അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഗൗതം വാസുദേവ് മേനോൻ- വിക്രം ആരാധകർ ഏറെ കാലമായി ചോദിക്കുന്ന കാര്യമാണ് പെട്ടിയിൽ ഇരിക്കുന്ന ‘ധ്രുവനച്ചത്തിരം’ എന്ന സിനിമയുടെ റിലീസ് എന്നാണെന്ന്. ചിയാൻ വിക്രമിനെ നായകനാക്കി 2016 ൽ ഷൂട്ടിംഗ് ആരംഭിച്ച സിനിമ ഇതുവരെ പ്രേക്ഷകരുടെ മുന്നിലെത്തിയിട്ടില്ല. ഇപ്പോഴിതാ സിനിമയുടെ റിലീസിനെക്കുറിച്ച് ഗൗതം മേനോൻ പറഞ്ഞ വാക്കുകളാണ് ശ്രദ്ധ നേടുന്നത്.
‘എനിക്ക് സ്കെച്ച് വെക്കുകയാണോ. പടം ഉറപ്പായും റിലീസാകും അതിനെക്കുറിച്ചുള്ള അനൗൺസ്മെന്റ് മറ്റൊരു വേദിയിൽ ഉണ്ടാകും. ഉടൻ തന്നെ സിനിമ വരും. ഈ വർഷം തന്നെ സിനിമ വരും’. സിനിമയിൽ 25 വർഷം പൂർത്തിയായ വേളയിൽ നടത്തിയ കോൺസെർട്ടിൽ വെച്ചായിരുന്നു ഗൗതം മേനോൻ ഇക്കാര്യം പറഞ്ഞത്. ധ്രുവനച്ചത്തിരം എന്ന് പുറത്തിറങ്ങും എന്ന ആരാധകന്റെ ചോദ്യത്തിനോട് പ്രതികരിക്കുകയായിരുന്നു അദ്ദേഹം. ഒരു അഭിമുഖത്തിൽ ധ്രുവനച്ചത്തിരം റിലീസ് ചെയ്യാനുള്ള ചർച്ചകൾ നടക്കുകയാണെന്നും ഗൗതം മേനോൻ പറഞ്ഞിരുന്നു. ‘ധ്രുവനച്ചത്തിരം മാത്രമാണ് ഇപ്പോള് എന്റെ മുന്നിലുള്ള ഒരേയൊരു സിനിമ. സംവിധായകന് എന്ന നിലയിലോ, നടന് എന്ന നിലയിലോ പുതിയ സിനിമകളൊന്നും ഞാന് കമ്മിറ്റ് ചെയ്തിട്ടില്ല. ഈ ഒരു സിനിമയ്ക്ക് വേണ്ടിയാണ് ഞാൻ ഇപ്പോൾ പൂർണ്ണമായി അധ്വാനിക്കുന്നത്.
സിനിമയുമായി ബന്ധപ്പെട്ട നിയമപ്രശ്നങ്ങളൊക്കെ പരിഹരിച്ചു വരുന്നു എന്റെ കൂടെയുള്ള ഇന്വെസ്റ്റര്മാരോടും പാര്ട്ണര്മാരോടും ഇക്കാര്യം അറിയിച്ചിട്ടുണ്ട്. അവരുടെ പിന്തുണയും ഒപ്പമുണ്ട്. അധികം വൈകാതെ പ്രശ്നങ്ങളെല്ലാം അവസാനിക്കുമെന്ന് തന്നെയാണ് കരുതുന്നത്,’ എന്ന് ഗൗതം മേനോൻ പറഞ്ഞു. യൂട്യൂബ് റിവ്യൂവര് പ്രശാന്തിനോട് സംസാരിക്കുകയായിരുന്നു അദ്ദേഹം.
2016ലാണ് ധ്രുവനച്ചത്തിരത്തിന്റെ ചിത്രീകരണം ആരംഭിച്ചത്. എന്നാൽ പല കാരണങ്ങളാൽ സിനിമയുടെ ചിത്രീകരണം നിർത്തിവയ്ക്കേണ്ടി വന്നിരുന്നു. ചിത്രത്തിൽ ജോൺ എന്ന രഹസ്യാന്വേഷണ ഏജന്റായിട്ടാണ് വിക്രം വേഷമിടുന്നത്. ചിയാനൊപ്പം മലയാളത്തിന്റെ സ്വന്തം വിനായകനും സിനിമയിൽ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഋതു വർമ്മ, സിമ്രാൻ, ആർ പാർത്ഥിപൻ, വിനായകൻ, രാധിക ശരത്കുമാർ, ദിവ്യദർശിനി, മുന്ന സൈമൺ, സതീഷ് കൃഷ്ണൻ, വംശി കൃഷ്ണ, സലിം ബെയ്ഗ് എന്നിവരടങ്ങുന്ന വമ്പൻ താരനിരയാണ് വിക്രത്തിനൊപ്പം ധ്രുവനച്ചത്തിരത്തിൽ വേഷമിടുന്നത്.
