അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.യഷിനെ നായകനാക്കി ഗീതു മോഹൻദാസ് സംവിധാനം ചെയ്യുന്ന പുതിയ ചിത്രം ”ടോക്സിക്കി’ന്റെ അണിയറ ദൃശ്യങ്ങൾ ചോർന്നു. ലേഡി സൂപ്പർസ്റ്റാർ നയൻതാരയും യഷും ഒന്നിച്ചുള്ള ഒരു വീഡിയോ ആണ് സോഷ്യൽ മീഡിയയിൽ വ്യാപകമായി പ്രചരിക്കുന്നത്. ഇതോടെ ചിത്രത്തിലെ കഥാപാത്രങ്ങളെക്കുറിച്ചുള്ള ചെറിയ ഹിന്റ് ആരാധകർക്ക് ലഭിച്ചു.
കഥാപാത്രങ്ങളുടെ രൂപഭാവങ്ങൾ കണ്ട് ഈ സിനിമയെ പ്രശസ്തമായ ‘പീക്കി ബ്ലൈൻഡേഴ്സ്’, ‘ബോംബെ വെൽവെറ്റ്’ എന്നീ സൃഷ്ടികളുമായി താരതമ്യം ചെയ്യുകയാണ് ആരാധകർ. കെജിഎഫ്: ചാപ്റ്റർ 2-ന് ശേഷമുള്ള യാഷിന്റെ വലിയ തിരിച്ചുവരവായി ആരാധകർ കാണുന്ന ചിത്രമാണ് ടോക്സിക്. ഡിസംബർ മുതൽ ചിത്രത്തിലെ പ്രധാന കഥാപാത്രങ്ങളെ പരിചയപ്പെടുത്തിക്കൊണ്ടുള്ള പോസ്റ്ററുകൾ അണിയറപ്രവർത്തകർ പുറത്തുവിട്ടിരുന്നു. രക്തം നിറഞ്ഞ ബാത്ത് ടബ്ബിൽ പരുക്കൻ ലുക്കിൽ ഇരിക്കുന്ന യാഷിന്റെ ചിത്രവും, ‘ഗംഗ’ എന്ന കരുത്തുറ്റ കഥാപാത്രമായി തോക്കേന്തി നിൽക്കുന്ന നയൻതാരയുടെ ലുക്കും ഇതിനോടകം തന്നെ സോഷ്യൽ മീഡിയയിൽ വൈറലായിട്ടുണ്ട്. ഇതിനിടയിലാണ് അണിയറ ദൃശ്യം പുറത്തുവന്നത്.
The Gang Is Ready 💥💣
TOXIC x PEAKY BLINDERS @TheNameIsYash #YashBOSS pic.twitter.com/X3JoSMW5go
— iamRavan (@Ravan__420) December 2, 2024
ഈ വീഡിയോയിൽ കറുത്ത ഗൗൺ ധരിച്ച നയൻതാരയും വെള്ള വസ്ത്രമണിഞ്ഞ യാഷും ഒരാൾക്ക് ഹസ്തദാനം നൽകുന്നതായി കാണാം. ചിത്രത്തിൽ എലിസബത്ത് എന്ന വേഷം ചെയ്യുന്ന ഹുമ ഖുറേഷിയെയും ഈ വീഡിയോയുടെ പശ്ചാത്തലത്തിൽ കാണാൻ സാധിക്കും. നയൻതാരയെ കൂടാതെ കിയാര അദ്വാനിയും ഈ ചിത്രത്തിൽ ഒരു പ്രധാന വേഷത്തിൽ എത്തുന്നുണ്ട്. നാദിയ എന്ന തന്റെ കഥാപാത്രം തന്റെ കരിയറിലെ തന്നെ ഏറ്റവും കടുപ്പമേറിയതാണെന്ന് കിയാര വെളിപ്പെടുത്തിയിരുന്നു.
പലരും ഈ ചിത്രത്തെ അനുരാഗ് കശ്യപിന്റെ ‘ബോംബെ വെൽവെറ്റ്’, പ്രശസ്ത അന്താരാഷ്ട്ര സീരീസായ ‘പീക്കി ബ്ലൈൻഡേഴ്സ്’ എന്നിവയുമായി താരതമ്യം ചെയ്യുന്നുണ്ട്. ചിത്രത്തിന്റെ മേക്കിംഗിലും അന്തരീക്ഷത്തിലും ‘പീക്കി ബ്ലൈൻഡേഴ്സ്’ ശൈലി പ്രകടമാണെന്ന് ചിലർ അഭിപ്രായപ്പെടുമ്പോൾ, ചിത്രം ‘ബോംബെ വെൽവെറ്റ്’ പോലെ പരാജയപ്പെടുമോ എന്ന ആശങ്കയും ചില ആരാധകർ പങ്കുവെക്കുന്നുണ്ട്. കിയാര അദ്വാനിയുടെ കഥാപാത്രത്തെക്കുറിച്ചും സിനിമയുടെ പ്രമേയത്തെക്കുറിച്ചും സോഷ്യൽ മീഡിയയിൽ പലവിധത്തിലുള്ള ചർച്ചകൾ പുരോഗമിക്കുകയാണ്. ഗീതു മോഹൻദാസും യഷും ചേർന്ന് തിരക്കഥയൊരുക്കിയ ഈ ചിത്രം കെവിഎൻ പ്രൊഡക്ഷൻസും മോൺസ്റ്റർ മൈൻഡ് ക്രിയേഷൻസും ചേർന്നാണ് നിർമ്മിക്കുന്നത്. കന്നഡയിലും ഇംഗ്ലീഷിലുമായി നിർമ്മിക്കുന്ന ചിത്രം മറ്റ് പ്രധാന ഇന്ത്യൻ ഭാഷകളിലേക്ക് മൊഴിമാറ്റം ചെയ്തും പുറത്തിറങ്ങും. രാജീവ് രവി ഛായാഗ്രഹണവും രവി ബസ്രൂർ സംഗീതവും നിർവ്വഹിക്കുന്ന ഈ ചിത്രത്തിന്റെ എഡിറ്റർ ഉജ്വൽ കുൽക്കർണിയാണ്.
