അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.നടൻ സിദ്ധാർത്ഥ് പ്രഭു മദ്യലഹരിയിൽ കാറിടിച്ച് ഒരാൾക്ക് പരിക്കേൽപ്പിച്ച സംഭവത്തിൽ പോലീസ് കസ്റ്റഡിയിലായതിന് പിന്നാലെ, ഈ കേസിനേക്കാൾ ഞെട്ടിക്കുന്ന വെളിപ്പെടുത്തലുകളുമായി ഇൻഫ്ലുവൻസർ അന്ന ജോൺസൺ രംഗത്തെത്തിയിരിക്കുന്നു.
കേവലം ഒരു വാഹനാപകടത്തിനപ്പുറം, 2021-ൽ കേരളത്തെ നടുക്കിയ മോഡലുകളുടെ മരണവുമായി ഈ സംഭവത്തിന് ബന്ധമുണ്ടെന്ന് സൂചിപ്പിക്കുന്ന അന്ന ജോൺസന്റെ വാക്കുകൾ യുവതലമുറയിലെ ലഹരി ഉപയോഗത്തെക്കുറിച്ചും സിനിമാരംഗത്തെ ചില മാഫിയ ബന്ധങ്ങളെക്കുറിച്ചുമുള്ള ആശങ്കകൾ വർദ്ധിപ്പിക്കുകയാണ്.
സിദ്ധാർത്ഥ് പ്രഭുവിനെതിരായ അന്ന ജോൺസന്റെ പ്രതികരണം വ്യക്തിപരമായ സങ്കടം പങ്കുവെച്ചുകൊണ്ടാണ് തുടങ്ങുന്നത്. 2021 ഒക്ടോബർ 21-ന് കൊച്ചിയിലെ ‘നമ്പർ 18’ ഹോട്ടലിൽ വെച്ച് നടൻ ഉൾപ്പെടെയുള്ളവരുമായി കണ്ടുമുട്ടിയതും ഫോട്ടോകളെടുത്തതും അന്ന ജോൺസൺ ഓർത്തെടുത്തു. ആ കൂടിക്കാഴ്ചയ്ക്ക് ശേഷം അന്ന് ആ ഹോട്ടലിൽ നടന്ന ഡിജെ പാർട്ടിയുമായി ബന്ധപ്പെട്ട് ദുരൂഹതകളും രണ്ട് മോഡലുകളുടെ മരണവും സംഭവിച്ചതിനെ അന്ന ജോൺസൺ ചൂണ്ടിക്കാട്ടി.
അന്ന് കൊച്ചിൻ സിറ്റി പോലീസ് കമ്മീഷണർക്ക് പരാതി നൽകുകയും വിഷയം ചാനലുകൾ ഏറ്റെടുക്കുകയും ചെയ്ത സാഹചര്യത്തിൽ, തന്റെ ഫോട്ടോകളും വീഡിയോകളും പുറത്തുവിടരുതെന്ന് സിദ്ധാർത്ഥ് അഭ്യർത്ഥിച്ചിരുന്നതായി അവർ വെളിപ്പെടുത്തി. താൻ മാത്രമല്ല, പ്രമുഖരായ നായികാനടികളും മറ്റ് ചെറിയ പിള്ളേരുമെല്ലാം അവിടെ ഉണ്ടായിരുന്നു എന്നും, ‘ചേച്ചി ഞങ്ങളെ ഇതിലേക്ക് വലിച്ചിഴയ്ക്കരുതേ’ എന്ന് അവർ അപേക്ഷിച്ചതിനെത്തുടർന്ന് താൻ വാക്ക് പാലിച്ചെന്നും അന്ന ജോൺസൺ പറഞ്ഞു.
ഈ ഡിസംബർ 25 വരെ താൻ ആ വാക്ക് പാലിച്ചത്, “ഇനി ഇതിന്റെ പുറകെ പോകില്ല, നന്നായിക്കോളാം” എന്ന സിദ്ധാർത്ഥിന്റെ ഉറപ്പ് വിശ്വസിച്ചാണെന്നും എന്നാൽ നിലവിലെ അവസ്ഥ അതീവ ദുഃഖകരമാണെന്നും അവർ കൂട്ടിച്ചേർത്തു. ‘ഉപയോഗിക്കുന്നവരെയല്ല, ഇത് പലരിലേക്കും എത്തിക്കുന്ന മാഫിയകളെയാണ് പിടിക്കേണ്ടത്’ എന്നും അവർ ശക്തമായി അഭിപ്രായപ്പെട്ടു.
ഇതിലൂടെ കേവലം ലഹരി ഉപയോഗത്തിനപ്പുറം, സിനിമാ മേഖലയിലെ യുവതാരങ്ങളെ ഇത്തരം ദുശ്ശീലങ്ങളിലേക്ക് ആകർഷിക്കുന്ന ഒരു സംഘം പ്രവർത്തിക്കുന്നുണ്ടെന്ന ഗുരുതരമായ സൂചനയാണ് അന്ന ജോൺസൺ നൽകുന്നത്.
ഇവിടെ അന്ന ജോൺസൺ പരാമർശിക്കുന്നത് 2021-ൽ കൊച്ചിയിൽ നടന്ന വാഹനാപകടത്തിൽ മുൻ മിസ് കേരള അൻസി കബീർ, റണ്ണറപ്പ് അഞ്ജന ഷാജൻ എന്നിവർ മരിച്ച സംഭവമാണ്. ഇവർ പങ്കെടുത്ത ഡിജെ പാർട്ടിയുടെ ദുരൂഹതയുമായി ബന്ധപ്പെട്ട് അന്ന ജോൺസൺ അന്ന് തന്നെ ആരോപണങ്ങൾ ഉന്നയിച്ചിരുന്നു.
പാർട്ടി കഴിഞ്ഞ് മടങ്ങുന്നതിനിടെയാണ് മോഡലുകൾ സഞ്ചരിച്ച കാർ അപകടത്തിൽപ്പെട്ടത്. ഇവരുടെ സുഹൃത്ത് മുഹമ്മദ് ആഷിഖും പരിക്കേറ്റ് ഒരാഴ്ചയ്ക്ക് ശേഷം മരിച്ചിരുന്നു. കാറോടിച്ച അബ്ദുൾ റഹ്മാൻ മദ്യപിച്ചിരുന്നതായി പോലീസ് കണ്ടെത്തിയിരുന്നു. ഈ അപകടമരണത്തിന് പിന്നിൽ ദുരൂഹതയുണ്ടെന്നും അന്ന ജോൺസൺ അന്ന് ആരോപിച്ചിരുന്നു. സിദ്ധാർത്ഥ് പ്രഭുവിന്റെ ഇപ്പോഴത്തെ അറസ്റ്റോടെ, അന്ന ജോൺസന്റെ അന്നത്തെ ആരോപണങ്ങൾ വീണ്ടും പൊതുസമൂഹത്തിൽ ചർച്ചാവിഷയമാക്കുകയാണ്
