അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.വരുന്ന നിയമസഭാ തിരഞ്ഞെടുപ്പില് യുഡിഎഫ് ചരിത്ര വിജയം നേടുമെന്ന് വോട്ടേഴ്സ് റൈറ്റ്സ് ഫൗണ്ടേഷന് സര്വ്വേ. യുഡിഎഫിന് 91 സീറ്റുകള് നേടാനാകുമെന്നാണ് സര്വ്വെ ഫലം. എല്ഡിഎഫ് 49 സീറ്റുകളില് ഒതുങ്ങും. കഴിഞ്ഞ ലോകസഭ തിരഞ്ഞെടുപ്പിലെയും തദ്ദേശ സ്വയംഭരണ തിരഞ്ഞെടുപ്പിലെയും വിജയം നിയമസഭാ തിരഞ്ഞെടുപ്പിലേക്ക് വ്യാപിപ്പിക്കാന് യുഡിഎഫിന് സാധിക്കും. കേരളത്തിലുടനീളം 2 ലക്ഷം വോട്ടര്മാരുടെ പ്രതികരണങ്ങള് ശേഖരിച്ച് ഡാറ്റ വിശകലനം ചെയ്ത് തയ്യാറാക്കിയതാണ് സര്വേ റിപ്പോര്ട്ട്. വോട്ടേഴ്സ് റൈറ്റ്സ് ഫൗണ്ടേഷനു വേണ്ടി വേണ്ടി പൊളിറ്റിക്കല് സൈക്കോളജിസ്റ്റ് അഡ്വ. അവനീഷ് കോയിക്കരയാണ് സമഗ്ര സര്വേ റിപ്പോര്ട്ട് തയ്യാറാക്കിയത്.
കഴിഞ്ഞ തദ്ദേശ സ്വയംഭരണ സ്ഥാപനങ്ങളിലേയ്ക്കുള്ള തിരഞ്ഞെടുപ്പിലും പാര്ലമെന്റ് തിരഞ്ഞെടുപ്പിലും നടത്തിയ സര്വ്വെ ഫലം കൃത്യമായിരുന്നു. മുഖ്യമന്ത്രി സാധ്യതയില് യുഡിഎഫ് പ്രതിപക്ഷ നേതാവ് വി.ഡി. സതീശനാണ് ഒന്നാമതെന്ന് സര്വേ വ്യക്തമാക്കുന്നു. 28.91 ശതമാനം പിന്തുണയോടെ സതീശന് മുന്നിലാണ്. നിലവിലെ മുഖ്യമന്ത്രി പിണറായി വിജയന് 19.89 ശതമാനം പിന്തുണയാണുള്ളത്. രമേശ് ചെന്നിത്തല (18.21%), ടി.എം. തോമസ് ഐസക് (17.44%), രാജീവ് ചന്ദ്രശേഖര് (11.26%) എന്നിവരാണ് പട്ടികയില് ഇടം പിടിച്ച മറ്റുള്ളവര്. മുഖ്യമന്ത്രിയായി വോട്ടര്മാര് കാണുന്നവരിലെ ഗുണദോഷങ്ങളും റിപ്പോര്ട്ടില് പറയുന്നു.
സര്വ്വെ പ്രകാരം വോട്ട് ശതമാനത്തിലും യുഡിഎഫ് മുന്നിലാണ്. യുഡിഎഫിന് 44.97 ശതമാനം, എല്ഡിഎഫിന് 39.34 ശതമാനം, എന്ഡിഎയ്ക്ക് 14.72ശതമാനം എന്നിങ്ങനെയാണ് സര്വേ പ്രവചനം. മുന്നണികളുടെ നിലവിലെ അനുകൂല-പ്രതികൂല ഘടകങ്ങളും റിപ്പോര്ട്ട് ചര്ച്ച ചെയ്യുന്നു. മണ്ഡലാടിസ്ഥാനത്തിലുള്ള ഭൂരിപക്ഷവും സര്വ്വെ റിപ്പോര്ട്ടിലുണ്ട്. കേരളത്തില് എന്ഡിഎയുടെ വോട്ട് ശതമാനം വര്ധിച്ചിട്ടുണ്ടെങ്കിലും സീറ്റുകളാക്കി മാറ്റാന് കഴിയാത്ത സ്ഥിതിയാണ് തുടരുന്നത്. എന്നാല് നേമം, വട്ടിയൂര്ക്കാവ്, കഴക്കൂട്ടം, മഞ്ചേശ്വരം എന്നിവിടങ്ങളില് എന്ഡിഎ നിര്ണ്ണായക ശക്തിയാകും.
2021ല് 99 സീറ്റുകളോടെ രണ്ടാം തവണയും അധികാരത്തില് വന്ന എല്ഡിഎഫ്, ഇത്തവണ കനത്ത തിരിച്ചടി നേരിടുമെന്നും പ്രതിപക്ഷ സഖ്യമെന്ന നിലയിലേക്ക് മടങ്ങേണ്ടി വരുമെന്നും റിപ്പോര്ട്ട് വ്യക്തമാക്കുന്നു. ഭരണവിരുദ്ധ വികാരം, മുന്നണികള്, മത-സാമുദായിക വികാരങ്ങള്, ക്ഷേമ പദ്ധതികള്, വികസന പ്രൊജക്ടുകള്, വിദ്യാഭ്യാസം, തൊഴില്, സംരംഭകത്വം, പാര്ട്ടി നേതൃത്വം, സ്ഥാനാര്ത്ഥി പ്രതിച്ഛായ, മാധ്യമ വ്യാഖ്യാനങ്ങള്, പ്രാദേശിക വിഷയങ്ങള് എന്നിവ വിജയത്തെ സ്വാധീനിക്കുന്ന ഘടകങ്ങളാണ്. അവസാന ഘട്ട പ്രചാരണ തന്ത്രങ്ങള്, സ്ഥാനാര്ത്ഥികള്, എന്നിവ അന്തിമ ഫലത്തെ സ്വാധീനിക്കുമെന്നും റിപ്പോര്ട്ട് പറയുന്നു.
CONTENT HIGH LIGHTS; Will UDF come to power with 91 seats?: VD Satheesan in front to become Chief Minister?; Voters Rights Foundation Survey
