അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.റഷ്യൻ എയർലൈൻ ജീവനക്കാരിയായ യുവതിയെ ദുബായിലെ ഒരു ഹോട്ടലിൽ അതിക്രൂരമായി കൊലപ്പെടുത്തിയ കേസിൽ മുൻ ഭർത്താവ് അറസ്റ്റിലായി. റഷ്യൻ വിമാനക്കമ്പനിയായ പോബെഡയിൽ ജീവനക്കാരിയായിരുന്ന 25-കാരിയായ അനസ്താസിയയാണ് കൊല്ലപ്പെട്ടത്. സംഭവവുമായി ബന്ധപ്പെട്ട് 41 വയസ്സുള്ള ആൽബർട്ട് മോർഗനെയാണ് റഷ്യൻ അധികൃതർ അറസ്റ്റ് ചെയ്തത്.
അനസ്താസിയയും നിയമോപദേശകനായി ജോലി ചെയ്യുന്ന മോർഗനും രണ്ട് വർഷത്തെ ദാമ്പത്യത്തിന് ശേഷമാണ് വേർപിരിഞ്ഞത്. വിവാഹബന്ധം വേർപെടുത്തിയെങ്കിലും മുൻ ഭാര്യയുടെ സ്വകാര്യ സന്ദേശങ്ങൾ മോർഗൻ നിരന്തരം പരിശോധിച്ചിരുന്നു.
ഈ പരിശോധനയിൽ, പണത്തിനുവേണ്ടി അനസ്താസിയ ലൈംഗികവൃത്തിയിൽ ഏർപ്പെട്ടിരുന്നു എന്ന സംശയം ഇയാൾക്കുണ്ടായി. ഇതാണ് കൊലപാതകത്തിലേക്ക് നയിച്ച പ്രധാന കാരണം. സംശയം ബലപ്പെട്ടതോടെ റഷ്യയിൽ നിന്നും 4345 കിലോമീറ്റർ സഞ്ചരിച്ച് മോർഗൻ ദുബായിലെത്തുകയായിരുന്നു.
കൊലപാതകം ആസൂത്രണം ചെയ്ത മോർഗൻ, ഹോട്ടലിലെ അലക്കുശാലയിൽ നിന്നെടുത്ത വസ്ത്രം ധരിച്ച് ജീവനക്കാരിയാണെന്ന് തെറ്റിദ്ധരിപ്പിച്ചാണ് അനസ്താസിയയുടെ മുറിയിൽ പ്രവേശിച്ചത്. തുടക്കത്തിൽ ദേഹത്ത് പെയിന്റ് ഒഴിക്കാനും മുടി മുറിക്കാനുമായിരുന്നു പദ്ധതി.
എന്നാൽ, മുറിയിൽ വെച്ച് ഇരുവരും തമ്മിലുണ്ടായ രൂക്ഷമായ തർക്കം ആക്രമണത്തിൽ കലാശിച്ചു. ന്യൂയോർക്ക് പോസ്റ്റിന്റെ റിപ്പോർട്ട് അനുസരിച്ച്, അനസ്താസിയയുടെ കഴുത്തിലും കൈകാലുകളിലുമായി 15 കുത്തേറ്റ മുറിവുകളുണ്ടായിരുന്നു. ക്രൂരമായ ആക്രമണത്തിനൊടുവിൽ രക്തത്തിൽ കുളിച്ച നിലയിൽ യുവതിയുടെ മൃതദേഹം മണിക്കൂറുകൾക്ക് ശേഷമാണ് കണ്ടെത്തിയത്.
കൊലപാതകത്തിനു ശേഷം മോർഗൻ റഷ്യയിലേക്ക് മടങ്ങി. ഹോട്ടൽ ജീവനക്കാർ വിവരമറിയിച്ചതിനെത്തുടർന്ന് സ്ഥലത്തെത്തിയ ദുബായ് പോലീസ് സിസിടിവി ദൃശ്യങ്ങൾ പരിശോധിച്ച് പ്രതിയെ തിരിച്ചറിഞ്ഞു. തുടർന്ന് റഷ്യൻ അധികൃതരുമായി ബന്ധപ്പെട്ട് മോർഗനെ പിടികൂടുകയായിരുന്നു.
ക്രിമിനൽ പശ്ചാത്തലമുള്ള ഇയാൾ ലഹരിമരുന്ന് കേസുകളിൽ നേരത്തെ ഏഴ് വർഷം ജയിൽ ശിക്ഷ അനുഭവിച്ചിട്ടുണ്ട്. കൂടാതെ, ഇരുവരും തമ്മിൽ മുൻപും കുടുംബപരമായ തർക്കങ്ങളുണ്ടായിരുന്നതായും അനസ്താസിയ പരാതി നൽകിയിരുന്നെങ്കിലും പിന്നീട് പിൻവലിച്ചതായും റിപ്പോർട്ടുകളുണ്ട്.
ജയിൽ ശിക്ഷയിൽ നിന്ന് രക്ഷപ്പെടാനായി മോർഗൻ ഒരു ഒടുവിലത്തെ ശ്രമം നടത്തി. യുക്രെയ്ൻ യുദ്ധത്തിൽ പങ്കെടുക്കാൻ താൻ സന്നദ്ധനാണെന്ന് ഇയാൾ അധികൃതരെ അറിയിച്ചെങ്കിലും ആ നീക്കം വിജയിച്ചില്ല. മോർഗനെ റഷ്യൻ പോലീസ് റിമാൻഡ് ചെയ്യുകയും കേസിൽ തുടർ നടപടികൾ സ്വീകരിക്കുകയും ചെയ്തു.
