അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.നാരങ്ങയുടെ ആരോഗ്യഗുണങ്ങളെ കുറിച്ച് നമുക്ക് ഏവർക്കും അറിയാം. അതുപോലെ അതിന്റെ തോടിനും ഗുണങ്ങൾ ഉണ്ട്. നാരങ്ങയുടെ തോട് നമ്മൾ വലിച്ചെറിയുകയാണ് പതിവ്. എന്നാൽ ഈ നാരങ്ങാത്തോടിന് ഒട്ടേറെ ഗുണങ്ങൾ അടങ്ങിയിരിക്കുന്നു. നാരങ്ങയിലെ പോഷകങ്ങൾ ഏറെയും അടങ്ങിയിട്ടുള്ളത് അതിന്റെ തോടിലാണ്.
സാധാരണയായി കഴിക്കാറില്ലാത്ത നാരങ്ങാത്തൊലി ഭക്ഷണത്തിൽ സുരക്ഷിതമായി ഉൾപ്പെടുത്താം. നന്നായി കഴുകി വൃത്തിയാക്കിയ നാരങ്ങയുടെ തൊലി ചുരണ്ടി സാലഡിലും ഡെസെർട്ടിലും യോഗർട്ട്, ചായ, സൂപ്പ് എന്നിവയിലും ചേർക്കാം.
ഹൃദ്രോഗസാധ്യത കുറയ്ക്കും
നാരങ്ങാത്തൊലിയിലടങ്ങിയ ബയോ ആക്ടീവ് സംയുക്തങ്ങൾ ആയ ഫ്ലേവനോയ്ഡുകളും ഫൈബറും ഹൃദയസംബന്ധമായ ആരോഗ്യം മെച്ചപ്പെടുത്തും. അമിതഭാരവും പൊണ്ണത്തടിയും ഉളള കൗമാരക്കാരിൽ നാരങ്ങാത്തൊലി അടങ്ങിയ സപ്ലിമെന്റുകൾ കഴിച്ചവരുടെ രക്തസമ്മർദവും ചീത്ത കൊളസ്ട്രോളും (LDL) കുറഞ്ഞതായി ഇറാൻ യൂണിവേഴ്സിറ്റി ഓഫ് മെഡിക്കൽ സയൻസസ് നടത്തിയ പഠനം പറയുന്നു.
വായയുടെ ആരോഗ്യം
നാരങ്ങാത്തൊലിക്ക് ആന്റിബാക്ടീരിയൽ ഗുണങ്ങളുണ്ട്. നാരങ്ങാത്തൊലിയുടെ സത്ത് ഉപദ്രവകരമായ ഓറൽ ബാക്ടീരിയകളുടെ വളർച്ചയെ തടയുന്നതായി ജേണൽ ഓഫ് ഫുഡ് സയൻസ് ആൻഡ് ടെക്നോളജിയിൽ പ്രസിദ്ധീകരിച്ച പഠനം പറയുന്നു. ഇതിലൂടെ മോണയുടെ ആരോഗ്യം വർധിക്കും. ബയോ ആക്റ്റീവ് സംയുക്തങ്ങളുടെ മികച്ച ഉറവിടം കൂടിയാണ് നാരങ്ങാത്തൊലി.
ആന്റിഓക്സിഡന്റുകൾ
ഗുരുതരരോഗങ്ങൾ തടയുന്ന ധാരാളം ആന്റി ഓക്സിഡന്റുകൾ നാരങ്ങാത്തൊലിയിൽ അടങ്ങിയിട്ടുണ്ടെന്ന് ഇന്റർനാഷണൽ ജേണൽ ഓഫ് ഫുഡ് പ്രോപ്പർട്ടീസ് പറയുന്നു. വൈറ്റമിൻ സി, ഫ്ലേവനോയ്ഡുകൾ, ഡി ലിമണേൻ തുടങ്ങിയ ആന്റിഓക്സിഡന്റുകളാണ് നാരങ്ങാത്തൊലിയിലുള്ളത്.
കാൻസർ സാധ്യത കുറയ്ക്കുന്നു
നാരങ്ങാത്തൊലി കാൻസറിനുളള ഒരു ചികിത്സയല്ല. എന്നാൽ നാരങ്ങയുടെയും മറ്റ് നാരകഫലങ്ങളുടെയും തൊലിക്ക് ആന്റി ഓക്സിഡന്റ് ഗുണങ്ങളുള്ളതിനാൽ കാൻസറിനെ പ്രതിരോധിക്കാനുള്ള കഴിവുണ്ട്. ഈ സംയുക്തങ്ങൾ ശരീരത്തിലെ ആരോഗ്യകരമായ കോശങ്ങളുടെ വളർച്ചയ്ക്ക് സഹായിക്കുന്നു. നാരങ്ങയുൾപ്പെടെയുള്ള നാരകഫലങ്ങളുടെയും അവയുടെ തോലിന്റെയും ഉപയോഗം ചിലയിനം കാൻസറുകൾ വരാനുള്ള സാധ്യത കുറയ്ക്കുന്നതായി ഡേറ്റാബേസ് പ്ലാറ്റ്ഫോം ആയ ടെയ്ലർ ആൻഡ് ഫ്രാൻസിസിൽ വന്ന ഒരു പഠനം പറയുന്നു.
