അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഇന്ത്യയും അമേരിക്കയും തമ്മിലുള്ള വ്യാപാര ബന്ധത്തിൽ വിള്ളലുകൾ ചൂണ്ടിക്കാട്ടിയുള്ള കോൺഗ്രസ് നേതാവ് പൃഥ്വിരാജ് ചവാന്റെ വിമർശനങ്ങൾ വലിയ രാഷ്ട്രീയ വിവാദങ്ങൾക്ക് തിരികൊളുത്തി. അമേരിക്കയുടെ താരിഫ് വർധനവിനെതിരെ മോദി സർക്കാരിനെ വിമർശിക്കുന്നതിനിടെ, പ്രധാനമന്ത്രിയെ ട്രംപ് തട്ടിക്കൊണ്ടുപോകുമോ എന്ന ചവാന്റെ പ്രസ്താവന സമൂഹമാധ്യമങ്ങളിൽ വൻ വിമർശനങ്ങൾക്ക് വഴിവെച്ചു.
എന്നാൽ, ചവാന്റെ ആശങ്കകൾ നിലനിൽക്കുമ്പോഴും യുഎസിലേക്കുള്ള ഇന്ത്യയുടെ കയറ്റുമതിയിൽ വർധനവുണ്ടായെന്ന കണക്കുകളും ഇതോടൊപ്പം പുറത്തുവന്നു.
യുഎസ് ഏർപ്പെടുത്തിയ 50% നികുതി വർധനവ് ഇന്ത്യൻ വ്യാപാരികൾക്ക് കനത്ത തിരിച്ചടിയാകുമെന്ന് ചൂണ്ടിക്കാട്ടിയാണ് പൃഥ്വിരാജ് ചവാൻ മോദി സർക്കാരിനെതിരെ വിമർശനം ഉന്നയിച്ചത്. ഇത്രയും ഉയർന്ന നികുതി നിലനിൽക്കെ വ്യാപാരം അസാധ്യമാണെന്നും ഇത് ഇന്ത്യയിൽ നിന്നുള്ള കയറ്റുമതിയെ ദോഷകരമായി ബാധിക്കുമെന്നും അദ്ദേഹം പറഞ്ഞു.
നേരിട്ടുള്ള നിരോധനം സാധ്യമല്ലാത്തതിനാൽ നികുതി വർധനവിനെ ട്രംപ് ഒരു ആയുധമായി ഉപയോഗിക്കുകയാണെന്നും ഇത് രാജ്യത്തിന് മറ്റ് വിപണികൾ തേടേണ്ട അവസ്ഥയുണ്ടാക്കുമെന്നും ചവാൻ കൂട്ടിച്ചേർത്തു. മോദി സർക്കാർ അമേരിക്കൻ തീരുമാനങ്ങൾക്ക് മുന്നിൽ വഴങ്ങുകയാണെന്നും ഇന്ത്യയുടെ നിർണായക വിഷയങ്ങളിൽ പോലും ട്രംപ് തീരുമാനങ്ങൾ എടുക്കുകയാണെന്നും അദ്ദേഹം വിമർശിച്ചു.
ഇതിനിടെയാണ് വെനസ്വേലൻ പ്രസിഡന്റിനെ അമേരിക്കൻ സൈന്യം പിടികൂടി വിചാരണയ്ക്കായി കൊണ്ടുപോയ സംഭവം സൂചിപ്പിച്ച്, ഇന്ത്യയുടെ പ്രധാനമന്ത്രിയെയും ട്രംപ് തട്ടിക്കൊണ്ടുപോകുമോ എന്ന ചവാന്റെ ചോദ്യം വിവാദമായത്. ആണവ ശക്തിയായ ഇന്ത്യയെക്കുറിച്ചും ലോകത്തെ ഏറ്റവും വലിയ ജനാധിപത്യ രാജ്യത്തെ പ്രധാനമന്ത്രിയെക്കുറിച്ചും ഇത്തരമൊരു ചോദ്യം ഉന്നയിച്ചത് വിവരക്കേടാണെന്നും ‘മസ്തിഷ്ക മരണം’ സംഭവിച്ചതിന് തുല്യമാണെന്നും വിമർശനം ഉയർന്നു.
മുൻ ജമ്മുകശ്മീർ ഡിജിപി എസ്.പി. വൈദ് ഉൾപ്പെടെയുള്ള പ്രമുഖർ ചവാന്റെ പ്രസ്താവനയെ ശക്തമായി അപലപിച്ചു. രാജ്യത്തെ മുഴുവൻ അപമാനിക്കുന്ന പ്രസ്താവനയാണിതെന്നും ഇത്തരം ഗൗരവകരമായ വിഷയങ്ങളിൽ കൂടുതൽ വിവേകം കാണിക്കണമെന്നും അദ്ദേഹം ആവശ്യപ്പെട്ടു.
