുടെ പശ്ചാത്തലത്തിൽ നിയമത്തിൻ്റെ പ്രസക്തിയെയാണ് ചോദ്യം ചെയ്യുന്നത്. “ലോകത്തിലെ ഏറ്റവും ക്രൂരയായ അമ്മ” എന്ന് സ്വയം വിശേഷിപ്പിച്ചുകൊണ്ടാണ് അനുപമ ഈ കുറിപ്പ് അവസാനിപ്പിക്കുന്നത്.

​കുറച്ച് ദിവസങ്ങൾക്ക് മുമ്പായിരുന്നു അനുപമയ്ക്കെതിരെ കേസ് വന്നത്. 12 വയസ്സുള്ള മകനെ തൻ്റെ പുരുഷസുഹൃത്തിനൊപ്പം ചേർന്ന് ഉപദ്രവിച്ചു എന്നതായിരുന്നു കേസ്. പുരുഷസുഹൃത്തിനൊപ്പമുള്ള താമസത്തെ മകൻ എതിർത്തതാണ് ഉപദ്രവിക്കാൻ കാരണമെന്നും റിപ്പോർട്ടുകൾ ഉണ്ടായിരുന്നു. സമൂഹ മാധ്യമങ്ങളിൽ അറിയപ്പെടുന്ന ഇൻഫ്ലുവൻസർ കൂടിയാണ് അനുപമ. ജയിലിൽ നിന്ന് പുറത്തിറങ്ങിയതിന് ശേഷമാണ് CWC-ക്കെതിരെയും നിലവിലെ നിയമങ്ങൾക്കെതിരെയും കടുത്ത വിമർശനവും പരിഹാസവും നിറഞ്ഞ പോസ്റ്റ് ഇട്ടത്. തൻ കുറ്റം ചെയ്തിട്ടില്ല എന്ന രീതിയിൽ ആണ് അനുപമയുടെ പോസ്റ്റ്

​തൻ്റെ മകനെ ഒന്ന് “പിച്ചിയാൽ” പോലും അമ്മമാർ ജയിലിലാകുന്ന, നിയമം അതിൻ്റെ പൂർണ്ണമായ കാർക്കശ്യത്തോടെ പ്രയോഗിക്കപ്പെടുന്ന അവസ്ഥയാണ് ഇന്ന് നിലനിൽക്കുന്നത് എന്ന് പോസ്റ്റ് പരിഹസിക്കുന്നു. നിയമങ്ങൾ എടുത്തുപറഞ്ഞ്, CWC-യുടെ ലക്ഷ്യമായ തെരുവിലെ കുട്ടികളെ സംരക്ഷിക്കുന്നതിനേക്കാൾ, ചെറിയ അച്ചടക്ക നടപടികളുടെ പേരിൽ അമ്മമാരെ ശിക്ഷിക്കുന്നതിലാണ് ശ്രദ്ധയെന്ന വൈകാരികമായ പ്രതിഷേധം അനുപമ പോസ്റ്റിലൂടെ പങ്കുവെക്കുന്നു.

താൻ ജയിലിൽ ആയിരുന്നപ്പോൾ, മകനെ പിച്ചിയതിന് ജയിലിലായ മറ്റൊരു അമ്മയുടെ അനുഭവം ഉദാഹരണമായി ചൂണ്ടിക്കാട്ടിയാണ് നിയമത്തിൻ്റെ ഈ ‘ഇരുതല മൂർച്ച’ അവർ തുറന്നുകാട്ടുന്നത്. താൻ തെറ്റുകാരിയല്ല എന്ന ധ്വനിയോടെ, നിലവിലെ നീതിന്യായ വ്യവസ്ഥയെ കളിയാക്കുകയാണ് ഈ പോസ്റ്റിലൂടെ അനുപമ ആചാര്യ ചെയ്യുന്നത്.

പോസ്റ്റിൻ്റെ പ്രധാന വിമർശനം ചൈൽഡ് വെൽഫെയർ കമ്മിറ്റി (CWC) യുടെ പ്രവർത്തനങ്ങളോടാണ്. Juvenile Justice Act (JJ Act) 2015 പ്രകാരം, ഉപേക്ഷിക്കപ്പെട്ടവരും കഷ്ടത അനുഭവിക്കുന്നവരുമായ കുട്ടികളെ സംരക്ഷിക്കാൻ വേണ്ടിയാണ് CWC രൂപീകരിച്ചതെങ്കിലും, അതിൻ്റെ പ്രയോഗം ശരിയായ ദിശയിലല്ലെന്ന് അനുപമ പറയുന്നു. നോർത്ത് പാലത്തിൻ്റെ അടിയിലും സിഗ്നലുകളിലും തെരുവിൽ അലയുന്ന കുട്ടികളെ എറണാകുളം ജില്ലയിൽ കാണുന്നില്ലെന്ന് പരിഹസിക്കുന്നതിലൂടെ, തെരുവിലെ ദുരിതമനുഭവിക്കുന്ന കുട്ടികളുടെ കാര്യത്തിൽ CWC വേണ്ടത്ര ശ്രദ്ധ ചെലുത്തുന്നില്ല എന്ന വിമർശനമാണ് അവർ ഉന്നയിക്കുന്നത്. നിയമം ശക്തമായി നിലനിൽക്കുമ്പോഴും, യാഥാർത്ഥ്യത്തിലെ ചിത്രം ഇതല്ലെന്ന വൈരുധ്യം അവർ തുറന്നുകാട്ടുന്നു.

​തൻ്റെ മകനെ “പിച്ചിയതിന്” പോലും JJ Act പ്രകാരം അമ്മമാർ ജയിലിലാകുന്ന അവസ്ഥ നിലനിൽക്കുന്നു എന്ന് അനുപമ പറയുന്നു. ഇതിന് ഉദാഹരണമായി താൻ ജയിലിൽ വെച്ച് കണ്ടുമുട്ടിയ ഒരു അമ്മയുടെ അനുഭവം അവർ പങ്കുവെക്കുന്നു: മകനെ പിച്ചിയതിന് ടീച്ചറുടെ റിപ്പോർട്ടിനെ തുടർന്ന് CWC ഇടപെടുകയും അമ്മ ജയിലിലാവുകയും ചെയ്തു. അച്ഛൻ്റെയും അമ്മയുടെയും അടുത്ത് ജീവിക്കേണ്ട കുഞ്ഞിനെ എവിടെയോ മാറ്റി പാർപ്പിച്ചു എന്നും, നിയമം അതിൻ്റെ ക്രൂരമായ രൂപത്തിൽ സാധാരണ അമ്മമാർക്കെതിരെ പ്രയോഗിക്കപ്പെടുകയാണെന്നും പറയുന്നു. യഥാർത്ഥ സംരക്ഷണം ആവശ്യമുള്ള കുട്ടികളെ വിട്ട്, രക്ഷാകർത്താക്കളുടെ ചെറിയ അച്ചടക്ക നടപടികളിലേക്ക് CWC യുടെ ശ്രദ്ധ മാറിയോ എന്ന ആശങ്കയും പ്രതിഷേധവുമാണ് ഈ അനുഭവം ഉയർത്തുന്നത് അനുപമ കൂട്ടിച്ചേർത്തു.

​കേരള പോലീസ് ആക്ട് സെക്ഷൻ 116 (നിരപരാധികളെ കസ്റ്റഡിയിലെടുക്കുന്ന പോലീസുകാർക്കുള്ള ശിക്ഷ), മോഡസ്റ്റി ഓഫ് വുമൺ ആക്ട് (സ്ത്രീകളെ പരസ്യമായി അപമാനിക്കുന്നതിനെതിരെയുള്ള വകുപ്പുകൾ) എന്നിവ നിലവിലുണ്ടായിട്ടും അതിൻ്റെ പ്രയോഗത്തിലെ വിവേചനവും ഫലപ്രാപ്തിയില്ലായ്മയും പോസ്റ്റ് ചോദ്യം ചെയ്യുന്നു. നിരപരാധികളെ ജയിലിൽ അടച്ച സംഭവങ്ങളിൽ പോലീസുകാർക്കെതിരെ നടപടി എടുക്കാത്തതിനെ, “കേരള പോലീസ്കാർ നീതിമാന്മാരാണ്, അവർ കുറ്റം ചെയ്യില്ല” എന്ന പരിഹാസത്തോടെയുള്ള പ്രസ്താവനയിലൂടെ അനുപമ വിമർശിക്കുന്നു. അതുപോലെ, സോഷ്യൽ മീഡിയയിൽ സ്ത്രീകളെ പരസ്യവിചാരണ ചെയ്യുന്നവർക്കെതിരെ നിയമം പ്രയോഗിക്കപ്പെടാത്തതിലെ വൈരുധ്യവും അവർ ചൂണ്ടിക്കാട്ടുന്നു. നിയമങ്ങൾ വെറും പ്രഹസനമായി നിലനിൽക്കുന്നതിലെ വേദനയും രോഷവുമാണ് ഈ വിമർശനങ്ങളുടെ കാതൽ.

​JJ Act, Kerala Police Act, സ്ത്രീ സുരക്ഷാ നിയമങ്ങൾ എന്നിവയെല്ലാം ശക്തമായി നിലനിൽക്കുന്നുണ്ടെങ്കിലും, അവ യഥാർത്ഥത്തിൽ ആർക്കുവേണ്ടിയാണ് പ്രയോജനപ്പെടുന്നത് എന്ന ചോദ്യമാണ് പോസ്റ്റ് ആവർത്തിക്കുന്നത്. നിയമങ്ങൾ ഉണ്ടായിട്ടും അവ ഉപയോഗിക്കേണ്ടി വരുന്നില്ലെന്ന വിചിത്രമായ അവസ്ഥയെ പരിഹാസത്തോടെയുള്ള അഭിനന്ദനങ്ങളിലൂടെ പോസ്റ്റ് അവസാനിപ്പിക്കുന്നു.

അനുപമയുടെ ഫേസ്ബുക് പോസ്റ്റ് ഇങ്ങനെ:

പടിയടച്ചു പിണ്ഡം വക്കലും തേച്ചോട്ടിക്കലും കഴിഞ്ഞു റെസ്റ്റിൽ ആണേൽ അടുത്ത task തരട്ടെ guys.. അടുത്ത മൂന്നു ദിവസത്തേക്ക് പോസ്റ്റ്‌ ഇട്ടു കാശുണ്ടാക്കാനും അല്ലെങ്കിൽ സമൂഹത്തോടുള്ള ഉത്തരവാദിത്തം നിറവേറ്റാനും, അല്ലേൽ ജോലിയും കൂലിയും ഇല്ലാതെ ചൊറികുത്തി ഇരിക്കുന്നവർക്ക് ടൈം പാസ്സ് നും അടുത്ത ബോംബ് തന്നാലോ
ആരംഭിക്കലാമ
എന്താണ് cwc??
ആരാണ് cwc ടെ തലപ്പത്തു ഇരിക്കുന്ന ആൾ?
Neglected children അഥവാ ഉപേക്ഷിക്കപ്പെട്ട, നിവൃത്തി ഇല്ലാതെ അലയുന്ന, കഷ്ടതകൾ അനുഭവിക്കുന്ന അലയുന്ന കുട്ടികളെ സംരക്ഷിക്കാൻ വേണ്ടി ഉണ്ടാക്കപ്പെട്ട body ആണ് cwc.
ഭരണകക്ഷി ടെ ആളാവും cwc ടെ തലപ്പത്തു ഇരിക്കുന്നതും.
Mandated under Section 27 of the Juvenile Justice (Care and Protection of Children) Act, 2015 (JJ Act, 2015).
Note the point. 2015 ൽ വന്ന സംഭവം ആണ്. അപ്പോൾ അതനുസരിച്ചു ഒരു ജില്ലയിലും neglected children ഇപ്പോൾ ഉണ്ടാവാൻ പാടില്ല..
എറണാകുളം ജില്ലയിൽ ഏതായാലും എല്ലാ കുട്ടികളും വളരെ സുരക്ഷിതരാണ്. നോർത്ത് പാലത്തിന്റെ അടിയിലും, broadway ലും ഒരു സിഗ്നലുകളിലും ബലൂൺ വിക്കുന്ന കുട്ടികളെയോ കാർ തുടക്കാൻ വരുന്ന കുട്ടികളെയോ, പേന യും കൊടിയും ഫ്ലവേഴ്‌സും വിൽക്കാൻ വരുന്ന കുട്ടികളെയോ ഒന്നും കാണാറില്ല..നമ്മുടെ juvenile ഹോമിൽ കുട്ടികളെയില്ല.. എല്ലാം അടച്ചു പൂട്ടി സ്പാ centres ആക്കാൻ ആണ് പ്ലാൻ… Incredible എറണാകുളം .
അന്യ ജില്ലകളിലെ അവസ്ഥ എന്താണെന്ന് എനിക്കറിയില്ല… എറണാകുളം, തെരുവ് കുട്ടികൾ ഫ്രീ ജില്ല ആണ്…
അതുകൊണ്ട് തന്നെ cwc ക്ക് അമ്മ മാന്തി,
അച്ഛൻ പിച്ചി എന്നിങ്ങനെ ഉള്ള കേസ് എടുക്കേണ്ടി വരും.. ആത്മാർഥമായി #ജോലി ചെയ്യണ്ടേ
ഞാൻ ജയിലിൽ കിടക്കുമ്പോ പിറ്റേന്ന് ഒരു അമ്മ കരഞ്ഞു കൊണ്ട് വന്നു കയറി.. എന്താ കേസ് ന്ന് ചോദിച്ചപ്പോ “j j act “ആണെന്ന്… മോനെ പിച്ചി, മോൻ പിറ്റേന്ന് ക്ലാസിൽ പോയപ്പോ ടീച്ചർ പാട് കണ്ടു.. കരുണാ നിധി ആയ ടീച്ചർ അപ്പൊത്തന്നെ cwc ക്ക് റിപ്പോർട്ട്‌ ചെയ്തു!!!.. അമ്മ ദേ അകത്തു..അച്ഛൻ ആണേൽ അമ്മക്ക് ജാമ്യം എടുക്കാൻ പുറത്തു നെട്ടോട്ടം… കൊച്ചോ??
അപ്പന്റേം അമ്മേടേം അടുത്തു ജീവിക്കേണ്ട കൊച്ചിനെ എവിടെയോ കൊണ്ട് ഇട്ടേക്കുന്നു
ഇനി ഇങ്ങനെ ഒരു act ഉണ്ട്
Section 116 of the Kerala Police Act, 2011, deals with offenses by police officers, specifically concerning vexatious arrest, search, seizure, violence, or misconduct, including actions like torture, unlawful violence, and grave misconduct against anyone in custody or contact, carrying penalties for such serious violations. It’s a key provision for police accountability, addressing abuse of power and ensuring officers uphold human rights, with penalties involving imprisonment or fines, and it’s part of Chapter V focusing on duties and responsibilities of officers.
ഇങ്ങനൊരു act അനുസരിച്ചു ഇതുവരെ ഏതെങ്കിലും പോലീസിനെ ശിക്ഷിച്ചിട്ടുണ്ടോ?
എത്രയോ നിരപരാധികളെ പിടിച്ചു കൊണ്ട് പോയി ജയിലിൽ ഇട്ടു അവസാനം അവർ കുറ്റക്കാർ അല്ല എന്ന് കണ്ടെത്തുമ്പോൾ എന്ത് കൊണ്ട് പോലീസുകാരെ ശിക്ഷിക്കുന്നില്ല??…കാരണം കേരള പോലീസ് കാർ കുറ്റം ചെയ്യില്ല. അവർ വളരെ നീതിമാന്മാരും ആണ്.. എനിക്കേറ്റവും ഇഷ്ടം കേരള പോലീസിന്റെ fb പേജ് ആണ് ..
The “modesty of woman act” refers to Indian Penal Code (IPC) Sections 354 and 509 (now largely replaced by Bharatiya Nyaya Sanhita, BNS, Sections 74 & 79), which criminalize actions like assault or using criminal force to outrage a woman’s modesty (Section 354/BNS 74) and uttering words, gestures, or intruding on privacy to insult a woman’s modesty (Section 509/BNS 79). These laws protect a woman’s inherent sense of modesty, covering both physical acts (like forced disrobing) and verbal/gestural insults or invasions of privacy, with recent updates increasing punishments and clarifying scope, emphasizing dignity and safety.
ഇനി ഇങ്ങനൊരു act ഉണ്ട്.. സ്ത്രീകളെ പരസ്യ വിചാരണ ചെയ്യുന്ന പോസ്റ്റ്‌ man മാരും യൂട്യൂബോളികളും ചെയ്യുന്നതിന് കിട്ടിയേക്കാവുന്ന വകുപ്പ്… പക്ഷെ നമ്മുടെ നാട്ടിൽ ആരും അത് ചെയ്യാറില്ല.. മാന്യമായിട്ടാണ് നമ്മുടെ ആൾക്കാർ സോഷ്യൽ മീഡിയ കൈകാര്യം ചെയ്യുന്നത്.. കുറ്റാരോപിത മാത്രമായ ഒരാളെ, അയാൾ കുറ്റക്കാരി ആണെന്ന് തെളിഞ്ഞാൽ മാത്രമേ നമ്മൾ അയാളെ കടിച്ചു കീറാറുള്ളു.. നന്മ മരങ്ങൾ ആയ നമ്മൾ മികച്ച ഒരു സമൂഹം ആണ്
So ഇവിടെ juvenile ജസ്റ്റിസ്‌ act ഉണ്ട്, പോലീസ് കാർ നിരപരാധികളെ അറസ്റ്റ് ചെയ്തു ജയിലിൽ ഇട്ടാൽ മൂന്ന് വർഷം വരെ അവർ അകത്തു കിടക്കാവുന്ന വകുപ്പ് ഉണ്ട്, സ്ത്രീകളെ അനാവശ്യം പറഞ്ഞാൽ അഴി എണ്ണാനുള്ള വകുപ്പും ഉണ്ട്. ബട്ട്‌ ഇതൊന്നും ഇവിടെ ഉപയോഗിക്കേണ്ടി വരാറില്ല …
So ഞാൻ ഇനി അടുത്ത പോസ്റ്റ്‌ ൽ പൊട്ടിക്കാൻ പോകുന്ന ബോംബിൽ എനിക്കെതിരെ ആക്ഷൻ എടുക്കാനുള്ള ഒരു വകുപ്പും ഉണ്ടാവില്ല
Stay tuned…ഫോട്ടോ ലേറ്റസ്റ്റ് ആണ്…
എന്ന്
ലോകത്തിലെ ഏറ്റവും ക്രൂരയായ അമ്മ