അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സമൂഹമാധ്യമങ്ങളിൽ അതിജീവിതയെ അധിക്ഷേപിച്ചെന്ന കേസിൽ, ജാമ്യവ്യവസ്ഥ ലംഘിച്ചതിന് രാഹുൽ ഈശ്വറിന് തിരുവനന്തപുരം അഡീഷണൽ ചീഫ് ജുഡീഷ്യൽ മജിസ്ട്രേറ്റ് കോടതി നോട്ടീസയച്ചു. യൂത്ത് കോൺഗ്രസ് നേതാവ് രാഹുൽ മാങ്കൂട്ടത്തിൽ പ്രതിയായ ബലാത്സംഗക്കേസിലെ അതിജീവിതയെ അധിക്ഷേപിച്ച കേസിലാണ് പ്രോസിക്യൂഷൻ നൽകിയ അപേക്ഷ പരിഗണിച്ച് കോടതിയുടെ നടപടി.
കേസുമായി ബന്ധപ്പെട്ട് ജാമ്യത്തിൽ കഴിയുന്ന രാഹുൽ ഈശ്വർ, ജാമ്യവ്യവസ്ഥകൾ ലംഘിച്ചു എന്ന് ചൂണ്ടിക്കാട്ടിയാണ് പ്രോസിക്യൂഷൻ കോടതിയെ സമീപിച്ചത്. അതിജീവിതയെ അപകീർത്തിപ്പെടുത്തുന്ന തരത്തിൽ സാമൂഹിക മാധ്യമങ്ങളിൽ രാഹുൽ ഈശ്വർ പ്രവർത്തിച്ചുവെന്നാണ് പ്രോസിക്യൂഷന്റെ പ്രധാന വാദം.
ഈ മാസം 19-ാം തീയതി രാഹുൽ ഈശ്വർ നേരിട്ടോ അല്ലെങ്കിൽ അഭിഭാഷകൻ മുഖേനയോ കോടതിയിൽ ഹാജരാകണം എന്നാണ് നോട്ടീസിൽ പ്രധാനമായി ആവശ്യപ്പെട്ടിരിക്കുന്നത്. എന്തുകൊണ്ട് ജാമ്യം റദ്ദാക്കിക്കൂടാ എന്നതിനെക്കുറിച്ച് തൃപ്തികരമായ കാരണം ബോധിപ്പിക്കണം എന്നും കോടതി നിർദ്ദേശിച്ചു.
പ്രോസിക്യൂഷന്റെ അപേക്ഷയിൽ കോടതി നോട്ടീസ് അയച്ച സാഹചര്യത്തിൽ, രാഹുൽ ഈശ്വർ നൽകുന്ന വിശദീകരണവും തുടർവാദം കേൾക്കലും നിർണ്ണായകമാകും. ഇരുഭാഗങ്ങളുടെയും വാദങ്ങൾ പരിഗണിച്ച ശേഷമാകും ജാമ്യം റദ്ദാക്കുന്നത് സംബന്ധിച്ച അന്തിമ ഉത്തരവ് കോടതി പുറപ്പെടുവിക്കുക.
