അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.അർജുൻ റെഡ്ഡി, അനിമൽ തുടങ്ങിയ ചിത്രങ്ങളിലൂടെ ശ്രദ്ധ നേടിയ സംവിധായകൻ സന്ദീപ് റെഡ്ഡി വാങ്ക ഒരുക്കുന്ന ഏറ്റവും പുതിയ ചിത്രമാണ് ‘സ്പിരിറ്റ്’. റിബൽ സ്റ്റാർ പ്രഭാസ് നായകനാകുന്ന പാൻ- ഇന്ത്യൻ ചിത്രം സ്പിരിറ്റിന്റെ ഫസ്റ്റ് ലുക്ക് പോസ്റ്റർ പുറത്തിറങ്ങി. പ്രഭാസും തൃപ്തി ദിമ്രിയും ഒന്നിച്ചുള്ള പോസ്റ്റർ ആണ് പുറത്തുവന്നിരിക്കുന്നത്. സോഷ്യൽ മീഡിയയിലെല്ലാം മികച്ച പ്രതികരണമാണ് പോസ്റ്ററിന് ലഭിക്കുന്നത്.
പുതുവർഷത്തോട് അനുബന്ധിച്ചാണ് ഫസ്റ്റ് ലുക്ക് പുറത്തുവിട്ടത്. ദേഹത്താകെ പരിക്കുകളും മുറിവിൽവെച്ചുകെട്ടലുകളുമായി സ്റ്റൈലിഷ് ലുക്കിലാണ് പ്രഭാസ്. പ്രഭാസിന്റെ ഒരു കൈയിൽ മദ്യക്കുപ്പിയുമുണ്ട്. പ്രഭാസിന് സിഗരറ്റ് കത്തിച്ചുകൊടുക്കുന്നതായാണ് തൃപ്തി പോസ്റ്ററിലുള്ളത്. നീട്ടിവളർത്തിയ മുടിയും താടിയുമുള്ള ലുക്കിലാണ് പ്രഭാസ്.
പ്രഭാസിനും തൃപ്തിക്കും പുറമേ വിവേക് ഒബ്റോയ്, കാഞ്ചന, പ്രകാശ് രാജ് എന്നിവരും ചിത്രത്തിൽ പ്രധാനവേഷങ്ങളിലെത്തും. പോലീസ് വേഷത്തിലാണ് പ്രഭാസ് ചിത്രത്തിലെത്തുന്നതെന്നാണ് സൂചന.
സന്ദീപ് തന്നെയാണ് ചിത്രത്തിന് തിരക്കഥയൊരുക്കുന്നതും എഡിറ്റിങ് നിർവഹിക്കുന്നതും. ഭൂഷൺ കുമാർ, പ്രണവ് റെഡ്ഡി വാങ്ക, ക്രിഷൻ കുമാർ, പ്രഭാകർ റെഡ്ഡി വാങ്ക എന്നിവരാണ് നിർമാതാക്കൾ. തെലുങ്ക്, ഹിന്ദി, തമിഴ്, കന്നഡ, മലയാളം, മാൻഡറിൻ, ജാപ്പനീസ്, കൊറിയൻ ഭാഷകളിലായി ചിത്രം പുറത്തിറങ്ങും.
