അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഏറെ വിവാദമായ മൈക്രോഫിനാൻസ് തട്ടിപ്പുകേസിൽ എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനെ വിജിലൻസ് സംഘം ചോദ്യം ചെയ്തു. എസ്പി എസ്. ശശിധരന്റെ നേതൃത്വത്തിലുള്ള പ്രത്യേക സംഘമാണ് കഴിഞ്ഞ ബുധനാഴ്ച ചോദ്യം ചെയ്തത്. കേസിലെ മുഖ്യപ്രതിയായ വെള്ളാപ്പള്ളിയുടെ മൊഴി രേഖപ്പെടുത്തിയതോടെ വരും ദിവസങ്ങളിൽ കേസ് അന്വേഷണം നിർണ്ണായക ഘട്ടത്തിലേക്ക് കടക്കുമെന്നാണ് സൂചന.
വർഷങ്ങളായി നീണ്ടുപോകുന്ന ഈ കേസിലെ അന്വേഷണം അടിയന്തരമായി പൂർത്തിയാക്കണമെന്ന് കഴിഞ്ഞ ജൂലൈയിൽ ഹൈക്കോടതി കർശന നിർദ്ദേശം നൽകിയിരുന്നു. ഇതിന്റെ അടിസ്ഥാനത്തിലാണ് വിജിലൻസ് സംഘം നടപടികൾ ഊർജ്ജിതമാക്കിയത്. മുൻ മുഖ്യമന്ത്രി വി.എസ്. അച്യുതാനന്ദൻ നൽകിയ പരാതിയുടെ അടിസ്ഥാനത്തിൽ 2016-ലാണ് വെള്ളാപ്പള്ളിയടക്കം അഞ്ച് പേർക്കെതിരെ വിജിലൻസ് കേസെടുത്തത്.
പിന്നാക്ക വികസന കോർപറേഷനിൽ നിന്ന് കുറഞ്ഞ പലിശയ്ക്ക് ലഭിച്ച വായ്പ ഗുണഭോക്താക്കൾക്ക് നൽകാതെ ഉയർന്ന പലിശയ്ക്ക് വിതരണം ചെയ്ത് സാമ്പത്തിക ക്രമക്കേട് നടത്തിയെന്നാണ് കേസ്. വെള്ളാപ്പള്ളി നടേശന് പുറമെ, പിന്നാക്ക വികസന കോർപറേഷൻ മുൻ എംഡി നജീബ്, നിലവിലെ എംഡി ദിലീപ് കുമാർ, എസ്എൻഡിപി യൂണിയൻ നേതാവ് ഡോ. എം.എൻ. സോമൻ എന്നിവരാണ് കേസിലെ മറ്റ് പ്രതികൾ.
അതേസമയം, തനിക്കെതിരെയുള്ള ആരോപണങ്ങൾ അടിസ്ഥാനരഹിതമാണെന്ന് ചോദ്യം ചെയ്യലിന് ശേഷം വെള്ളാപ്പള്ളി നടേശൻ പ്രതികരിച്ചു. മൈക്രോഫിനാൻസ് ഇടപാടുകളിൽ യാതൊരുവിധ ക്രമക്കേടും നടന്നിട്ടില്ലെന്നും വിജിലൻസ് സംഘം തന്റെ മൊഴി രേഖപ്പെടുത്തുക മാത്രമാണ് ചെയ്തതെന്നും അദ്ദേഹം മാധ്യമങ്ങളോട് പറഞ്ഞു.
