അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.വിശ്വസിച്ചു കൂടെ ഇറങ്ങിയവൾക്ക് കാവലാളാകേണ്ടവൾ തന്നെ കാലനാകുന്നതിലും വലിയൊരു ചതി ലോകത്തില്ല. സ്നേഹവും കരുതലും വാഗ്ദാനം ചെയ്ത് മന്ത്രകോടി നൽകി വീട്ടിലേക്ക് ആനയിച്ച പെൺകുട്ടിക്ക്, ആ വീട് ഒരു കൊലക്കളമായി മാറുമെന്ന് അവൾ സ്വപ്നത്തിൽ പോലും കരുതിയിരുന്നില്ല. ഒടുവിൽ രക്തം തളംകെട്ടിയ കാറിനുള്ളിൽ അവളുടെ ജീവനറ്റപ്പോൾ, തകരുന്നത് ഒരു കുടുംബത്തിന്റെ സ്വപ്നങ്ങൾ മാത്രമല്ല, മനുഷ്യബന്ധങ്ങളിലുള്ള വിശ്വാസം കൂടിയാണ്.
2014 ജൂലൈ 27. ഉത്തർപ്രദേശിലെ കാൺപൂർ നഗരത്തിന് അന്ന് സാധാരണയിലും കവിഞ്ഞ ഒരു നിശബ്ദതയുണ്ടായിരുന്നു. ബിസ്കറ്റ് രാജാവ് എന്നറിയപ്പെടുന്ന പ്രമുഖ വ്യവസായി ഓം പ്രകാശ് ശ്യാംദാസനിയുടെ മകൻ പിയൂഷും ഭാര്യ ജ്യോതിയും ഒരു റെസ്റ്റോറന്റിൽ നിന്ന് അത്താഴം കഴിഞ്ഞ് മടങ്ങുകയായിരുന്നു.
26-കാരിയായ ജ്യോതിയുടെ മുഖത്ത് അന്ന് നേരിയൊരു പുഞ്ചിരിയുണ്ടായിരുന്നു. പക്ഷേ, ആ പുഞ്ചിരിക്കു പിന്നിൽ തന്റെ ഭർത്താവ് ഒരുക്കുന്ന മരണക്കെണി അവൾ തിരിച്ചറിഞ്ഞില്ല. സ്നേഹം നടിച്ച് തന്നെ കാറിൽ കയറ്റിയ പിയൂഷ്, ആ രാത്രിയെ തന്റെ അവസാന രാത്രിയാക്കി മാറ്റുമെന്ന് ആ പാവം പെൺകുട്ടി കരുതിയിരുന്നില്ല.
രാത്രി 11:30 കഴിഞ്ഞിരിക്കുന്നു. വിജനമായ റോഡിൽ വെച്ച് രണ്ട് ബൈക്കുകളിലായി എത്തിയ നാലുപേർ തങ്ങളുടെ കാർ തടഞ്ഞുവെന്നും, തന്നെ മർദ്ദിച്ച് ഭാര്യയെ തട്ടിക്കൊണ്ടുപോയെന്നും പറഞ്ഞ് ചോരയിൽ കുളിച്ച പിയൂഷ് പോലീസ് സ്റ്റേഷനിൽ ഓടിയെത്തി. നഗരത്തിലെ ഉന്നത കുടുംബങ്ങൾ തമ്മിലുള്ള ബന്ധമായതുകൊണ്ട് പോലീസ് ഉണർന്നു പ്രവർത്തിച്ചു.
എന്നാൽ മണിക്കൂറുകൾക്ക് ശേഷം 10 കിലോമീറ്റർ അകലെ പിയൂഷിന്റെ കാർ കണ്ടെത്തിയപ്പോൾ കണ്ട കാഴ്ച പോലീസുകാരെ പോലും വിറപ്പിച്ചു. 17 തവണ കത്തികൊണ്ട് ആഴത്തിൽ കുത്തേറ്റ നിലയിൽ ജ്യോതിയുടെ മൃതദേഹം. ആഭരണങ്ങളൊന്നും നഷ്ടപ്പെടാത്തതിനാൽ അതൊരു കൊലപാതകമാണെന്ന് പോലീസ് ഉറപ്പിച്ചു.
ആദ്യഘട്ടത്തിൽ പിയൂഷിന്റെ അഭിനയം പോലീസിനെ തെറ്റിദ്ധരിപ്പിച്ചെങ്കിലും, അയാളുടെ ശരീരത്തിലെ പരിക്കുകൾ കൃത്രിമമാണെന്ന് പോലീസ് കണ്ടെത്തി. തുടർന്ന് നടത്തിയ ശാസ്ത്രീയ അന്വേഷണത്തിലാണ് പിയൂഷിന്റെ മൊബൈൽ ഫോൺ നിർണ്ണായക തെളിവായി മാറിയത്.
മനീഷ മഗീജ എന്ന യുവതിയുമായുള്ള പിയൂഷിന്റെ അവിഹിത ബന്ധമായിരുന്നു കൊലപാതകത്തിന് പിന്നിൽ. ഇരുവരും തമ്മിൽ 5,500-ഓളം തവണ ഫോണിൽ സംസാരിച്ചിരുന്നു. കൊലപാതകം നടന്ന ദിവസം മാത്രം 18 കോളുകൾ! ജ്യോതിയെ ഒഴിവാക്കി കാമുകിക്കൊപ്പം ജീവിക്കാനായിരുന്നു പിയൂഷ് ഈ കൊട്ടേഷൻ നൽകിയത്.
മനീഷയുടെ ഡ്രൈവർക്ക് 80,000 രൂപ നൽകിയാണ് പിയൂഷ് ഈ കൊലപാതകം ആസൂത്രണം ചെയ്തത്. രണ്ട് തവണ ശ്രമിച്ചിട്ടും പരാജയപ്പെട്ട പദ്ധതി, ഒടുവിൽ ജൂലൈ 27-ന് അയാൾ നടപ്പിലാക്കി. പിയൂഷ്, മനീഷ, ഡ്രൈവർ അവധേഷ് തുടങ്ങി ആറ് പേരെയും പോലീസ് പിടികൂടി. കോടതി ആറുപേർക്കും ജീവപര്യന്തം തടവ് ശിക്ഷ വിധിച്ചു. സ്വന്തം ആഗ്രഹങ്ങൾക്ക് വേണ്ടി കൂടെയുള്ളവളെ കൊന്നുതള്ളിയ പിയൂഷിന്റെ ക്രൂരത ഇന്നും കാൺപൂരിന്റെ ഓർമ്മകളിൽ മായാത്ത ഒരു കറുത്ത പാടായി അവശേഷിക്കുന്നു.
