അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സർവ്വ ശിക്ഷാ കേരള (എസ്.എസ്.കെ) പദ്ധതിയുടെ ഭാഗമായി സംസ്ഥാനത്തിന് നൽകാനുള്ള ഫണ്ട് ഉടൻ ലഭ്യമാക്കാമെന്ന വാഗ്ദാനം കേന്ദ്രസർക്കാർ ലംഘിച്ചതായി കേരളം സുപ്രീംകോടതിയിൽ. സ്പെഷ്യൽ എഡ്യൂക്കേറ്റർമാരുടെ നിയമനവുമായി ബന്ധപ്പെട്ട ഹർജി പരിഗണിക്കുന്നതിനിടെയാണ് സംസ്ഥാന സർക്കാർ കേന്ദ്രത്തിനെതിരെ ഗുരുതര ആരോപണങ്ങൾ ഉന്നയിച്ചത്.
കഴിഞ്ഞ നവംബറിൽ കേസ് പരിഗണിച്ചപ്പോൾ, കേരളത്തിന് അർഹതപ്പെട്ട വിഹിതം വൈകാതെ കൈമാറുമെന്ന് കേന്ദ്രസർക്കാരിന് വേണ്ടി ഹാജരായ അഡീഷണൽ സോളിസിറ്റർ ജനറൽ ഐശ്വര്യ ഭട്ടി കോടതിക്ക് ഉറപ്പ് നൽകിയിരുന്നു. എന്നാൽ മാസങ്ങൾ പിന്നിട്ടിട്ടും തുക അനുവദിക്കുന്ന കാര്യത്തിൽ കേന്ദ്രം അനങ്ങാപ്പാറ നയം സ്വീകരിക്കുകയാണെന്ന് സംസ്ഥാന സർക്കാർ വ്യക്തമാക്കി. ഏകദേശം 1160 കോടി രൂപയോളം കേന്ദ്രം തടഞ്ഞുവെച്ചിരിക്കുകയാണെന്നാണ് റിപ്പോർട്ടുകൾ സൂചിപ്പിക്കുന്നത്.
കേന്ദ്രത്തിന്റെ ഭാഗത്തുനിന്നുണ്ടായ ഈ വീഴ്ച ചൂണ്ടിക്കാട്ടി സംസ്ഥാനം ഉന്നയിച്ച വാദങ്ങൾ കോടതി ഗൗരവത്തോടെയാണ് കണ്ടത്. കേന്ദ്രസർക്കാർ വാഗ്ദാനം ലംഘിച്ചുവെന്ന ആരോപണത്തിൽ വ്യക്തത വരുത്തിക്കൊണ്ട് വിശദമായ സത്യവാങ്മൂലം ഫയൽ ചെയ്യാൻ സുപ്രീംകോടതി കേരളത്തോട് നിർദ്ദേശിച്ചു. സീനിയർ അഭിഭാഷകൻ പി.വി ദിനേശ്, സ്റ്റാന്റിംഗ് കോൺസൽ നിഷേ രാജൻ ഷൊങ്കർ എന്നിവരാണ് കേരളത്തിനായി കോടതിയിൽ ഹാജരായത്.
ഭിന്നശേഷിക്കാരായ കുട്ടികളെ പഠിപ്പിക്കുന്ന സ്പെഷ്യൽ എഡ്യൂക്കേറ്റർമാരുടെ നിയമനവും ശമ്പളവുമായി ബന്ധപ്പെട്ട കാര്യങ്ങളാണ് ഈ തർക്കം മൂലം പ്രതിസന്ധിയിലായിരിക്കുന്നത്. കേന്ദ്രവിഹിതം ലഭിക്കാത്തത് സംസ്ഥാനത്തെ വിദ്യാഭ്യാസ മേഖലയിൽ വലിയ സാമ്പത്തിക ഭാരം സൃഷ്ടിക്കുന്നുണ്ടെന്നും, ഇത് പദ്ധതിയുടെ സുഗമമായ നടത്തിപ്പിനെ ബാധിക്കുന്നുണ്ടെന്നും കേരളം കോടതിയെ അറിയിച്ചു.
