അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ശബരിമല തീർത്ഥാടകർ പമ്പാനദിയിൽ വസ്ത്രങ്ങൾ ഉപേക്ഷിക്കുന്നതിലൂടെ ഉണ്ടാകുന്ന ഗുരുതരമായ മലിനീകരണം തടയാൻ പെരുനാട് ഗ്രാമപഞ്ചായത്ത് സജീവമായി ഇടപെടണമെന്ന് ഹൈക്കോടതി. നദികളുടെ പരിപാലനത്തിൽ തദ്ദേശ സ്വയംഭരണ സ്ഥാപനങ്ങൾക്കുള്ള പൊതുവായ ഉത്തരവാദിത്തം പമ്പയുടെ കാര്യത്തിലും പഞ്ചായത്ത് നടപ്പിലാക്കണമെന്നാണ് കോടതി ഉത്തരവിന്റെ കാതൽ. ഇതര നദികളുടെ സംരക്ഷണത്തിനായി സ്വീകരിക്കുന്ന മാതൃകയിൽ, പമ്പയുടെ കാര്യത്തിലും പഞ്ചായത്തിന്റെ നിരീക്ഷണവും ഇടപെടലും ഉറപ്പാക്കാനാണ് ലക്ഷ്യമിടുന്നത്.
ഇക്കാര്യത്തിൽ കൃത്യമായ ഏകോപനം ലക്ഷ്യമിട്ട് വിവിധ വകുപ്പുകളെ ഉൾപ്പെടുത്തി ഒരു സംയുക്ത പരിശോധനാ സംഘത്തിന് കോടതി രൂപം നൽകി. പെരുനാട് പഞ്ചായത്ത് ആരോഗ്യ വിഭാഗം, മലിനീകരണ നിയന്ത്രണ ബോർഡ്, ശുചിത്വ മിഷൻ എന്നിവയിലെ ഉദ്യോഗസ്ഥർ ദേവസ്വം ബോർഡുമായി സഹകരിച്ച് പ്രവർത്തിക്കണം. നിശ്ചിത ഇടവേളകളിൽ ഈ സംഘം പമ്പാതീരത്ത് സന്ദർശനം നടത്തണമെന്നും അടിഞ്ഞുകൂടുന്ന വസ്ത്രങ്ങൾ യഥാസമയം നീക്കം ചെയ്യുന്നുണ്ടെന്ന് ഉറപ്പുവരുത്തണമെന്നും കോടതി കർശന നിർദ്ദേശം നൽകിയിട്ടുണ്ട്.
