അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കേരളത്തിൽ പിണറായി വിജയന്റെ നേതൃത്വത്തിലുള്ള സർക്കാർ മൂന്നാം തവണയും അധികാരത്തിലേറാൻ സാധ്യതയുണ്ടെന്ന് എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ. സംസ്ഥാന സർക്കാരിന്റെ ഇതുവരെയുള്ള പ്രവർത്തനങ്ങൾ മികച്ച രീതിയിലാണ് മുന്നോട്ട് പോകുന്നതെന്നും ഭരണത്തിൽ താൻ പൂർണ്ണ തൃപ്തനാണെന്നും അദ്ദേഹം വ്യക്തമാക്കി. പിണറായി സർക്കാർ വീണ്ടും വരുമെന്ന കാര്യത്തിൽ തനിക്ക് നല്ലതുപോലെ ഉറപ്പുണ്ടെന്ന് അദ്ദേഹം മാധ്യമങ്ങളോട് പറഞ്ഞു.
എസ്എൻഡിപി യോഗത്തിന്റെ വോട്ട് ആർക്കെന്ന ചോദ്യത്തിന് കൃത്യമായ മറുപടിയാണ് വെള്ളാപ്പള്ളി നൽകിയത്. ഈഴവ സമുദായത്തിനുള്ളിൽ എല്ലാ രാഷ്ട്രീയ പാർട്ടികളിൽ വിശ്വസിക്കുന്നവരും ഉണ്ടെന്നും, അവരവരുടെ വിശ്വാസമനുസരിച്ച് അവർ വോട്ട് ചെയ്യുമെന്നും അദ്ദേഹം പറഞ്ഞു. “ഈ പാർട്ടിക്കേ വോട്ട് ചെയ്യാവൂ” എന്ന തരത്തിലുള്ള ഒരു തീരുമാനം നിലവിൽ യോഗത്തിനില്ല. തിരഞ്ഞെടുപ്പ് പ്രഖ്യാപിക്കുകയും സ്ഥാനാർത്ഥി നിർണയം പൂർത്തിയാവുകയും ചെയ്ത ശേഷം മാത്രമേ ഔദ്യോഗിക നിലപാട് വ്യക്തമാക്കൂ.
സമുദായത്തിന്റെ പിന്തുണ ആർക്കെന്ന കാര്യത്തിൽ അന്തിമ തീരുമാനമെടുക്കേണ്ടത് യോഗത്തിന്റെ ബോർഡും കൗൺസിലുമാണെന്ന് വെള്ളാപ്പള്ളി ഓർമ്മിപ്പിച്ചു. ചർച്ചകൾക്ക് ശേഷം മാത്രമേ സമുദായത്തിന്റെ ഔദ്യോഗിക നിലപാട് പ്രഖ്യാപിക്കുകയുള്ളൂ. നിലവിൽ സർക്കാരിന്റെ പ്രവർത്തനങ്ങളിൽ പിഴവുകളൊന്നുമില്ലെന്നും ഭംഗിയായി തന്നെ കാര്യങ്ങൾ നടക്കുന്നുണ്ടെന്നും അദ്ദേഹം കൂട്ടിച്ചേർത്തു.
