അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ജില്ലയിൽ കഞ്ചാവ് വേട്ടയ്ക്കിടെ എക്സൈസ് ഉദ്യോഗസ്ഥനെ കാറിടിച്ച് വീഴ്ത്തി കൊലപ്പെടുത്താൻ ശ്രമിച്ച കേസിൽ രണ്ട് യുവാക്കൾ പിടിയിലായി. പത്തനംതിട്ട സ്വദേശികളായ നസീബ് സുലൈമാൻ, ആസിഫ് എന്നിവരെയാണ് പോലീസ് അതിസാഹസികമായി പിടികൂടിയത്.
രഹസ്യവിവരത്തെത്തുടർന്ന് കഞ്ചാവ് പിടികൂടാനെത്തിയ എക്സൈസ് സംഘത്തിന് നേരെയാണ് പ്രതികൾ ആക്രമണം അഴിച്ചുവിട്ടത്. ഉദ്യോഗസ്ഥർ വാഹനത്തിന് കൈകാണിച്ചെങ്കിലും നിർത്താതെ പോയ പ്രതികൾ, തടയാൻ ശ്രമിച്ച എക്സൈസ് ഉദ്യോഗസ്ഥനായ ആനന്ദിനെ കാറിടിച്ച് വീഴ്ത്തുകയായിരുന്നു. നിലത്തുവീണ ആനന്ദിന്റെ ദേഹത്തുകൂടി കാർ കയറ്റി ഇറക്കാൻ പ്രതികൾ ശ്രമിച്ചെങ്കിലും അദ്ദേഹം വശത്തേക്ക് ഉരുണ്ടുമാറിയതിനാൽ തലനാരിഴയ്ക്കാണ് ജീവൻ രക്ഷപ്പെട്ടത്.
ഗുരുതരമായി പരിക്കേറ്റ ആനന്ദിന്റെ കാലിന് രണ്ട് ഭാഗങ്ങളിൽ പൊട്ടലുണ്ട്. ആക്രമണത്തിന് ശേഷം സ്ഥലത്തുനിന്ന് കടന്നുകളയാൻ ശ്രമിച്ച പ്രതികളെ ഉദ്യോഗസ്ഥർ പിന്തുടർന്ന് പിടികൂടുകയായിരുന്നു. പ്രതികളുടെ പക്കൽ നിന്നും കഞ്ചാവ് കണ്ടെടുത്തതായും റിപ്പോർട്ടുകളുണ്ട്. പ്രതികൾക്കെതിരെ വധശ്രമത്തിനും ലഹരിക്കടത്തിനും കേസെടുത്ത് അന്വേഷണം ഊർജിതമാക്കി.
